1 Makani
19 Nokwakainda ciindi Nahasi mwami wabana Amoni wakafwa, eelyo mwanaakwe wakaba mwami mubusena bwakwe.+ 2 Mpoonya Davida wakati: “Ndilatondezya luyando lutamani+ kuli Hanuni mwana wa Nahasi, nkaambo bausyi bakatondezya luyando lutamani kulindime.” Aboobo Davida wakatuma batumwa bakwe kuti bakamuumbulizye akaambo kalufwu lwabausyi. Pele babelesi ba Davida nibakaboola munyika yabana Amoni+ kuli Hanuni kuti bamuumbulizye, 3 basilutwe babana Amoni bakaambila Hanuni kuti: “Sena uyeeya kuti Davida ulemeka bauso naakutumina basikukuumbulizya? Sena takuli kuzoolanga-langa munzi akuutwela mpoonya akuunyonyoona ncaatumina babelesi bakwe kulinduwe?” 4 Aboobo Hanuni wakajata babelesi ba Davida akubagela malezu+ alimwi akukosola zisani zyabo mpozili akati, nkokuti mumatako akubaleka kuti baunke. 5 Lino Davida naakaambilwa kujatikizya baalumi aabo, mpoonya aawo wakatuma bantu kuti bakabacinge nkaambo baalumi aabo bakaluuside kapati; eelyo mwami wakabaambila kuti: “Amukkale mu Jeriko+ kusikila malezu aanu akakomene, mpoonya mukaboole.”
6 Mukuya kwaciindi bana Amoni bakabona kuti baba cintu cinunka nsu kuli Davida, aboobo Hanuni abana Amoni bakatumya matalenta* aansiliva aali 1,000 kubbadelela nkalaki abasimabbiza kuzwa ku Mesopotamiya,* ku Aramu-maaka aku Zoba.+ 7 Aboobo bakabbadelela nkalaki zili 32,000 antoomwe amwami wa Maaka abantu bakwe. Mpoonya bakaboola akuyaka nkambi kumbele lya Medeba.+ Bana Amoni bakabungana antoomwe kuzwa muminzi yabo akuboola kunkondo.
8 Davida naakamvwa boobo, wakatuma Joabu+ ampi yabasikalumamba yoonse, kubikkilizya abasikalumamba bakwe basinguzu kapati.+ 9 Lino bana Amoni bakaunka kuyoolibambila nkondo kumulyango wamunzi, ciindi bami ibakaboolede nibakali balikke mucibanda.
10 Joabu naakabona kuti basinkondonyina bali mukuboola, bamwi kumbele bamwi kusyule, wakasala basikalumamba bacibwene mu Israyeli akubabikka kuti balibambile kulwana bana Siriya.+ 11 Baalumi bambi ibakasyaala wakabapa kuli* Abisai+ mwanookwabo kutegwa ababikke antoomwe kuti balibambile kulwana abana Amoni. 12 Kumane wakati: “Ikuti naa bana Siriya+ bandiyumine, nkokuti weelede kundivwuna; pele ikuti naa bana Amoni bakuyumine, ndilakuvwuna. 13 Tweelede kuyuma akuba basicamba+ kulwanina bantu besu alimwi aminzi ya Leza wesu, eelyo Jehova ulacita kufwumbwa cibotu mumeso aakwe.”
14 Mpoonya Joabu abaalumi mbaakali limwi bakaunka kuyoolwana bana Siriya, eelyo bana Siriya bakamutija.+ 15 Lino bana Amoni nibakabona kuti bana Siriya batija, abalo bakamutija Abisai mwanookwabo a Joabu akupiluka mumunzi. Kuzwa waawo Joabu wakapiluka ku Jerusalemu.
16 Lino bana Siriya nobakabona kuti bazundwa abana Israyeli, bakatuma batumwa kuyoobaleta bana Siriya ibakali kumbali aa Mulonga,*+ Sofaki* silutwe wampi yabasikalumamba ya Hadadezeri kabasololela.+
17 Davida naakaamvwa makani aaya, mpoonya aawo wakabunganya bana Israyeli boonse akuzabuka Jordano, eelyo wakasika kulimbabo akulibambila kubalwana. Lino Davida wakalibambila kulwana bana Siriya, eelyo abalo bakamulwana.+ 18 Pele bana Siriya bakatija kubana Israyeli; alimwi Davida wakajaya basinkalaki bali 7,000 abasikalumamba bana Siriya ibeenda amaulu bali 40,000, alimwi wakajaya Sobaki silutwe wampi yabo yabasikalumamba. 19 Lino babelesi ba Hadadezeri nobakabona kuti bazundwa kubana Israyeli,+ cakufwambaana bakabamba luumuno a Davida akuba balelwa bakwe;+ eelyo bana Siriya tiibakacili kuyanda kugwasya bana Amoni alimwi.