Matayo
11 Lino Jesu naakamana kupa malailile kuli basikwiiya bakwe bali kkumi ababili, wakazwa ooko akuunka kuyooyiisya akukambauka muminzi yabo.
2 Pele Johane kali muntolongo naakamvwa milimo ya Kilisito, wakatuma basikwiiya bakwe 3 kuyoomubuzya kuti: “Sena ndonduwe Ooyo Uuboola naa tweelede kulangila umbi?” 4 Jesu wakabaingula kuti: “Kamuya mukamulwiide Johane nzyomumvwide anzyomubwene: 5 Boofwu batalika kubona alimwi, balema baleenda, basicinsenda balasalazyigwa abasinkematwi balamvwa, abafwide balabusyigwa, abacete balakambaukilwa makani mabotu, 6 alimwi ulikkomene ooyo uutajani cilebyo mulindime.”
7 Basikwiiya ba Johane nobakali kupiluka, Jesu wakatalika kwaambila makamu aabantu kujatikizya Johane kuti: “Ino mwakaunkide kuyoobona nzi munkanda? Sena nditete liyuuna? 8 Ino kayi ncinzi ncomwakaunkide kuyoobona? Sena muntu uusamide zisani ziteteete? Aabo basama zisani ziteteete bali mumaanda aabami. 9 Mubwini, ino mwakaunkila nzi? Sena nkuyoobona musinsimi? Ee alimwi ndimwaambila kuti mupati kwiinda musinsimi. 10 Ooyu ngonguwe uulembedwe mumajwi aakuti: ‘Amubone! Mebo lwangu ndatuma mutumwa wangu kumbele lyako, ooyo uuyoobamba nzila yako!’ 11 Masimpe ndimwaambila kuti: Akati kabaabo bakazyalwa kubakaintu, takunabwenwe mupati kwiinda Johane Mubbapatizi, pele muntu muniini mu Bwami bwakujulu mupati kwiinda nguwe. 12 Pele kuzwa kumazuba aa Johane Mubbapatizi kusikila sunu, Bwami bwakujulu nimbaakani bantu njobayanda kusika, eelyo aabo bankutwe balabujana. 13 Nkaambo Basinsimi boonse a Mulawo bakasinsima kusikila kuciindi ca Johane, 14 alimwi kuti kamuyanda kuzumina majwi aaya: Walo mwini ngo ‘Elija iweelede kuboola.’ 15 Ooyo uujisi matwi aamvwe.
16 “Ino izyalani eeli inga ndalikozyanisya ani? Lili mbuli bana baniini bakkede mumisika iboompolola kuli mbobasobana limwi 17 kuti: ‘Twakamusibila muntolilo pele tiimwakazyana; twakoomoka pele tiimwakalyuuma acamba kutondezya kuusa.’ 18 Mbubonya buyo, Johane wakaboola katalyi nikuba kunywa, pele bantu baamba kuti, ‘Uli adaimona.’ 19 Mwana wamuntu wakaboola kalya akunywa, nokuba boobo bantu baamba kuti ‘Amubone! Imuntu sindya alimwi uuyandisya kunywa waini, mweenzinyina wabasimutelo abasizibi.’ Nokuba boobo, busongo bulabonwa kuti buliluleme kwiinda mumilimo yambubo.”
20 Mpoonya wakatalika kukalalila minzi mwaakacitila bunji bwamilimo yakwe mipati, nkaambo tiiyakeempwa: 21 “Maawe kulinduwe Kolazini! Maawe kulinduwe Betesaida! Nkaambo ikuti milimo mipati yakacitika mulinduwe noyakacitika mu Tulo a Sidoni, nobakeempwa kale-kale kwiinda mukusama masaka akulilambika twe. 22 Aboobo ndimwaambila kuti: Mu Buzuba bwa Lubeta, cisubulo canu cinooli cipati kwiinda ca Tulo a Sidoni. 23 Ayebo Kapenauma, sena uyoosumpulwa kujulu? Uyooboola ansi mu Cikkalilo Cabafwu* nkaambo ikuti milimo mipati yakacitika mulinduwe noyakacitika mu Sodoma, munzi ooyu nouciliko asunu. 24 Aboobo ndimwaambila kuti: Mu Buzuba bwa Lubeta, cisubulo canu cinooli cipati kwiinda ca Sodoma.”
25 Mpoonya Jesu wakati: “Ndakutembaula caantangalala Taata, O Mwami wakujulu aanyika, nkaambo wazisisa zyintu eezyi kubasongo abacenjede, pele waziyubunwida bana basyoonto. 26 Inzya Taata, nkaambo oobu mbookayanda. 27 Taata wandipa zyintu zyoonse alimwi kunyina uumuzyi kabotu Mwana ccita Taata alikke; alimwi kunyina uumuzyi kabotu Taata ccita Mwana alikke, alimwi ayooyo Mwana ngwaayanda kuyubunwida. 28 Amuboole kulindime nyoonse nomukatede akulemenwa, eelyo ndilamukatalusya. 29 Amulikulike joko lyangu, akwiiya kulindime, nkaambo ndimubombe moyo, alimwi ndilalicesya, eelyo mulakatalusyigwa. 30 Nkaambo joko lyangu talikatazyi kunyamuna, alimwi mukuli wangu muuba.”