Milimo
11 Lino batumwa abakwesu bakali mu Judaya bakamvwa kuti bantu bamasi abalo bakalitambula jwi lya Leza. 2 Aboobo Petulo naakatanta akusika ku Jelusalemu, ibakali kutobela bupalule bakatalika kumukazya, 3 kabaamba kuti wakanjila muŋanda yabantu batapalwidwe akulya ambabo. 4 Aboobo Petulo wakabalungulwida zyakacitika zyoonse, ulaamba:
5 “Ndakali kupaila mumunzi wa Jopa, mpoonya mucilengaano ndakabona cintu cili mbuli ciyumwido kaciboola ansi mbuli cisani cipati caangidwe muziswi zyone icilengelezyegwa, alimwi mane cakasika aawo mpondakabede. 6 Nindakalangisya mulincico, ndakabona banyama bamunyika bamaulu one, banyama bamusyokwe, ibakalaba alimwi abayuni bamujulu. 7 Alimwi ndakamvwa jwi lyakandaambila kuti, ‘Nyamuka Petulo, jaya ulye!’ 8 Pele ndakati, ‘Peepe Mwami, nkaambo mukanwa mwangu tamunabuzuba mwanjila cintu cisofweede naa citasalali.’ 9 Iciindi cabili ijwi lizwa kujulu lyakati, ‘Koleka kwaamba zyintu Leza nzyaasalazya kuti zilisofweede.’ 10 Eeci cakacitika ciindi catatu, mpoonya zyoonse zyakakwelwa akupilusyigwa kujulu. 11 Alimwi amubone, aciindi nciconya eeco kwakasika baalumi botatwe aŋanda mpotwakabede ibakatumidwe kulindime kuzwa ku Kaisaleya. 12 Aboobo muuya wakandaambila kuti nduunke ambabo, kakunyina kudonaika naaceya. Pele abalo bakwesu aaba bali cisambomwi bakaunka andime, eelyo twakanjila muŋanda yamwaalumi ooyo.
13 “Wakatulwiida mbwaakabona mungelo wakaima muŋanda yakwe akumwaambila kuti, ‘Kotuma bantu ku Jopa kuyooita Simoni uutegwa Petulo, 14 eelyo uyookwaambila zyintu eezyo zinga zyapa kuti yebo abamuŋanda yako boonse mukafwutulwe.’ 15 Pele nindakatalika kwaambaula, muuya uusalala wakabasikila mbubonya mbowakatusikila aswebo kumatalikilo. 16 Mpoonya ndakaibaluka ncaakali kwaamba Mwami, naakali kwaamba kuti, ‘Johane walo wakali kubbapatizya amaanzi, pele nywebo muyoobbapatizyigwa amuuya uusalala.’ 17 Aboobo, ikuti Leza wakapa cipego nciconya eeco kuli mbabo mbubonya mbwaakacita akulindiswe notwakasyoma Mwami Jesu Kilisito, ino ndime ni mebo kuti ndikazye Leza?”
18 Lino nobakamvwa zyintu eezyi, bakalibombya, alimwi bakatembaula Leza, balaamba: “Anu nkokuti Leza wapa coolwe cakweempwa kubantu bamasi kutegwa abalo bakajane buumi.”
19 Aboobo aabo ibakamwaika akaambo kamapenzi aakabuka kujatikizya Sitefano bakaakusika ku Fonike, ku Kupulo aku Antiyokeya, pele tiibakali kukambauka jwi kumuntu uuli woonse ccita buyo kuba Juda balikke. 20 Pele akati kabo kwakali baalumi bamwi baku Kupulo aku Kulene ibakaboola ku Antiyokeya akutalika kwaambaula abantu bakanana Chigiliki, kabaambilizya makani mabotu aa Mwami Jesu. 21 Kunze lyaboobo, ijanza lya Jehova lyakali ambabo, alimwi bantu banji bakaba basyomi akusandukila ku Mwami.
22 Impuwo yabo yakamvwugwa kumbungano yakali mu Jelusalemu, eelyo balo bakatuma Banaba ku Antiyokeya. 23 Lino naakasika akubona luzyalo lwa Leza, wakakondwa akutalika kubakulwaizya boonse kuti bazumanane kukakatila ku Mwami amoyo omwe; 24 nkaambo wakali mwaalumi mubotu, uuzwide muuya uusalala alusyomo. Alimwi nkamu yabantu mpati yakayungizyigwa ku Mwami. 25 Aboobo wakaunka ku Taso kuyooyandaula Saulo. 26 Naakamujana, wakamuleta ku Antiyokeya. Eelyo kwamwaka woonse bakali kuswaangana antoomwe ambabo mumbungano akuyiisya nkamu yabantu mpati, alimwi kwakali ku Antiyokeya basikwiiya kwiinda mukusololelwa a Leza nkobakasaanguna kwiitwa kuti Banakilisito.
27 Lino kumazuba aaya basinsimi bamwi bakaselemukila ku Antiyokeya kuzwa ku Jelusalemu. 28 Umwi wabo uutegwa Agabo wakanyamuka akutalika kutondezya kwiinda munguzu zyamuuya kuti kwakali kuyooba nzala mpati munyika yoonse; eelyo nzala eeyi yakaba ncobeni kuciindi ca Kilaudiya. 29 Aboobo basikwiiya aabo bakakanza umwi aumwi kweelana ancaakali kukonzya kupa, ikutumina lugwasyo kubakwesu bakkala mu Judaya; 30 alimwi ncobeni bakacita mbubonya oobo, bakatuma lugwasyo oolo kubaalu kwiinda muli Banaba a Saulo.