Johane

12 Kakusyeede mazuba aali cisambomwi kuti litalike Pobwe lya Kwiindilila, Jesu wakasika ku Betaniya ooko kwakali kukkala Lazalo ooyo ngwaakabusya kuzwa kubafwu. 2 Aboobo bakamubambila cilalilo ooko, alimwi Maata wakali kubakutaukila, pele Lazalo wakali umwi wabaabo bakakkede kutebulu anguwe. 3 Mpoonya Maliya wakabweza mafwuta aanunkila aakkwana cisela calita lyomwe, inado iini-ini iidula kapati, eelyo wakananika maulu aa Jesu akwaapukuta amasusu aakwe. Iŋanda yoonse yakanunkila mafwuta aayo. 4 Pele Judasi Isikaliyote, umwi wabasikwiiya bakwe ooyo wakali kuyanda kumwaaba wakati: 5 “Nkaambo nzi mafwuta aaya aanunkila ncaatasambalwa madinali aali 300 akupa mali aayo kubacete?” 6 Lino tanaakaamba boobu akaambo kakuyanda kugwasya bacete pe, pele akaambo kakuti wakali mubbi alimwi nguwakajisi ciyobwedo camali oomo mwaakali kubba mali aakayobwedwe. 7 Aboobo Jesu wakati: “Komuleka acite cilengwa eeci ikulibambila buzuba bwakuzikkwa kwangu. 8 Nkaambo bacete muli limwi lyoonse, pele mebo tamunooli andime lyoonse pe.”

9 Kulubazu lumwi nkamu mpati yaba Juda yakazyiba kuti nkwali, mpoonya bakaboola ikutali akaambo ka Jesu buyo, pele akuti babone Lazalo ooyo ngwaakabusya kuzwa kubafwu. 10 Mpoonya basilutwe babapaizi bakamvwana kuti bamujaye Lazalo awalo, 11 nkaambo ibanji akati kaba Juda bakali kuunka nkuko akumusyoma Jesu akaambo kanguwe.

12 Ibuzuba bwakatobela, nkamu yabantu mpati iyakaboolede kupobwe yakamvwa kuti Jesu wakali kuboola ku Jelusalemu. 13 Aboobo bakabweza malala akuunka kuyoomucinga alimwi bakatalika koompolola kuti: “Amumufwutule! Ulilelekedwe ooyo uuboola muzyina lya Jehova, imwami wa Isilayeli!” 14 Mpoonya Jesu wakajana mwana wambongolo alimwi wakatanta alinguwe, mbubonya mbokulembedwe kuti: 15 “Utayoowi omwana musimbi wa Ziyoni. Bona! Mwami wako ulaboola katantide amwana wambongolo.” 16 Makani aaya basikwiiya bakwe tiibakaamvwisya ciindi cakusaanguna, pele Jesu naakalemekwa bakaibaluka kuti makani aaya akalilembedwe kujatikizya nguwe akuti bakacitila nguwe zyintu eezyi.

17 Kunze lyaboobo, inkamu yakali anguwe ciindi naakaita Lazalo mucuumbwe akumubusya kuzwa kubafwu, yakazumanana kupa bumboni. 18 Aboobo mbwaanga makamu akamvwa kuti wakacitide citondezyo eeci, abalo bakaunka kuyoomucinga. 19 Eelyo ba Falisi bakalyaambauzya akati kabo balaamba: “Tee kayi mwalibonena kuti tatuzwidilili naaceya. Amubone! Nyika yoonse yamutobela.”

20 Lino kwakali ba Giliki akati kabaabo bakaboola kukukomba kupobwe. 21 Aboobo aaba bakasikila Filipo ooyo iwakali kuzwa ku Betesaida waku Galilaya, akutalika kumulomba kuti: “Omunene, tuyanda kubona Jesu.” 22 Filipo wakaboola akwaambila Anduleya. Eelyo Anduleya a Filipo bakaboola akwaambila Jesu.

