Kwaambuuzyania Kuli Kabotu Kuti Kwaba Kutamvwanana Mubbizinesi

Mbuli mbukulembedwe mulugwalo lwa 1 BaKorinto 6:1-8, mwaapostolo Paulo wakaambuula atalaa kutamvwanana kukonzya kubako akati kabakombima. Wakatondeezya kuti chakali kuusisya kuti amwi maKristu akuKorinto akali kutolana “kulubeta lwabataluleme.” (Vesi 1) Paulo wakaamba twaambo tupa kuti maKristu atatolani kunkuta yakunyika, pesi akeelede kwaambuula atalaa kutamvwanana kwabo mumbungano. Atulange-lange tumwi twaambo tujatikizidwe mululayo oolu alimwi tuyoolanga-langa zimwi zyiimo zitajatikizigwi pe mululayo oolu.

Ikuti kwaba kutamvwanana mubbizinesi akati kabakombima, tweelede kulanga-langa nkani eeyi katubelesya maboneno aaJehova kutali eesu. (Tusimpi 14:12) Chilayandikana kuti twaambuzyanie chakufwambaana atalaa kaambo aako kakatanakomena pe, mbuli mbwakatondeezya Jesu. (Matayo 5:23-26) Chilawusisya kuti amwi maKristu alakonzya kukazyania zyakuti kumamanino alakonzya kutolana kunkuta. Paulo wakaamba kuti: “Ncintu cibi kulindinywe kusesana [kutolana kunkuta] umwi mweenzinyina naba kaniini.” Nkamboonzi? Nkaambo eezi zilakonzya kupa kuti bukombi bwakasimpe bubaa mpuwo mbi akupa kuti zina lyaLeza lisampawulwe. Eezi zipa kuti tubikkile maanu kumubuzyo waPaulo wakuti: “Sa taciindi kubota kuti mubisizigwe buyo?”—Vesi 7.

Alubo, Paulo wakatondeezya kuti Leza wakabikka mabambe mabotu aakumana kutamvwanana mumbungano. Mumbungano, muli baalu balaaluzibo lwakasimpe kazwa muMagwalo alimwi Paulo wakaamba kuti ‘balakonzya kubeteka . . . akati kababunyina’ ikuti kakuli “makani aansi ano.” (Vesi 3-5) Jesu wakatondeezya nzila zitatu zikonzya kutugwasya kuti tumane kutamvwanana kwetwaa kubejelezya naa kubbida umwi muntu. Nzila yakusaanguna, nkwaambuuzyania kamuli babili; yabili, kuti kamutali kumvwanana mweelede kuyanduula mukamboni naa bakamboni babili; alimwi yatatu, ikuti nzila eezi zibili zyakachila, mulakonzya kutola nkani yanu kubaalu bamumbungano.—Matayo 18:15-17.

Baalu bachiKristu tebasikwiminina twaambo naa baalumi bamabbizinesi. Tababikki milawu yeelede kutobelwa kuti kakuli kutamvwanana akati kabakombinyina. Kunze lyaboobo, bagwasya bantu batamvwanani kuti babelesye Magwalo alimwi babaa luumuno akati kabo. Ikuti yabayumina nkani eeyo, balakonzya kukumbila lugwasyo kumulangizi wabbazu naa kuwofesi yamutabi yaBakamboni baJehova. Nikuba boobo, kuli zimwi zyiimo zitajatikizigwi mululayo lwakambwaa Paulo. Nziizili zyiimo eezyo?

Chimwi chiindi, kutola nkani kunkuta kulakonzya kuti njiyo nzila ayilikke ikonzya kupa kuti kube luumuno. Muchikozyano, kutola kaambo kunkuta kulakonzya kuti njiyo nzila yakuti bantu balekane zili mumulawu, kuti kuzibwe kuti ngwani akati kabo uyeelede kukkalaa mwana, kuti kuzibwe mali yeelede kugwisigwa amwanakazi naa amwaalumi kuti balekana, kuti muntu apegwe mali ya insurance, kulembesegwa kuti ujane mali ikuti kkampani yajalwa akulembesegwa kuti ujane lukono kuti umwi wafwa. Kuli zimwi zyiimo zikonzya kupa kuti mukwesu ayande kusunzya umwi muntu kuti alikwabilile kukutamvwanana.a

Ikuti muntu watola umwi kunkuta, kakutali kuti uyanda kuti bakazyanye, unooli talikutyola lulayo lwakaambwaa Paulo.b Kwiinda zyoonse, maKristu ayelede kubikkila maanu kukusalazya zina lyaJehova, kuti kube luumuno akujatana mumbungano. Basikutobela Jesu bazibidwaa kubaa luyando akati kabo alimwi “luyandisyo talulangili cintu.”—1 BaKorinto 13:4, 5; Johane 13:34, 35.