1 Bakorinto

4 Muntu weelede kutubona kuti tuli babelesi ba Kristo alimwi ababanzi bamaseseke aa Leza.+ 2 Kujatikizya makani aaya, iciyandika mubabanzi ncakuti bakajanike kabasyomeka. 3 Lino kulindime tacikwe makani abuniini kuti ndalingulwa andinywe naa ankuta yabantu. Nondiba ndime tandililinguli ndemwini pe. 4 Nkaambo manjezyeezya aangu alisalede munzila zyoonse. Pele eeci tacindipi kululama pe; pele ooyo undilingula ngu Jehova.*+ 5 Aboobo, mutabeteki+ cintu cili coonse kacitanasika ciindi ceelede, kusikila Mwami akaboole. Walo uyooyubununa zintu zyamaseseke zicitilwa mumudima akubikka antangalala makanze aamumyoyo yabantu, mpoonya umwi aumwi uyoolumbaizyigwa a Leza+ kweelana amilimo yakwe.

6 Lino bakwesu, ndaamba zintu eezyi kujatikizya ndime alimwi a Apolo+ kububotu bwanu, kutegwa kwiinda mulindiswe mwiiye mulawo ooyu wakuti: “Mutaindilili zintu zilembedwe,” kutegwa mutalisumpuli+ akubona umwi kuti mubotu kwiinda umbi. 7 Nkaambo ino nguni uukupa kwiindana amuntu umbi? Mubwini, ino ncinzi ncojisi ncowatakapegwa buya?+ Ikuti naa mubwini wakapegwa buya, ino nkaambo nzi ncolidunda mbuli kuti tiiwakapegwa buya?

8 Sena nywebo mwakazijana kale zyoonse nzyomuyandika? Sena mwakavwuba kale? Sena mwakatalika kale kulela kamuli bami+ swebo katutako? Ncobeni ndiyeeya kuti nocali cibotu ikuti nomwalitalikide kale kulela kamuli bami, kutegwa andiswe tulele katuli bami andinywe.+ 9 Nkaambo kulindime cilibonya kuti swebo tobaapostolo Leza watucita kuba bamamanino kuya acibumbili katuli bantu beelede kufwa,+ nkaambo twaba cintu ceebelelwa mubbuwa lyazisobano kunyika,+ kubangelo alimwi akubantu. 10 Tuli bafwubafwuba+ akaambo ka Kristo, pele nywebo mulicenjede muli Kristo; tatujisi nguzu, pele nywebo mulaanguzu; nywebo mulalemekwa, pele swebo tulasampaulwa. 11 Nokuba kusikila kuciindi cino tulazumanana kufwa nzala,+ kufwa nyota,+ kubula zisani,* kuumwa,*+ kutuntulika, 12 alimwi akubeleka milimo iiminya amaanza eesu.+ Ibantu batutukila, tulabaleleka;+ notupenzyegwa tulaliyumya cakukkazika moyo;+ 13 ibatubejekezya tulabaingula amoyo mubombe;*+ kusikila lino twaba mbuli mafwuse* aanyika, mbuli tombe lyazintu zyoonse.

14 Ndimulembela zintu eezyi, ikutali kuti ndimuusye nsoni, pele kuti ndimulaye mbuli bana bangu bayandwa. 15 Nkaambo nokuba kuti mulakonzya kuba abasolozi* bali 10,000 muli Kristo, mubwini tamujisi bamauso banji pe; nkaambo muli Kristo Jesu, ndaba uso kwiinda mumakani mabotu.+ 16 Aboobo ndimukulwaizya kuti mwiiye ndime.+ 17 Nkakaambo kaako ndimutumina Timoteyo, nkaambo mwanaangu uuyandwa alimwi uusyomeka mu Mwami. Uyoomwiibalusya nzila zyangu kujatikizya Kristo Jesu,+ mbubonya mbondili mukuyiisya mumasena oonse mumbungano imwi aimwi.

18 Bamwi akati kanu balalisumpula mbuli kuti tandikabooli kulindinywe. 19 Pele ikuti kakuli kuyanda kwa Jehova* ndilaboola kulindinywe cakufwambaana, alimwi tandikabikkili maano kukuzyiba zintu nzyobaamba aabo balisumpula, pele kukuzyiba nguzu zyabo. 20 Nkaambo Bwami bwa Leza tabuli bwakwaamba buyo amulomo pe, pele mbwanguzu. 21 Ino ncili ncomuyanda? Sena ndikaboole amusako kulindinywe,+ naa aluyando alimwi amoyo mubombe?