23 Pele Jesu wakabaingula kuti: “Casika ciindi cakuti Mwana wamuntu alemekwe. 24 Ncobeni ndimwaambila kuti, Ikuti nseke yamaila yatawida mubulongo akufwa, inooli buyo yomwe; pele ikuti yafwa, ilazyala micelo minji. 25 Ooyo uuyandisya buumi bwakwe ulabunyonyoona, pele ooyo uusula buumi bwakwe munyika eeyi ubuyobweda buumi butamani. 26 Ikuti muntu kayanda kundibelekela anditobele, alimwi ooko nkondibede nkwanoobede awalo mubelesi wangu. Ikuti muntu kayanda kundibelekela, Taata uyoomulemeka. 27 Lino moyo wangu wapenga kapati, eelyo ino ndilaamba nzi? Taata kondifwutula kuciindi eeci. Nokuba boobo, aaka nkekaambo ncondasikila kuciindi eeci. 28 Taata, kolilemya zyina lyako.” Mpoonya kwakamvwugwa jwi kujulu lyakati: “Ndakalilemya kale alimwi ndiyoolilemya alimwi.”

29 Inkamu yabantu bakaimvwi waawo nibakalimvwa jwi, bakatalika kwaamba kuti yazuma. Bamwi bakali kuti: “Imungelo waambaula anguwe.” 30 Jesu wakaingula kuti: “Eeli jwi lyamvwugwa ikutali akaambo kandime, pele akaambo kandinywe. 31 Lino nyika eeyi ilabetekwa; eelyo mweendelezi wanyika eeyi uyootandwa. 32 Pele mebo ndaakusumpulwa mujulu kuzwa anyika, ndiyoobakwelela kulindime bantu bamisyobo yoonse.” 33 Mubwini wakaamba boobu ikutondezya mbolwakali kuyooba lufwu lwakwe ilwakali afwaafwi. 34 Aboobo inkamu yabantu yakamwiingula kuti: “Twakamvwa mu Mulawo kuti Kilisito ulapona kukabe kutamani; ino nkaambo nzi ncowaamba kuti Mwana wamuntu weelede kusumpulwa mujulu? Ino nguni Mwana wamuntu ooyu?” 35 Aboobo Jesu wakati kuli mbabo: “Munooli amumuni kwaciindi cisyoonto. Amweende mumumuni nomucijisi mumuni kutegwa mudima utamuzundi; ooyo weenda mumudima tazyibi nkwaya. 36 Nomucijisi mumuni, amusyome mumumuni kutegwa mube bana bamumuni.”

Jesu wakaamba majwi aaya amane wakaunka waakubayuba. 37 Pele nokuba kuti wakacitide zitondezyo zinji kumbele lyabo, kunyina nobakamusyoma pe, 38 aboobo akazuzikizyigwa majwi aamusinsimi Izaya ngaakaamba kuti: “Jehova, ino nguni wasyoma zyintu nzyotwakamvwa? Alimwi kujatikizya janza lya Jehova, ino nguni ngolyayubunwidwa?” 39 Ikaambo ncobatakali kukonzya kusyoma kweelana ambwaakaamba Izaya alimwi nkakuti: 40 “Waofwaazya meso aabo alimwi wayumya myoyo yabo kuti bataboni ameso aabo akuti batamvwisyi mumyoyo yabo alimwi akuti batasanduki kutegwa ndibaponye.” 41 Izaya wakaamba zyintu eezyi nkaambo wakabubona bulemu bwakwe alimwi wakali kwaamba zyanguwe. 42 Nokuba boobo, ibanji kubikkilizya abeendelezi beni bakamusyoma, pele akaambo kaba Falisi tiibakali kulitondezya kuti balamusyoma, ikutegwa batatandwi mucikombelo; 43 nkaambo bakali kuyandisya bulemu bwabantu kwiinda bulemu bwa Leza.

44 Pele Jesu wakoompolola ulaamba: “Ooyo uundisyoma tasyomi buyo ndime, pele ulamusyoma ayooyo wakandituma; 45 alimwi ooyo uundibona wamubona ayooyo wakandituma. 46 Ndakaboola kandili mumuni munyika kutegwa muntu woonse uundisyoma atazumanani mumudima. 47 Pele ikuti muntu wamvwa majwi aangu kumane taabambi, tandimubeteki pe; nkaambo tiindakaboolela kubeteka nyika, pele ndakaboolela kwiifwutula. 48 Ooyo uutandibikkili maano alimwi uutatambuli majwi aangu nkwali uuyoomubeteka. Majwi ngondaamba ngaayoomubeteka mubuzuba bwamamanino; 49 nkaambo tiindali kwaamba mukuyanda kwangu ndemwini pe, pele Taata mwini wakandituma nguwakandipa mulawo kujatikizya nzyondeelede kwaamba akukanana. 50 Alimwi ndilizyi kuti mulawo wakwe usololela kubuumi butamani. Aboobo zyintu nzyondikanana, ndilazikanana kweelana ambwaakandaambila nzizyo Taata.”