15 Aboobo wakamutola Jehoyakini+ kali mwaange ku Babuloni;+ kubikkilizya abanyina mwami, bamakaintu bamwami, nkumekume zyakwe zyamunkuta alimwi abantu balemekwa bamucisi wakabatola kabali baange ku Babuloni kuzwa ku Jerusalemu. 16 Alimwi mwami wa Babuloni wakabatola kabali baange ku Babuloni basikalumamba boonse ibali 7,000 kubikkilizya abasyaazibwene mukupanga zintu abafwuzi* ibali 1,000, boonse aaba bakali baalumi basinguzu ibakayiisyidwe kulwana munkondo.