Bahebrayo
7 Nkaambo ooyu Melekisedeki, imwami waku Salemu, imupaizi wa Leza Mupatikampatila, wakaswaangana a Abulahamu naakali kupiluka kuzwa kukujaya bami mpoonya wakamuleleka, 2 alimwi Abulahamu wakamupa cakkumi cazyintu zyoonse. Cakusaanguna, izyina lyakwe lisandululwa kuti, “Mwami wa Bululami,” mpoonya alimwi ngomwami waku Salemu, nkokuti, “Mwami wa Luumuno.” 3 Mbwaanga unyina bausyi abanyina, unyina mulongo wazyalani nkwabalilwa, alimwi unyina matalikilo aamazuba aakwe naaba mamanino aabuumi bwakwe, pele wakacitwa kuba mbuli Mwana wa Leza, ulazumanana kali mupaizi lyoonse.
4 Aboobo, mwabona mbwaakali mupati muntu ooyu, ooyo Abulahamu silutwe wamukwasyi, ngwaakapa cakkumi cazyintu zibotu kapati nzyaakasaala. 5 Masimpe, kweelana ambowaamba Mulawo, aabo bazwa mubana basankwa ba Levi ibatambula mulimo wabupaizi balaililwa kubweza cakkumi kubantu, nkokuti, kuzwa kubanabokwabo, nokuba kuti aaba mbaluzubo* lwa Abulahamu. 6 Pele muntu ooyu watakali kubalilwa mumulongo wazyalani lyabo wakatambula zyakkumi kuli Abulahamu alimwi wakamuleleka ooyo wakajisi zisyomezyo. 7 Lino tacikazyigwi pe kuti imusyoonto ulelekwa amupati. 8 Kulubazu lumwi ibantu bafwa mbabatambula zyakkumi, pele kulubazu lumbi imuntu uutambula ngooyo uucitilwa bumboni bwakuti ulapona lyoonse. 9 Alimwi, inga kwaambwa kuti naba Levi ooyo uutambula zyakkumi, awalo wakapa zyakkumi kwiinda muli Abulahamu, 10 nkaambo wakacili mucibuno cabasyaanyinakulu ciindi Melekisedeki naakaswaangana anguwe.
11 Aboobo, ikuti kulondoka kwakali kukonzyeka kwiinda mubupaizi bwabana Levi (nkaambo bwakali cintu ciyandika mu Mulawo iwakapegwa kubantu), sena nokwacili kuyandika kubuka mupaizi uumbi uuli mbuli Melekisedeki ikutali uuli mbuli Aloni? 12 Lino mbwaanga bupaizi buli mukucincwa, kuyandika kuti awalo mulawo ucincwe. 13 Nkaambo muntu ooyo waambwa kujatikizya zyintu eezyi wakazwa kumusyobo umbi, oomo mutakwe muntu wakabeleka mulimo kucipaililo. 14 Nkaambo cilisalede kuti Mwami wesu ngwaluzubo lwa Juda, nokuba boobo Musa tanaakaamba cintu cili coonse kujatikizya bapaizi kumusyobo ooyo.
15 Alimwi eeci cilalibonya kapati nokubuka mupaizi umbi uuli mbuli Melekisedeki, 16 iwaba boobo, ikutali kweelana ambowaamba mulawo uuyeeme abuzyale bwakumubili, pele kweelana anguzu zyabuumi butakonzyi kunyonyoonwa. 17 Nkaambo kujatikizya nguwe bumboni bumwi bwaamba kuti: “Uli mupaizi mane kukabe kutamani mbubonya mbuli Melekisedeki.”
18 Aboobo, mulawo wakusaanguna wagusyigwa nkaambo unyina nguzu alimwi tuugwasyi pe. 19 Nkaambo kunyina cintu Mulawo ncowakalondola, pele ibulangizi butaliboteli ibwakaletwa mbobwakalondola zyintu, alimwi muli mbubo motuswenena afwaafwi kuli Leza. 20 Alimwi, mbwaanga eeci tiicakacitwa buyo kakunyina cikonke 21 (nkaambo ncobeni nkobali baalumi aabo ibakaba bapaizi kakunyina cikonke, pele ooyu waba mupaizi kwiinda mucikonke cakakonkwa kujatikizya nguwe a Yooyo iwakaamba kuti: “Jehova wakonka, alimwi takausi pe, ‘Uli mupaizi mane kukabe kutamani’”), 22 awalo Jesu waba cisinizyo cacizuminano citaliboteli. 23 Kunze lyaboobo, kwakaba bapaizi banji basikulya zyina nkaambo lufwu lwakali kubakasya kuzumanana kabali bapaizi, 24 pele akaambo kakuti walo ulapona lyoonse mane kukabe kutamani, ibupaizi bwakwe bunyina basikulya zyina pe. 25 Nkakaambo kaako ulakonzya kubafwutula cakumaninina aabo baboola kuli Leza kwiinda mulinguwe, nkaambo walo ulapona lyoonse kutegwa kabakombelezyezya.
26 Nkaambo swebo tuyandika mupaizi mupati uuli boobu, uusyomeka, uutakwe mulandu, uutasofweede, uuzandwidwe kuli basizibi, alimwi uusumpukide kwiinda majulu. 27 Mukwiimpana abapaizi bapati aabo, walo tayandiki kutuula zituuzyo abuzuba pe, kusaanguna kujatikizya zibi zyakwe mwini mpoonya azyabantu bambi, nkaambo eeci wakacicita ciindi comwe buyo naakalituula lwakwe mwini. 28 Nkaambo Mulawo usala baalumi batajisi nguzu kuba bapaizi bapati, pele ijwi lyacikonke lyakaambwa musyule a Mulawo lisala Mwana, ooyo wakalondolwa kukabe kutamani.