Johane
21 Nozyakainda zyintu eezyi, Jesu wakalitondezya alimwi kuli basikwiiya bakwe kulwizi lwa Tibeliya. Mboobu mbwaakalitondezya. 2 Simoni Petulo, Tomasi iwakali kwiitwa kuti Wamaanga, Natanayeli uuzwa ku Kana waku Galilaya, bana ba Zebedayo alimwi abasikwiiya bakwe bambi bobilo bakali antoomwe. 3 Simoni Petulo wakati kuli mbabo: “Ndaunka kukuzuba nswi.” Bakati kulinguwe: “Andiswe tulakutobela.” Bakaunka akutanta mubwato, pele masiku aayo kunyina ncobakajaya.
4 Pele nokwakaba kubucedo Jesu wakaimikila ankomwe, nokuba boobo basikwiiya kunyina nobakazyiba kuti wakali Jesu. 5 Mpoonya Jesu wakati kuli mbabo: “Nobana baniini, sena kuli cakulya cili coonse ncomujisi?” Bakamwiingula kuti: “Peepe!” 6 Wakati kuli mbabo: “Amuwaale kansabwe kanu kululyo lwabwato eelyo mulajaya nswi.” Mpoonya bakakawaala, eelyo bakakakilwa kukakwela akaambo kakuvwula kwanswi. 7 Aboobo sikwiiya ooyo Jesu ngwaakali kuyanda wakati kuli Petulo: “Mwami!” Aboobo Simoni Petulo naakamvwa kuti wakali Mwami, wakasama cisani cakwe caatala nkaambo tanaakasamide, akusotokela mulwizi. 8 Pele basikwiiya bamwi bakaboola mubwato busyoonto kabazyaabukwela kansabwe kazwide nswi, nkaambo tiibakali kule kapati ankomwe, wakali buyo musinzo uutandila kumamita aali 100.
9 Pele nobakasika kunkomwe bakabona mulilo wamalasya answi zyakali kuyokwa alinguwo, alimwi bakabona acinkwa. 10 Jesu wakati kuli mbabo: “Amulete nswi zimwi nzyomwajaya ino aawa.” 11 Aboobo Simoni Petulo wakatanta bwato akukakwelela kunkomwe kansabwe kakazwide nswi zipati zili 153. Pele nokuba kuti zyakali zinji, tiikakadunsauka kansabwe. 12 Jesu wakati kuli mbabo: “Amuboole mulye cikoboko.” Kunyina naba omwe wabasikwiiya bakwe wakajisi camba cakumubuzya kuti: “Ino nduwe ni?” nkaambo bakalizyi kuti Mwami. 13 Jesu wakabweza cinkwa akubapa, wakacita mbubonya answi. 14 Eeci lino cakali ciindi catatu ncaakalibonya Jesu kuli basikwiiya bakwe kuzwa naakabusyigwa kuzwa kubafwu.
15 Lino nobakamana kulya cikoboko, Jesu wakati kuli Simoni Petulo: “Simoni omwana wa Johane, sena ulandiyanda kwiinda zyeezyi?” Wakati kulinguwe: “Inzya Mwami, ulizyi kuti ndilakuyanda kapati.” Jesu wakati kulinguwe: “Kosanina mbelele zyangu.” 16 Alimwi ciindi cabili wakati kulinguwe: “Simoni omwana wa Johane, sena ulandiyanda?” Wakati kulinguwe: “Inzya Mwami, ulizyi kuti ndilakuyanda kapati.” Jesu wakati kulinguwe: “Koembela tubelele twangu.” 17 Ciindi catatu wakati kulinguwe: “Simoni omwana wa Johane, sena ulandiyanda kapati?” Petulo wakausa akaambo kakuti ciindi catatu wakati kulinguwe: “Sena ulandiyanda kapati?” Aboobo wakati kulinguwe: “O Mwami, yebo ulizyi zyintu zyoonse; aboobo ulizyi kuti ndilakuyanda kapati.” Jesu wakati kulinguwe: “Kosanina tubelele twangu. 18 Ncobeni ndikwaambila kuti, Nowakacili mwana wakali kulisamika omwini akulyeendela kufwumbwa nkowakali kuyanda. Pele waakucembaala uyootandabika maanza aako, eelyo muntu uumbi nguuyookusamika akukusololela nkotayandi kuunka.” 19 Eeci wakacaamba ikutondezya lufwu ndwaakali kuyoofwa Petulo ikulemeka Leza. Naakamana kwaamba boobu, wakati kulinguwe: “Kozumanana kunditobela.”
20 Petulo wakacenguluka akubona sikwiiya ngwaakali kuyanda Jesu katobela, sikwiiya ooyo kucilalilo iwakayaama acamba ca Jesu akumubuzya kuti: “Mwami, ino nguni uuyanda kukwaaba?” 21 Aboobo mbwaakamubonena buyo, Petulo wakabuzya Jesu kuti: “O Mwami, ino walo ooyu unoocita nzi?” 22 Jesu wakati kulinguwe: “Ikuti kandiyanda kuti azumanane kusikila ndikaboole, ino eeco cikujatikizya buti yebo? Kozumanana buyo yebo kunditobela.” 23 Makani aaya akabusya mpuwo akati kababunyina yakuti sikwiiya ooyo takafwi. Pele Jesu tanaakamwaambila kuti takafwi pe, pele wakati: “Ikuti kandiyanda kuti azumanane kusikila ndikaboole, ino eeco cikujatikizya buti yebo?”
24 Ooyu ngosikwiiya uulungulula zyintu eezyi alimwi nguwakazilemba, alimwi tulizyi kuti bumboni mbwapa mbwamasimpe.
25 Mubwini kuli zyintu azimbi zinji nzyaakacita Jesu nzyondiyeeya kuti, ikuti nozyakalembwa zyoonse, imabbuku aalembedwe naatakakkwana anyika eeyi.