8 “Alimwi bantu aaba ubaambile kuti, ‘Mboobu mbwaamba Jehova: “Amubone! Kumbele lyanu ndamubikkila nzila yabuumi anzila yalufwu. 9 Aabo bayoosyaala mumunzi ooyu bayoojaigwa apanga, nzala alimwi acilwazi. Pele kufwumbwa ooyo uuyoozwa akulyaaba kubana Kasidi aabo bamusinkilide uyoozumanana kupona alimwi uyoofwutula buumi bwakwe.”’*+

10 “‘“Nkaambo ndagamika busyu bwangu kumunzi ooyu kuti nduuletele mapenzi, ikutali bubotu pe,”+ mbwaamba Jehova. “Munzi ooyu uyakwaabwa mumaanza aamwami wa Babuloni,+ eelyo walo uyoowuumpa amulilo.”+