Johane

9 Lino naakali kuyaabweenda wakabona muntu wakali moofwu kuzwa naakazyalwa. 2 Mpoonya basikwiiya bakwe bakamubuzya kuti: “Labbi, ino nguni wakacita cibi kutegwa azyalwe kali moofwu, sena muntu ooyu naa mbazyali bakwe?” 3 Jesu wakaingula kuti: “Tali muntu ooyu wakacita cibi nobaba bazyali bakwe pe, pele nkutegwa milimo ya Leza itondezyegwe mulinguwe. 4 Tweelede kubeleka milimo yayooyo wakandituma nolicili syikati; ibusiku bulaboola muntu uuli woonse natakonzyi kubeleka. 5 Kufwumbwa kuti kandili munyika, ndili mumuni wanyika.” 6 Naakamana kwaamba majwi aaya, wakaswida mate ansi akukanda bulongo amate aakwe, mpoonya wakalambika bulongo oobo mumeso aamuntu ooyo 7 akumwaambila kuti: “Koya ukasambe muzyiba lya Siloamu” (ibbala lisandululwa kuti ‘Kutumwa’). Mpoonya wakaunka akuyoosamba, eelyo wakapiluka kalanga.

8 Aboobo basimukobonyina abaabo bakali kumubona kali sikulomba bakatalika kwaamba kuti: “Sena ooyu tali ngomuntu uulya wakali kukkala akulomba?” 9 Bamwi bakali kwaamba kuti: “Ngonguwe.” Ibambi bakali kwaamba kuti: “Tali nguwe pe, pele umukozya buyo.” Walo wakali kwaamba kuti: “Ndendime.” 10 Eelyo bakatalika kumubuzya kuti: “Ino meso aako akajaluka buti?” 11 Wakaingula kuti: “Imuntu uutegwa Jesu wakakanda bulongo akundilambika mumeso akundaambila kuti, ‘Koya ku Siloamu ukasambe.’ Mpoonya ndakaunka akusamba, eelyo ndakatalika kubona.” 12 Nobakamvwa boobo, bakati kulinguwe: “Uli kuli muntu ooyo?” Wakati: “Tandizyi.”

13 Imuntu ooyu wakali moofwu bakamutola kuba Falisi. 14 Pele mwakali mu Sabata ibuzuba oobo Jesu naakakanda bulongo akujalula meso aakwe. 15 Aboobo aciindi aawa abalo ba Falisi bakatalika kumubuzya mbwaakatalika kubona. Wakati kuli mbabo: “Wakandilambika bulongo mumeso, mpoonya ndakasamba eelyo ndakatalika kulanga.” 16 Aboobo ibamwi baba Falisi bakatalika kwaamba kuti: “Ooyu tali muntu uuzwa kuli Leza, nkaambo tabambi buzuba bwa Sabata.” Bamwi bakatalika kwaamba kuti: “Ino mbuti muntu sizibi mbwakonzya kucita zitondezyo zyamusyobo ooyu?” Eelyo bakaandaana akati kabo. 17 Mpoonya alimwi bakamubuzya muntu ooyo wakali moofwu kuti: “Ino waamba nzi kujatikizya nguwe, mbwaanga wakajalula meso aako?” Mwaalumi ooyu wakati: “Musinsimi.”

18 Nokuba boobo, ba Juda tiibakamusyoma kuti wakali moofwu akuti wakatalika kubona, kusikila nobakaita bazyali bamuntu ooyu iwakatalika kubona. 19 Eelyo bakababuzya kuti: “Sena ooyu ngomwanaanu ngomwaamba kuti wakazyalwa kali moofwu? Pele ino caba buti kuti lino ulabona?” 20 Mpoonya bazyali bakwe bakaingula kuti: “Tulizyi kuti ooyu mwaneesu akuti wakazyalwa kali moofwu. 21 Pele mbwaatalika kubona tatuzyi pe, naba yooyo wakamujalula meso tatumuzyi pe. Kamumubuzya, mupati. Ulalyaambilila mwini.” 22 Bazyali bakaamba makani aaya akaambo kakuyoowa ba Juda, nkaambo ba Juda bakalipangene kale kuti, kufwumbwa uuzumina kuti Jesu ngo Kilisito, weelede kutandwa mucikombelo. 23 Nkakaambo kaako bazyali bakwe ncobakaambila kuti: “Mupati, kamumubuzya.”

24 Aboobo bakamwiita lwabili muntu ooyo wakali moofwu akumwaambila kuti: “Kolemeka Leza; tulizyi kuti muntu ooyu ngusizibi.” 25 Mukwiingula wakati: “Kufwumbwa naa ngusizibi tandizyi pe. Comwe buyo ncendizyi ncakuti nokuba kuti ndakali moofwu, lino ndilabona.” 26 Mpoonya bakamubuzya kuti: “Ncinzi ncaakacita kulinduwe? Ino wakaajalula buti meso aako?” 27 Wakabaingula kuti: “Ndamwaambila kale pele tiimwamvwa. Nkaambo nzi ncomuyanda kumvwa alimwi? Sena anywebo muyanda kuba basikwiiya bakwe?” 28 Nobakamvwa boobo, bakamusampaula akumwaambila kuti: “Yebo ndonduwe sikwiiya wamuntu ooyo, pele swebo tuli basikwiiya ba Musa. 29 Tulizyi kuti Leza wakalaambawide a Musa; pele muntu ooyu tatukuzyi pe nkwazwa.” 30 Muntu ooyu mukwiingula wakati kuli mbabo: “Masimpe eeci cilagambya kuti tamukuzyi nkwazwa, pele mebo wakandijalula meso. 31 Tulizyi kuti Leza tabaswiilili basizibi, pele kufwumbwa uumuyoowa Leza akucita kuyanda kwakwe ulamuswiilila ooyu. 32 Kuzwa kaindi takunamvwugwa kuti muntu uuli woonse wakajalula meso aamuntu wakazyalwa kali moofwu. 33 Ikuti muntu ooyu naatali kuzwa kuli Leza, kunyina ncaakali kukonzya kucita.” 34 Mukwiingula bakati kulinguwe: “Yebo wakazyalwa mucibi, aboobo sena uyiisya ndiswe?” Mpoonya bakamutanda!

35 Jesu wakamvwa kuti bakamutanda, eelyo naakamujana wakamubuzya kuti: “Sena ulamusyoma Mwana wamuntu?” 36 Muntu ooyo wakaingula kuti: “Ino nguni ooyo, mwami, ikutegwa ndimusyome?” 37 Jesu wakati kulinguwe: “Wamubona alimwi ooyo waambaula anduwe ngonguwe.” 38 Mpoonya wakati: “Ndilamusyoma, Mwami.” Eelyo wakamukotamina. 39 Alimwi Jesu wakati: “Akaambo kalubeta oolu ncindakaboolela munyika eeyi: kutegwa aabo bataboni babone, abaabo babona babe boofwu.” 40 Ibamwi baba Falisi mbocakali limwi bakaamvwa makani aaya, eelyo bakati kulinguwe: “Sena andiswe tuli boofwu?” 41 Jesu wakabaambila kuti: “Nomwali boofwu, nomutajisi cibi. Pele lino mwaamba kuti, ‘Tulabona.’ Cibi canu cilazumanana andinywe.”