Luka
20 Ibuzuba bumwi naakali kuyiisya bantu mutempele akwaambilizya makani mabotu, basilutwe babapaizi abalembi abaalu bakaboola 2 akumubuzya kuti: “Kotwaambila, ino nkuli nkookajana nguzu zyakucita zintu eezyi? Naa ino nguni wakakupa nguzu eezyi?”+ 3 Wakabaingula kuti: “Andime ndilamubuzya mubuzyo, eelyo mundiingule: 4 Sena lubbapatizyo lwa Johane lwakazwa kujulu naa kubantu?” 5 Mpoonya bakatalika kubandika mulicabo kabati: “Ikuti twaambe kuti, ‘Lwakazwa kujulu,’ ulaamba kuti, ‘Ino nkaambo nzi ncomwatakamusyoma?’ 6 Pele ikuti twaambe kuti, ‘Lwakazwa kubantu,’ bantu boonse balatupwaya mabwe, nkaambo bakali kusyoma kuti Johane wakali musinsimi.”+ 7 Aboobo bakaingula kuti tiibakakuzyi nkolwakazwa. 8 Eelyo Jesu wakabaambila kuti: “Andime tandikoomwaambila nkundakazijana nguzu zyakucita zintu eezyi.”
9 Mpoonya wakatalika kwaambila bantu cikozyanyo eeci: “Muntu umwi wakalima muunda wamisaansa+ akuusiya mumaanza aabalimi, kumane wakaunka kucisi cimbi kwaciindi cilamfwu.+ 10 Nocakasika ciindi cakutebula wakatuma muzike kubalimi kutegwa bakamupe micelo iili mbwiibede yamumuunda wamisaansa. Pele balimi bakamutanda acinkwamaanza nobakamana kumuuma.+ 11 Pele alimwi wakabatumina muzike aumbi. Ooyo awalo bakamuuma, bakamusampaula akumutanda acinkwamaanza. 12 Eelyo alimwi wakatuma watatu; ooyu awalo bakamuuma akumucisa bamane bakamutanda. 13 Abone boobo mukamwini muunda wamisaansa wakati, ‘Ino ncinzi ncondilaacite? Ndilatuma mwanaangu ngweyandisya.+ Ndasyoma ooyu bayoomulemeka.’ 14 Ibalimi aabo mbobakamubonena buyo, bakatalika kwaambaula akati kabo, balaamba, ‘Ooyu ngosikukona. Atumujaye kutegwa lukono lube lwesu.’ 15 Aboobo bakamusowela kunze aamuunda wamisaansa akumujaya.+ Aboobo, ino ncinzi mukamwini muunda wamisaansa ooyo ncayoobacita? 16 Uyooboola akubajaya balimi aaba, eelyo muunda wamisaansa uyakuupa bambi.”
Nobakamvwa makani aaya bakati: “Peepe, kutakabi boobo!” 17 Pele wakabalanga akwaamba kuti: “Aboobo, ino caamba nzi eeci cilembedwe kuti: ‘Ibbwe ndibakakaka bayaki lyaba bbwe liyandika kapati lyakukkona’?*+ 18 Kufwumbwa muntu uuwida abbwe eeli uyootyolooka.+ Alimwi kufwumbwa ngoliwida, liyoomufwanyauna.”
