Jeremiya
27 Kumatalikilo aabulelo bwa Jehoyakimu mwana wa Josiya, mwami wa Juda, Jeremiya wakasikilwa jwi eeli kuzwa kuli Jehova: 2 “Mboobu mbwaandaambila Jehova, ‘Kolipangila zitolopo amajoko, wamana ulipope munsingo yako. 3 Mpoonya uzitumizye kumwami wa Edomu,+ kumwami wa Moabu,+ kumwami wabana Amoni,+ kumwami wa Turo,+ alimwi akumwami wa Sidoni+ kwiinda mukubelesya janza lyabatumwa ibaboola ku Jerusalemu ku Mwami Zedekiya wa Juda. 4 Ubape malailile aakutolela basimalelaabo, aaya aakuti:
“‘“Mboobu mbwaamba Jehova wamakamu, Leza wa Israyeli; mboobu mbomweelede kwaambila basimalelaanu, 5 ‘Mebo ndime ndakalenga nyika, bantu alimwi abanyama bali atala aanyika kwiinda munguzu zyangu zinji kapati akwiinda mujanza lyangu litandabede; alimwi ndaipa muntu uuli woonse ngondiyanda.*+ 6 Aboobo lino zisi zyoonse eezyi ndazibikka mumaanza aamubelesi wangu, Mwami Nebukadinezara+ wa Babuloni; alimwi ndamupa abanyama bamusyokwe kuti bamubelekele. 7 Masi oonse ayoomubelekela walo amwanaakwe alimwi amuzyukulu wakwe kusikila mane cikasike ciindi cacisi cakwe,+ eelyo masi manji abami bapati nobayoomucita kuba muzike wabo.’+
8 “‘“‘Lino kufwumbwa bwami naa cisi iciyookaka kumubelekela Mwami Nebukadinezara wa Babuloni alimwi iciyookaka kunjizya nsingo yancico mujoko lyamwami wa Babuloni, ndiyoocisubula cisi eeco apanga,+ nzala alimwi acilwazi,’ mbwaamba Jehova, ‘kusikila mane ndikabamanizye ajanza lyakwe.’
9 “‘“‘Aboobo mutabaswiilili pe basinsimi banu, basikusonda banu, basiziloto banu, basimasalamuzi banu alimwi abaŋanga banu aabo bamwaambila kuti: “Tamukamubelekeli pe mwami wa Babuloni.” 10 Nkaambo bamusinsimina zyakubeja, kutegwa mutolwe kulamfwu kuzwa munyika yanu, cakuti ndiyoomumwaya, eelyo muyooloba.
11 “‘“‘Pele cisi eeco iciyakunjizya nsingo yancico mujoko lyamwami wa Babuloni akumubelekela, ndiyoocipa kuzumanana kukkala* munyika yancico,’ mbwaamba Jehova, ‘kuti ciilime nyika eeyo akukkala mulinjiyo.’”’”
12 Awalo Mwami Zedekiya+ wa Juda mbondakamwaambila mbubonya oobu, kuti: “Amunjizye nsingo zyanu mujoko lyamwami wa Babuloni, mumubelekele walo alimwi abantu bakwe, eelyo mulazumanana kupona.+ 13 Ino nkaambo nzi yebo abantu bako ncomweelede kujaigwa apanga,+ nzala+ alimwi acilwazi+ kweelana ambwaamba Jehova kujatikizya cisi eeco citakabelekeli mwami wa Babuloni? 14 Mutaaswiilili pe majwi aabasinsimi aabo bamwaambila kuti, ‘Tamukamubelekeli pe mwami wa Babuloni,’+ nkaambo bamusinsimina zyakubeja.+
15 “‘Nkaambo mebo tiindabatuma pe,’ mbwaamba Jehova, ‘pele basinsima zyakubeja muzina lyangu, kutegwa ndimumwaye, eelyo muyooloba, nywebo alimwi abasinsimi aabo bamusinsimina.’”+
16 Lino bapaizi alimwi abantu aaba boonse ndakabaambila kuti: “Mboobu mbwaamba Jehova, ‘Mutaaswiilili pe majwi aabasinsimi banu bamusinsimina, kabati: “Amubone! Zibelesyo zyamuŋanda ya Jehova ino-ino buyo zilajolwa kuzwa ku Babuloni!”+ nkaambo eezyo nzyobamusinsimina nzyakubeja.+ 17 Mutabaswiilili pe. Amubelekele mwami wa Babuloni, eelyo mulazumanana kupona.+ Ino nkaambo nzi munzi ooyu ncoweelede kunyonyoonwa akuba matongo? 18 Pele ikuti naa mbasinsimi ncobeni alimwi ikuti naa ncobeni bajisi jwi lya Jehova, abamukombelezye Jehova wamakamu kuti zibelesyo zisyeede muŋanda ya Jehova amuŋanda yamwami wa Juda alimwi amu Jerusalemu zitatolwi ku Babuloni.’
19 “Nkaambo mboobu mbwaamba Jehova wamakamu kujatikizya misemu,+ Zyiba,*+ tuŋola+ alimwi azibelesyo zyoonse zisyeede mumunzi ooyu, 20 eezyo Mwami Nebukadinezara wa Babuloni nzyaatakabweza naakamutola mubuzike Jekoniya mwana wa Jehoyakimu mwami wa Juda, kuzwa ku Jerusalemu kuya ku Babuloni, antoomwe ankumekume zyoonse zyamu Juda amu Jerusalemu;+ 21 inzya mboobu mbwaamba Jehova wamakamu, Leza wa Israyeli kujatikizya zibelesyo zisyeede muŋanda ya Jehova amuŋanda yamwami wa Juda amu Jerusalemu: 22 ‘“Ziyootolwa ku Babuloni,+ eelyo zinooli nkomunya ooko kusikila buzuba ndaakuziyeeya,” mbwaamba Jehova. “Mpoonya ndiyoozileta akuzipilusya mubusena oobu.”’”+