Matayo
3 Kumazuba aayo Johane Mubbapatizi wakaboola akukambauka munkanda ya Judaya 2 kuti: “Amweempwe, nkaambo Bwami bwakujulu bwaswena afwaafwi.” 3 Ooyu mubwini ngonguwe wakaambwa kwiinda mumusinsimi Izaya mumajwi aaya aakuti: “Amuswiilile! Kuli woompolola munkanda kuti: ‘Amubambe nzila ya Jehova! Amululamike nzila zyakwe.’” 4 Pele Johane ooyu wakali kusama cisani caboya bwankamela alutambo lwacipaya mucibuno; acakulya cakwe cakali cikwikwi abuci. 5 Mpoonya bantu mu Jelusalemu amu Judaya moonse amuminzi yoonse yeengelede Jodano bakaunka kulinguwe, 6 aboobo wakababbapatizya mu Mulonga wa Jodano, kabalyaambilila zibi zyabo antangalala.
7 Naakabona ba Falisi aba Saduki banji kababoola kubusena nkwaakali kubbapatizyila, wakabaambila kuti: “Nywebo nobana babacisasa, nguni wamucenjezya kuti mutije bukali buboola? 8 Aboobo amuzyale micelo yeendelana akweempwa kwanu. 9 Mutalyeeni kwiinda mukwaamba kuti, ‘Abulahamu ngutaateesu.’ Nkaambo ndimwaambila kuti, Leza ulakonzya kumupa bana Abulahamu kuzwa kumabwe aaya. 10 Keembe kali kale kumiyanda yazisamu. Aboobo cisamu cili coonse citazyali micelo mibotu cilagonkwa akusowelwa mumulilo. 11 Mebo ndamubbapatizya amaanzi akaambo kakweempwa kwanu, pele Ooyo uuboola munsi lyangu uli anguzu kwiinda ndime, walo ngonditeeleli kusamununa mpato. Ooyo uyoomubbapatizya amuuya uusalala amulilo. 12 Cipupuluzyo cakwe cili mujanza lyakwe alimwi uyoolusalazya loonse lubuwa lwakwe lwakulyataulila maila akuyobola maila aakwe mubutala, pele buungu uyoobuumpa mumulilo uutakonzyi kuzimwa.”
13 Lino Jesu wakazwa ku Galilaya akuya ku Jodano kuli Johane kutegwa abbapatizyigwe anguwe. 14 Pele Johane wakasola kumukasya kaamba kuti: “Ndime ndeelede kubbapatizyigwa anduwe, nkaambo nzi ncoboola kulindime?” 15 Jesu wakamwiingula kuti: “Akube boobu lino, nkaambo kucita oobo kuleelede kulindiswe kutegwa tucite zyoonse ziluleme.” Eelyo wakaleka kumukasya. 16 Lino naakamana kubbapatizyigwa, Jesu wakazwa mumaanzi, mpoonya julu lyakajaluka, eelyo wakabona muuya wa Leza ulaseluka mbuli nziba kuboola alinguwe. 17 Alimwi kwakamvwugwa jwi kujulu lyakaamba kuti: “Ooyu Mwanaangu ngweyandisya, ngwekkomanina.”