Ciyubunuzyo
9 Imungelo wasanu wakalizya mweembo wakwe. Mpoonya ndakabona nyenyeezi yakalokela anyika kuzwa kujulu, eelyo yakapegwa kkii yabulyango busololela kumulindi uutagoli. 2 Mpoonya yakajalula bulyango busololela kumulindi uutagoli, eelyo busi buli mbuli busi bwabbibi lyamulilo pati bwakauntumuka kuzwa mubulyango oobo, mpoonya zuba lyakasiya mbi, awalo muya wakasiya kubusi bwabulyango oobo. 3 Lino mubusi oobo mwakazwa cikwikwi cakaboola anyika; alimwi cakapegwa nguzu izili mbuli zyeezyo zijisi tubanze twaanyika. 4 Alimwi cakaambilwa kuti citanyonyooni zimena ansi zyamunyika naa cisyango cili coonse camusyobo wanyanzabili naa cisamu cili coonse, pele buyo bantu aabo batajisi ciganto ca Leza ankumo zyabo.
5 Lino cikwikwi tiicakazumizyigwa pe kubajaya, pele kuti aaba beelede kupenzyegwa kwamyezi yosanwe, eelyo kupenga kwabo kwakali mbuli kucisa nkwamvwa muntu nalumwa kabanze. 6 Mumazuba aayo bantu bayooyandaula lufwu, pele tabakalujani pe, alimwi bayoolombozya kufwa, pele lufwu luyoobatija.
7 Lino cikwikwi eeco cakali kulibonya mbuli mabbiza aabambilidwe nkondo; alimwi amitwe yaco kwakali zyakali kulibonya mbuli misini yangolida, alimwi ibusyu bwaco bwakali mbuli busyu bwabaalumi, 8 pele cakajisi masusu aali mbuli aabakaintu. Alimwi meno aaco akali mbuli aabasyuumbwa; 9 alimwi cakajisi zilikwabilizyo zyakucamba izili mbuli zyabutale. Alimwi kuvwuuma kwamababa aaco kwakali kulimvwisya mbuli kuvwuuma kwankalaki zikwelwa amabbiza aabalikila kunkondo. 10 Kunze lyaboobo, cijisi micila alimwi alumoola mbuli tubanze; alimwi mumicila yaco momuli nguzu zyaco zyakupenzya bantu kwamyezi yosanwe. 11 Cilijisi mwami uuceendelezya, imungelo wamulindi uutagoli. Mu Chihebulayo izyina lyakwe ngu Abadoni,* pele mu Chigiliki ujisi zyina lyakuti Apoliyoni.*
12 Ipenzi lyomwe lyainda. Amubone! Kucili mapenzi obilo aaciboola zyamana zyintu eezyi.
13 Imungelo wacisambomwi wakalizya mweembo wakwe. Mpoonya ndakamvwa ijwi kuzwa kumeja aacipaililo cangolida cili kumbele lya Leza 14 kalyaambila mungelo wacisambomwi iwakajisi mweembo, ikuti: “Baangunune bangelo bone ibaangidwe kumulonga mupati wa Filate.” 15 Aboobo bangelo aabo bone bakaangununwa, aabo ibabambilidwe woola, buzuba, mwezi alimwi amwaka, kuti bajaye cibeela catatu cabantu.
16 Lino mweelwe wabasikalumamba mumpi zyabasikalumamba basimabbiza wakali tuulunzuma tuli myaanda yobilo: Ndakaumvwa mweelwe wabo ooyo. 17 Lino mboobu mbwaakali kulibonya mabbiza ngondakabona mucilengaano, abaabo bakatantide alingawo: bakasamide zilikwabilizyo zyakucamba zisalala pyu mbuli mulilo, izili mbuli bbwe liyandisi lyamusyobo wacikambwe alimwi mbuli bbwe lyasulufa; alimwi mitwe yamabbiza yakali mbuli mitwe yabasyuumbwa, mpoonya mukanwa mwangawo mwakazwa mulilo, busi alimwi asulufa. 18 Kwiinda muzipenzyo eezyi zyotatwe cibeela catatu cabantu bakajaigwa, nkokuti amulilo, busi alimwi asulufa izyakazwa mukanwa lyangawo. 19 Nkaambo nguzu zyamabbiza aaya zili mukanwa mwangawo amumicila yangawo; nkaambo micila yawo ili mbuli nzoka alimwi ijisi mitwe, eelyo alanyonyoona azyeezyi.
20 Pele bantu boonse ibatakajaigwa azipenzyo eezyi tiibakeempwa pe kumilimo yamaanza aabo; tiibakacileka kukomba madaimona amituni yangolida, yansiliva, yamukuba, yamabwe alimwi ayazisamu, eeyo iitakonzyi kubona naa kumvwa nokuba kweenda. 21 Alimwi tiibakeempwa kubujayi bwabo naa kukusyoma mizimo kwabo naa kubwaamu bwabo naa kububbi bwabo.