2 Bakorinto

13 Eeci cilaba ciindi catatu kuboola kulindinywe. “Kumilomo yabakamboni bobilo naa botatwe makani oonse aelede kusinizyigwa.” 2 Nokuba kuti tandili kooko lino, cili mbuli kuti ndamuswaya ciindi cabili, alimwi ndainduluka kubacenjezya aabo ibakabisya musyule alimwi aboonse bacaala kuti, ikuti naa ndikaboole alimwi nsikabaleki pe. 3 Ndaamba boobo akaambo kakuti muyandaula bumboni butondezya kuti Kilisito, ooyo uujisi nguzu kulindinywe alimwi singuzu akati kanu mubwini ulaambaula kwiinda mulindime. 4 Masimpe, ncobeni wakagagailwa acisamu akaambo kakubula nguzu, pele ulapona akaambo kanguzu zya Leza. Alimwi masimpe tatujisi nguzu anguwe, pele tuyookkala antoomwe anguwe kwiinda munguzu zya Leza zitondezyegwa kulindinywe.

5 Amuzumanane kulilingula kutegwa muzyibe naa muli mulusyomo, amuzumanane kulilingula kutegwa muzyibe mbomubede. Naa sena tamuzyi kuti Jesu Kilisito ulikamantene andinywe? Ccita kuti mwakajanwa abutongo. 6 Masimpe ndasyoma mulazyiba kuti swebo kunyina notwakajanwa abutongo pe.

7 Lino tulapaila kuli Leza kuti mutaciti cibi cili coonse, ikutali kuti swebo tutondezye kuti tunyina butongo, pele nkutegwa kamucita zibotu, nokuba kuti swebo tubonwa kuti tuli abutongo. 8 Nkaambo tatukonzyi kucita cikazyanya akasimpe, pele buyo ceendelana akasimpe. 9 Masimpe tulakondwa lyoonse swebo notutajisi nguzu pele nywebo nomuli basinguzu; alimwi eeci ncotupailila, ikuti mululamikwe. 10 Nkakaambo kaako ndilemba zyintu eezyi nonditako, ikutegwa ndaakusika, nditakazibelesyi cabukali nguzu nzyaakandipa Mwami zyakuti kandiyaka ikutali kumwaya.

11 Lino mukumanizya, bakwesu, ndimwaambila kuti amuzumanane kukondwa, kululamikwa, kuumbulizyigwa, kumvwana akukkala muluumuno; eelyo Leza siluyando alimwi siluumuno unooli andinywe. 12 Kamwaanzyanya kwiinda mukumyontana kusalala. 13 Basalali boonse balamwaanzya.

14 Luzyalo lwa Mwami Je-su Kilisito aluyando lwa Leza alimwi amuuya uusalala ngotupedwe azibe andinywe nyoonse.