Bakolose
3 Pele ikuti mwakabusyigwa antoomwe a Kilisito, amuzumanane kuyandaula zyintu zili kujulu, ooko Kilisito nkwakkede kujanza lyalulyo lya Leza. 2 Amuzumanane kubikkila maano kuzyintu zili kujulu, ikutali kuzyintu zili anyika. 3 Nkaambo mwakafwa alimwi buumi bwanu bwasiswa antoomwe a Kilisito muli Leza. 4 Eelyo Kilisito, ibuumi bwesu, aakuyubununwa, andinywe muyooyubununwa antoomwe anguwe mubulemu.
5 Aboobo, amujaye zizyo zyamubili wanu eezyo zili anyika kujatikizya zisusi mbuli bwaamu, busofwaazi, luunyaunya, kulombozya kubyaabi, alimwi abulyato kwalo kuli nkukomba mituni. 6 Akaambo kazyintu eezyi bukali bwa Leza bulaboola. 7 Andinywe mbomwakali kupona oobu musyule. 8 Pele lino mweelede kuzigusya zyoonse eezyi kulindinywe, bukali, kunyema, bubi, majwi aakusampula, alimwi kutazwi majwi aacisapi kumulomo wanu. 9 Mutacengani pe. Amubusamunune buntu bwanu bwakaindi amicito yambubo, 10 akulisamika buntu bupya, oobo bubukulusyigwa lyoonse kwiinda muluzyibo lwini-lwini kutegwa bukozyanye acinkozya cayooyo wakabulenga. 11 Aawa kunyina mu Giliki, naba mu Juda, nobuba bupalule naa kutapalulwa, muzwamasi, mu Sikuti,* muzike naa muntu waangulukide, pele Kilisito ngozyintu zyoonse alimwi uli muli boonse.
12 Aboobo, mbomuli basale ba Leza, basalala alimwi bayandwa, amulisamike luyando lwamoyo walubomba, luzyalo, kulicesya, kubomba moyo alimwi akukkazyika moyo. 13 Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina. Mbubonya Jehova mbwaakamulekelela camoyo woonse, andinywe mweelede kucita mbubonya oobo. 14 Pele kunze lyazyintu zyoonse eezyi, amulisamike luyando, nkaambo ncecaanzyo calukamantano cilondokede.
15 Alimwi amulekele luumuno lwa Kilisito lweendelezye mumyoyo yanu, nkaambo kayi, mwakaitwa kuluumuno oolu kuti mube mubili omwe. Aboobo amutondezye kuti mulalumba. 16 Amulekele ijwi lya Kilisito livwule mulindinywe mubusongo boonse. Amuzumanane kuyiisyanya akukulwaizyanya* antembauzyo, nyimbo zyakulumba Leza, nyimbo zyakumuuya ziimbwa cakukondwa, ikwiimbila Jehova mumyoyo yanu. 17 Alimwi kufwumbwa ncomucita mube mukukanana naa mumilimo, amuzicite zyoonse muzyina lya Mwami Jesu, kamulumba Leza Taata kwiinda mulinguwe.
18 Nywebo nobakaintu, amulibombye kubalumi banu, mbwa-anga eeci ncibotu mu Mwami. 19 Nywebo nobalumi, amuzumanane kubayanda bakaintu banu alimwi mutabi alunya kuli mbabo pe. 20 Nywebo nobana, amubamvwide bazyali banu muzyintu zyoonse, nkaambo eeci cilakkomanisya mu Mwami. 21 Nywebo nomausyi, mutanoobanyemyi bana banu, kutegwa batatyompwi.* 22 Nywebo nobazike, amubamvwide basimalelo banu baanyika muzyintu zyoonse, ikutali buyo leelyo nobamulangilila, kamuli basikukkomanisya buyo bantu, pele amucite oobo camoyo woonse akuyoowa Jehova. 23 Kufwumbwa ncomucita, amucicite camoyo woonse mbuli kuti mubelekela Jehova, ikutali bantu pe, 24 nkaambo mulizyi kuti nkuuli Jehova nkomuyootambula lukono kaluli bulumbu bwanu. Amulitakate kubelekela Simalelo wanu, Kilisito. 25 Masimpe, ooyo uubisya uyoolumbulwa kucibi ncaakacita, nkaambo Leza tasalululi pe.