Matayo

9 Eelyo naakatanta bwato, wakazabuka akuunka kumunzi wakwabo. 2 Lino bakamuletela mwaalumi uulebukide mubili wakalede amacila. Naakabona lusyomo lwabo, Jesu wakaambila wakalebukide mubili kuti: “Koba acamba, Mwanaangu! Walekelelwa zibi zyako.” 3 Aboobo bamwi balembi bakalyaambauzya kuti: “Muntu ooyu usampaula Leza.” 4 Pele Jesu akaambo kakuzyiba mizeezo yabo wakati: “Ino nkaambo nzi ncomuyeeya zyintu zibi mumyoyo yanu? 5 Mucikozyanyo, ncili cuuba-uba, ikwaamba kuti, ‘Walekelelwa zibi zyako,’ naa kwaamba kuti, ‘Nyamuka weende’? 6 Pele kutegwa muzyibe kuti Mwana wamuntu ulijisi nguzu zyakulekelela bantu zibi anyika—” mpoonya wakaambila ooyo wakalebukide mubili kuti: “Buka, bweza macila aako akuya kuŋanda yako.” 7 Mpoonya wakabuka akuya kuŋanda yakwe. 8 Naakabona zyakacitika, makamu aabantu akayoowa alimwi akalemeka Leza iwakapa nguzu zili boobu kubantu.

9 Kuzwa waawo, naakali kuyaabweenda kuzwa kooko, Jesu wakabona mwaalumi wazyina lya Matayo ulikkede kuŋanda iitelelwa, eelyo wakamwaambila kuti: “Koba sikunditobela.” Mpoonya wakanyamuka akumutobela. 10 Aciindi cimwi, naakakkede kutebulu muŋanda, basimutelo abasizibi banji bakaboola akukkala antoomwe a Jesu abasikwiiya bakwe. 11 Pele nobakabona boobu ba Falisi, bakatalika kwaambila basikwiiya bakwe kuti: “Ino nkaambo nzi mwiiyi wanu ncalida antoomwe abasimutelo abasizibi?” 12 Eelyo naakabamvwa, wakaamba kuti: “Bantu bataciswi tabayandiki musilisi, ccita baciswa. 13 Aboobo kamuya mukaiye ncaamba majwi aaya aakuti: ‘Ndiyanda luse kutali cipaizyo.’ Nkaambo ndakaboolela kwiita basizibi ikutali bantu baluleme.”

14 Mpoonya basikwiiya ba Johane bakaboola kulinguwe akumubuzya kuti: “Ino nkaambo nzi swebo aba Falisi tulaliimya kulya, pele basikwiiya bako tabaliimyi?” 15 Aboobo Jesu wakabaambila kuti: “Sena balongwe basibwiinga balijisi kaambo kabapa kulila ciindi sibwiinga nacili ambabo? Pele ciyoosika ciindi ncobayoonyangwa sibwiinga, eelyo bayooliimya. 16 Kunyina muntu uusuma cigamba cacisani cipya kucisani caatala cakaindi, nkaambo nguzu zyancico zilakonzya kukwela cisani eeco, eelyo cimonko cilakomena kapati. 17 Alimwi bantu tababikki waini mupya munkomo zyazipaya zyakaindi. Ikuti bacita boobo, nkomo zilaanduka, waini ulatika ankomo zilanyonyooka. Pele bantu babikka waini mupya munkomo zyazipaya zipya, eelyo zyoonse zyobilo zilayobolwa.”

18 Naakacili kubaambila zyintu eezyi, kwakasika muleli umwi iwakamufwugamina akwaamba kuti: “Lino mwanaangu musimbi weelede kuti wafwa, pele koboola uzyoobikke janza lyako alinguwe, eelyo ulaba muumi.”

19 Mpoonya Jesu wakanyamuka akutalika kumutobela; abalo basikwiiya bakwe bakatobela. 20 Mpoonya mukaintu wakali kuciswa kalobola kwamyaka iili kkumi aibili, wakaboola kusyule lyakwe akujata maaya aacisani cakwe caatala, 21 nkaambo wakali kulyaambauzya kuti: “Kuti ndijate buyo cisani cakwe caatala, ndilapona.” 22 Jesu wakacenguluka, eelyo naakamubona wakati: “Koba acamba, Mwanaangu! Lusyomo lwako lwakuponya.” Kuzwa aciindi eeco mukaintu ooyu wakapona.

23 Lino naakanjila muŋanda yamuleli akubona basikusiba muntolilo ankamu yabantu kabalila, 24 Jesu wakati: “Amuzwe omuno, nkaambo musimbi ooyu tafwide pe, pele uloona.” Aboobo bakatalika kumuweela. 25 Mpoonya nkamu mboyakazwida buyo anze, wakanjila akumujata kujanza, eelyo musimbi wakabuka. 26 Eelyo makani aaya akamwaika mucooko coonse eeco.

27 Lino Jesu naakali kuyaabweenda kuzwa kooko, baalumi boofwu bobilo bakamutobela kaboongolola akwaamba kuti: “Tufwide luse, O Mwana wa Davida.” 28 Naakanjila muŋanda, baalumi boofwu bakaboola kulinguwe eelyo Jesu wakababuzya kuti: “Sena muli alusyomo lwakuti ndilakonzya kucicita eeci?” Bakamwiingula kuti: “Inzya Mwami.” 29 Lino wakajata meso aabo, akwaamba kuti: “Kweelana alusyomo lwanu, acicitike kulindinywe.” 30 Eelyo meso aabo akatalika kubona. Alimwi Jesu wakabacenjezya kuti: “Kutabi muntu naba omwe uuzyiba makani aaya.” 31 Pele balo nobakazwa anze, bakazyibya makani aakwe mucooko coonse eeco.

32 Lino nobakatalika kweenda, bantu bakamuletela syaataambi wakanjidwe daimona, 33 eelyo naakalitanda daimona, syaataambi wakaambaula. Lino makamu aabantu akagambwa akwaamba kuti: “Takunabwenwe cintu cili boobu mu Isilayeli.” 34 Pele ba Falisi bakatalika kwaamba kuti: “Utanda madaimona kwiinda munguzu zyamweendelezi wamadaimona.”

35 Lino Jesu wakali kuyaabweenda muminzi yoonse amutunzi, kayaabuyiisya muzikombelo zyabo akukambauka makani mabotu aa Bwami, akuponya malwazi aamisyobo yoonse. 36 Lino naakabona makamu aabantu, wakabeetelela nkaambo bakali kupenzyegwa alimwi bakalimwaikide mbuli mbelele zinyina mweembezi. 37 Mpoonya wakaambila basikwiiya bakwe kuti: “Masimpe, mulimo wakutebula mupati, pele basimilimo mbasyoonto. 38 Aboobo, amulombe Simalelo wabutebuzi kuti atume basimilimo mumulimo wakwe wakutebula.”