2 Makani
21 Kumane Jehosafati wakoona abamausyi alimwi wakazikkwa kubusena kwakazikkilwa bamausyi mu Munzi wa Davida; eelyo Jehoramu mwanaakwe wakaba mwami mubusena bwakwe.+ 2 Banabokwabo, ibana basankwa ba Jehosafati bakali ba Azariya, Jehieli, Zekariya, Azariya, Mikayeli a Sefatiya; boonse aaba kabali bana ba Mwami Jehosafati wa Israyeli. 3 Usyi wakalibapede zipego zinji zyansiliva, ngolida, zintu ziyandisi kubikkilizya aminzi iikwabilidwe mu Juda;+ pele bwami wakabupa Jehoramu+ nkaambo ngowakali mutaanzi kuzyalwa.
4 Lino Jehoramu mbwaakabwezela buyo bwami bwabausyi wakayumya bwami bwakwe kwiinda mukujaya banabokwabo boonse+ apanga kubikkilizya abasilutwe bamwi babana Israyeli. 5 Jehoramu wakali amyaka iili 32 naakaba mwami, eelyo wakalela kwamyaka iili lusele mu Jerusalemu.+ 6 Wakeenda munzila zyabami bana Israyeli,+ mbubonya mbobakacita bamuŋanda ya Ahabu, nkaambo wakakwete mwana musimbi wa Ahabu;+ alimwi wakazumanana kucita zibi mumeso aa Jehova. 7 Pele Jehova tanaakayanda kuleta lunyonyooko kuŋanda ya Davida+ akaambo kacizuminano ncaakapangana a Davida, nkaambo wakamusyomezyede kumupa lambe, walo abana bakwe lyoonse.+
8 Mumazuba aakwe, bana Edomu bakazangila bulelo bwa Juda,+ mpoonya bakalibikkila mwami wabo.+ 9 Aboobo Jehoramu antoomwe abasilutwe bampi yakwe yabasikalumamba alimwi ankalaki zyoonse bakaunka ooko, eelyo masiku wakanyamuka akuzunda bana Edomu ibakamuzingulukide antoomwe abasilutwe bankalaki. 10 Pele bana Edomu bazumanana kuzangila bulelo bwa Juda kusikila asunu. Bana Libina+ abalo bakamuzangila aciindi eeco, nkaambo bakasiya Jehova Leza wabamausyi.+ 11 Abalo bakayaka masena aakukombela+ mumalundu aaku Juda ikutegwa bape bantu bamu Jerusalemu kuvwuula kumuuya alimwi bakapa kuti ba Juda baleye.
12 Mukuya kwaciindi wakatambula lugwalo luzwa kuli Elija+ musinsimi ilwaamba kuti: “Mboobu mbwaamba Jehova Leza wa Davida uso, ‘Tiiweenda munzila zya Jehosafati uso+ naa munzila zya Mwami Asa+ wa Juda. 13 Pele weenda munzila zyabami babana Israyeli+ akupa ba Juda abantu bakkala mu Jerusalemu kuvwuula kumuuya+ mbubonya mbobakavwuula bamuŋanda ya Ahabu,+ alimwi wakajaya nobaba banabokwanu+ ibamuŋanda yauso ibakali kabotu kwiinda nduwe. 14 Aboobo Jehova ulaleta mapenzi aataambiki kubantu bako, kubana bako, kuli bamakaintu bako alimwi akuzintu zyako zyoonse. 15 Alimwi uyoociswa malwazi manji, kubikkilizya abulwazi bwamwida kusikila limwi mala aako akazwe akaambo kabulwazi oobo ibunookujisi buzuba abuzuba.’”
16 Mpoonya Jehova wakabusizya+ Jehoramu bukali bwaba Filisiti*+ aba Arabiya+ ibakali kukkala afwaafwi abana Etiopiya. 17 Aboobo bakasaala munzi wa Juda akunjila canguzu mulinguwo, eelyo bakabweza zintu zyoonse izyakali muŋanda yamwami+ kubikkilizya abana bakwe abamakaintu bakwe; pele kwakasyaala buyo Jehoazi*+ mwanaakwe musyoonto. 18 Musyule lyazintu zyoonse eezyi, Jehova wakamuletela bulwazi bwamwida butasilikiki.+ 19 Mukuya kwaciindi, nokwakainda myaka yobilo iikkwene, mala aakwe akazwa akaambo kabulwazi bwakwe, eelyo wakafwa kali mumacise aataambiki; alimwi bantu bakwe tiibakakunka mulilo adilwe lyakwe mbuli mbobakacita kuli bamausyi.+ 20 Wakali amyaka iili 32 naakaba mwami alimwi wakalela myaka iili lusele mu Jerusalemu. Naakafwa kunyina wakausa pe. Aboobo bakamuzikka mu Munzi wa Davida,+ pele kutali mumasena aakuzikkila bami.+