1 Timoteyo
6 Boonse aabo bali mujoko lyabuzike abazumanane kubalemeka kapati basimalelo babo, kutegwa zyina lya Leza akuyiisya kwakwe zitasampaulwi. 2 Kunze lyaboobo, aabo ibajisi basimalelo ibasyomi tabeelede kubanyansya pe, akaambo kakuti mbabunyina. Muciindi caboobo, beelede kubeleka cakulisungula kapati nkaambo aabo bajana mpindu kumilimo yabo mibotu mbasyomi alimwi balayandwa.
Kozumanana kuyiisya zyintu eezyi akupa malailile aaya. 3 Ikuti naa muntu uuli woonse kayiisya njiisyo iimbi alimwi kataazumini malailile mabotu, nkokuti aayo azwa ku Mwami wesu Jesu Kilisito alimwi katazizumini njiisyo zyeendelana akubelekela Leza cakulyaaba, 4 muntu ooyo ulalitukumuna alimwi tamvwisyi cintu cili coonse. Lyoonse uyandisya buyo nkazi akukazyanya kujatikizya majwi. Eezyi zyintu nzezileta munyono, mazwanga, kusampaulana, kuyeeyelana zyintu zibyaabi, 5 kunyemezyanya lyoonse kujatikizya tukani tutayi koomoonga akati kabantu bali amizeezo iisofweede alimwi ibatacikwe kasimpe, ibayeeya kuti kubelekela Leza cakulyaaba nenzila yakujanina mpindu. 6 Ncobeni, kuli mpindu mpati mukubelekela Leza cakulyaaba, ikuti naa twakkutila azyintu nzyotujisi. 7 Nkaambo kunyina ncotwakaletelela munyika eeyi, alimwi kunyina ncotukonzya kubwezelezya kuzwa mulinjiyo. 8 Aboobo twanoojisi cakulya azyakulivwumba, tunookkutila azyintu eezyi.
9 Pele, aabo bakanzide kuvwuba banjila mukusunkwa akucegwa mukakole alimwi amuzisusi zinji zyabufwubafwuba alimwi ziletela macise eezyo zitola bantu mukunyonyooka akuloba. 10 Nkaambo kuyandisya mali ngomuyanda wamisyobo yoonse yazyintu zibyaabi, eelyo kwiinda mukuba aluyandisisyo luli boobu bantu bamwi baleya kulusyomo alimwi baliyasaula koonse-koonse amacise manji.
11 Pele yebo omuntu wa Leza, kozitija zyintu eezyi. Muciindi caboobo, koyandaulisya bululami, kubelekela Leza cakulyaaba, lusyomo, luyando, kuliyumya alimwi akubomba moyo. 12 Kolwana nkondo mbotu yalusyomo, jatisya buumi butamani oobo mbowakaitilwa alimwi akulyaambilila kabotu antangalala kujatikizya lusyomo ndojisi muli mbubo kumbele lyabakamboni banji.
13 Kumbele lya Leza, uubamba zyintu zyoonse kuti kazili zyuumi, a Kilisito Jesu, ooyo kali kamboni wakalyaambilila kabotu antangalala kumbele lya Pontiyo Pilato, ndikulailila 14 kuti ubambe mulawo cakutaba akabala nokaba kampenda kusikila kukuyubunuka kwa Mwami wesu Jesu Kilisito. 15 Ikuyubunuka ooku uyookutondezya aciindi cibikkidwe ooyo uukkomene alimwi Singuzu zinji uuli alikke, Mwami wabaabo beendelezya kabali bami a Simalelo wabaabo beendelezya kabali basimalelo, 16 ooyo alikke uutafwi, uukkala mumumuni uutaswenwi afwaafwi, ooyo uutanabonwa alimwi uutakonzyi kubonwa amuntu uuli woonse. Kulinguwe akube bulemu anguzu zitamani. Ameni.
17 Kobalailila aabo bavwubide mubweende bwazyintu oobu kuti kabatalisumpuli, akuti bulangizi bwabo butabi mulubono lutasyomeki pe, pele muli Leza, ooyo uutupa camaanza obilo zyintu zyoonse nzyotukkomanina. 18 Ubaambile kuti kabacita zibotu, kababeleka milimo mibotu minji, kabalisungwide kupa cabuuya, kabalibambilide kwaabana zyintu abamwi, 19 eelyo banooliyobweda ntalisyo mbotu yaciindi cakumbele, ikutegwa bajatisye buumi bwini-bwini.
20 Ooyandwa Timoteyo, kocibamba kabotu eeco ncowakapegwa kuti ulanganye, akwaafwutatila makani aabufwubafwuba aasofwaazya zisalala alimwi akukazyanya kujatikizya ceeco caambwa cakubeja kuti “nduzyibo.” 21 Akaambo kakuyanda kutondezya kuti bajisi luzyibo luli boobo, ibamwi balufwutatila lusyomo.
Luzyalo lwa Leza alube andinywe.