Bahebrayo

13 Luyando lwanu lwabunyina aluzumanane. 2 Mutalubi kusamausya beenzu, nkaambo bamwi kwiinda mukucita boobo, cakutazyiba bakatambula bangelo. 3 Kamubayeeya aabo baangidwe muntolongo mbuli kuti mwaangidwe limwi ambabo, alimwi abaabo batundululwa, mbwaanga anywebo nobeni mucili mumubili wanyama. 4 Lukwatano alulemekwe abantu boonse, alimwi abulo bwalukwatano butasofwaazyigwi pe, nkaambo Leza uyoobabeteka basibwaamu abasimamambe. 5 Ibukkale bwanu butabi bwakuyandisya mali pe, pele amukkutile azyintu nzyomujisi lino. Nkaambo wakaamba kuti: “Ziyume zitete, tandikakusiyi pe alimwi tandikakulekelezyi pe.” 6 Kutegwa tube basicamba akwaamba kuti: “Jehova ngomugwasyi wangu; tandikooyoowa pe. Ino muntu inga wandicita nzi?”

7 Kamubayeeya aabo basololela akati kanu, aabo ibali kwaamba jwi lya Leza kulindinywe, alimwi mbomulangilila zicitika akaambo kabukkale bwabo, amwiiye lusyomo lwabo.

8 Jesu Kilisito tacinci pe, uli mbubonya mbuli jilo asunu alimwi akutamani.

9 Mutaleesyegwi anjiisyo ziindene-indene alimwi zyeenzu; nkaambo cilainda kubota kuti moyo ukkazikizyigwe aluzyalo lwa Leza ikutali azyakulya pe, eezyo zitabagwasyi pe aabo bajisi bubi anzizyo.

10 Tujisi cipaililo aawo ba-ntu aabo ibacita mulimo uusetekene kutente mpobatajisi nguzu zyakulya zili mpawo. 11 Nkaambo mitunta yabanyama ikuzwa bulowa butolwa amupaizi mupati mubusena busalala kabuli cituuzyo cazibi ilaumpwa kunze aankambi yazilabba. 12 Aboobo, awalo Jesu wakapengela kunze amulyango wamunzi ikutegwa asalazye bantu abulowa bwakwe mwini. 13 Akaambo kaceeci, atuunke kulinguwe kunze aankambi yazilabba, katunyamwide masampu ngaakanyamuna, 14 nkaambo aano tunyina munzi uuzumanana kubako pe, pele tulisungweede kuyandaula munzi ooyo uuboola. 15 Kwiinda mulinguwe lyoonse katutuulila Leza cipaizyo cantembauzyo, nkokuti, micelo yamilomo yesu iyaambilizya zyina lyakwe antangalala. 16 Kunze lyaboobo, mutalubi kucita zibotu akwaabana zyintu nzyomujisi abamwi, nkaambo Leza ulabotelwa azipaizyo zili boobo.

17 Kamubamvwida aabo basololela akati kanu alimwi kamulibombya, nkaambo balanganya buumi bwanu kabali baabo ibayoobuzyigwa makani; ikutegwa kabacita boobu cakukondwa ikutali cakuusa pe, nkaambo eeci inga camuletela mapenzi.

18 Amuzumanane kutupailila, nkaambo tusyoma kuti tujisi manjezyeezya aasalala,* mbwaanga tuyanda kuti katusyomeka muzyintu zyoonse. 19 Pele ikapati ndimukulwaizya kupailila kuti ndipilusyigwe cakufwambaana kulindinywe.

20 Lino Leza waluumuno, ooyo wakabusya mweembezi mupati wambelele, Mwami wesu Jesu, kuzwa kubafwu kajisi bulowa bwacizuminano citamani, 21 amupe kulibambila acintu cibotu cili coonse kuti kamucita kuyanda kwakwe, kamucita mulindiswe kwiinda muli Jesu Kilisito zyintu zibotu mumeso aakwe; kulinguwe akube bulemu lyoonse mane kukabe kutamani. Ameni.

22 Lino bakwesu ndimulomba kuti mwaaswiilile camoyo woonse majwi aaya aakumukulwaizya, nkaambo ncobeni, lugwalo oolu ndundamulembela lujisi buyo majwi masyoonto. 23 Amuzyibe kuti mukwesu Timoteyo wakaangununwa. Ikuti afwambaane kusika, tuyooboola limwi kumubona.

24 Amundaanzyizye boonse aabo basololela akati kanu alimwi abasalali boonse. Aabo bali mu Italiya bamwaanzya.

25 Luzyalo lwa Leza alube andinywe nyoonse.