Johane

2 Lino mubuzuba bwatatu kwakali pobwe lyalukwatano ku Kana waku Galilaya, abalo banyina Jesu bakaliko. 2 Awalo Jesu abasikwiiya bakwe bakatambwa kupobwe lyalukwatano eeli.

3 Waini nowakamana, banyina Jesu bakamwaambila kuti: “Waini wabamanina.” 4 Pele Jesu wakabaambila kuti: “Ino makani aayo atujatikizya buti swebo, mebo andinywe? Ciindi cangu tacinasika.” 5 Banyina bakati kuli baabo bakali kukutauka: “Kufwumbwa ncatiimwaambile, mucite.” 6 Lino kwakali matalo aamabwe aali cisambomwi kweelana acilengwa cakusalazya caba Juda, italo alimwi kalizyula nongo zyamaanzi zyobilo naa zyotatwe.* 7 Jesu wakati kuli mbabo: “Amwaazuzye maanzi matalo.” Eelyo bakaazuzya kusikila amulomo. 8 Mpoonya wakati kuli mbabo: “Lino amuteke akutolela mweendelezi wapobwe.” Aboobo bakamutolela. 9 Lino mweendelezi wapobwe naakalabila maanzi aakasandulwa kuba waini pele katazyi nkowakazwa, nokuba kuti babelesi ibakateka maanzi aayo bakalizyi, imweendelezi wapobwe wakaita sibwiinga 10 akumwaambila kuti: “Muntu uuli woonse usaanguna kupa waini mubotu, eelyo bantu bakolwa, naleta mubi. Pele yebo wayobola waini mubotu kusikila lino.” 11 Eeci Jesu wakacicitila ku Kana waku Galilaya kacili citondezyo cakwe cakusaanguna, alimwi wakatondezya bulemu bwakwe; aboobo basikwiiya bakwe bakamusyoma.

12 Kuzwa waawo, walo abanyina abanabokwabo alimwi abasikwiiya bakwe bakaselemuka kuya ku Kapenauma, pele ooko tiibakaakukkala mazuba manji.

13 Lino Pobwe lya Kwiindilila lyaba Juda lyakali afwaafwi, eelyo Jesu wakatanta kuya ku Jelusalemu. 14 Alimwi mutempele wakajana baabo bakali kusambala ŋombe, mbelele, nkwilimba alimwi abasikucinca mali kabakkede muzyuuno zyabo. 15 Aboobo, naakamana kupanga nswepu yantambo, wakabatanda boonse aabo bakajisi mbelele aŋombe mutempele, alimwi wakawuumuna makkobili aabasikucinca mali akutingamuna matebulu aabo. 16 Alimwi wakaambila baabo bakali kusambala nkwilimba kuti: “Amuzigusye omuno zyintu eezyi! Amuleke kucita ŋanda ya Taata kuba ŋanda yamakwebo!” 17 Basikwiiya bakwe bakaibaluka kuti kulilembedwe kuti: “Ibusungu bwakuŋanda yako buya kundilya kundimaninina.”

18 Aboobo iba Juda bakamubuzya kuti: “Ncitondezyo nzi ncotitupe citondezya kuti ulijisi nguzu zyakucita zyintu eezyi?” 19 Mukwiingula Jesu wakati kuli mbabo: “Amulimwaye tempele eeli, eelyo mumazuba otatwe ndiyooliimika.” 20 Aboobo ba Juda bakati: “Itempele eeli lyakatola myaka iili makumi one acisambomwi kuyakwa, ino yebo inga waliimika buti mumazuba otatwe?” 21 Pele tempele ndyaakali kwaamba wakali mubili wakwe. 22 Pele naakabusyigwa kuzwa kubafwu, basikwiiya bakwe bakaibaluka kuti mbwaakali kwaamba oobu; mpoonya bakaasyoma Magwalo amajwi ngaakaambide Jesu.

23 Nokuba boobo, naakali mu Jelusalemu ku Pobwe lya Kwiindilila, bantu banji bakasyoma muzyina lyakwe nobakabona zitondezyo nzyaakali kucita. 24 Pele Jesu mwini tanaakali kubasyoma cakumaninina nkaambo boonse wakalibazyi, 25 alimwi akaambo kakuti tanaakali kuyandika muntu uuli woonse kumwaambila mbwabede muntu, nkaambo walo mwini wakalizyi cakali mumuntu.