19 Lino balembi abasilutwe babapaizi bakali kuyanda kumujata aciindi eeco nciconya, pele bakayoowa bantu, nkaambo bakazyiba kuti wakali kwaamba mbabo mucikozyanyo eeci.+ 20 Alimwi nobakamana kumulangilila, bakatuma bantu mbobakabbadela mali kumbali kuyoolicengeezya kuti bakali balulami kutegwa bamujanine kaambo kumajwi aakwe+ akumwaaba kumfwulumende akumweendelezi. 21 Aboobo bakamubuzya balaamba: “Omwiiyi, tulizyi kuti nzyoamba akuyiisya zililuzi alimwi tosalululi, pele uyiisya nzila ya Leza mukasimpe: 22 Sena cilizumizyidwe* kuti katutela mutelo kuli Kaisara naa pe?” 23 Pele wakabuzyiba bucenjezu bwabo, eelyo wakabaambila kuti: 24 “Amunditondezye dinari.* Ino cikozyanyo eeci alimwi azina eeli nzyolijisi nzizyani?” Bakati: “Nzizya Kaisara.” 25 Wakabaambila kuti: “Aboobo, amupe Kaisara zintu zya Kaisara,+ pele zintu zya Leza amupe Leza.”+ 26 Aboobo tiibakakonzya kumujanina mulandu mumajwi aaya ngaakaamba kumbele lyabantu, pele akaambo kakuti bwakabagambya bwiinguzi bwakwe, bakaide kuumuna buyo.
27 Pele ba Saduki bamwi, aabo ibaamba kuti kunyina bubuke,+ bakaboola kulinguwe akumubuzya kuti:+ 28 “Omwiiyi, Musa wakatulembela kuti, ‘Ikuti munyina wamuntu umwi wafwa akusiya mukaintu, pele ooyu tanaakazyala mwana, imwanookwabo weelede kumubweza mukaintu ooyo akumuzyalila bana munyina.’+ 29 Lino kwakali babunyina bali ciloba. Wakusaanguna wakakwata, pele wakafwa katajisi mwana. 30 Eelyo wabili, 31 awatatu bakamukwata. Mbubonya buyo mane boonse bali ciloba; boonse bakafwa kakunyina kusiya bana. 32 Kumamanino awalo mukaintu wakafwa. 33 Aboobo mububuke, ino uyooba mukaintu wani? Nkaambo boonse ibali ciloba bakalimukwete.”
34 Jesu wakabaambila kuti: “Bantu bamubweende bwazintu obuno* balakwata akukwatwa, 35 pele aabo ibeelela kukkala mubweende bwazintu oobo buboola akubusyigwa kubafwu tabakwati nokuba kukwatwa.+ 36 Mubwini, tabakonzyi kufwa limbi pe, nkaambo bali mbuli bangelo, alimwi mbana ba Leza akaambo kakuti mbana babubuke. 37 Pele makani aakuti bafwide bayoobuka, Musa awalo wakacisalazya mucibalo caamba citewo camamvwa, naamba Jehova* kuti ngu ‘Leza wa Abrahamu a Leza wa Izaka a Leza wa Jakobo.’+ 38 Tali Leza wabafwu, pele ngwabaumi, nkaambo boonse mbaumi kulinguwe.”*+ 39 Mukwiingula bamwi balembi bakati: “Omwiiyi, waamba kabotu.” 40 Nkaambo tiibakacili kukonzya kumubuzya mubuzyo nouba omwe.
41 Mpoonya wakababuzya kuti: “Ino nkaambo nzi ncobaamba kuti Kristo mwana wa Davida?+ 42 Nkaambo Davida lwakwe mubbuku lya Intembauzyo waamba kuti, ‘Jehova* wakaambila Mwami wangu kuti: “Kkala kujanza lyangu lyalulyo 43 kusikila mane ndikabikke basinkondonyoko kuba cilyatilo camaulu aako.”’+ 44 Aboobo Davida umwiita kuti Mwami; ino mwanaakwe buti?”
45 Lino bantu boonse nobakali kuswiilila, wakaambila basikwiiya bakwe kuti: 46 “Amubacenjelele balembi ibayandisya kweendeenda kabasamide zisani zilamfwu, ibayanda kwaanzyigwa cabulemu kumisika akuyandisya zyuuno zyakumbele* muzikombelo amasena aalemenede kucilalilo,+ 47 ibasaala maanda* aabamukabafwu, alimwi balacita mambonwa* kwiinda mukupaila mipailo milamfwu. Aaba bayoopegwa cisubulo cipati.”