2 Makani
36 Mpoonya bantu bamucisi bakabweza Jehoazi+ mwana wa Josiya akumubikka kuba mwami mubusena bwausyi mu Jerusalemu.+ 2 Jehoazi wakali amyaka iili 23 naakaba mwami, alimwi wakalela kwamyezi yotatwe mu Jerusalemu. 3 Nokuba boobo, mwami wa Egepita wakamwaatula acuuno cakwe mu Jerusalemu alimwi wakatezya cisi matalenta* aansiliva aali 100 alimwi atalenta lyomwe lyangolida.+ 4 Kunze lyaboobo, mwami wa Egepita wakabikka Eliyakimu mwanookwabo a Jehoazi kuba mwami wa Juda a Jerusalemu akumucinca zina kuba Jehoyakimu; pele Neko+ wakamubweza Jehoazi mwanookwabo akumutola ku Egepita.+
5 Jehoyakimu+ wakali amyaka iili 25 naakaba mwami, alimwi wakalela kwamyaka iili 11 mu Jerusalemu. Wakazumanana kucita zintu zibi mumeso aa Jehova Leza wakwe.+ 6 Mwami Nebukadinezara+ wa Babuloni wakaboola kuti amwaange anketani zyamukuba zyobilo kutegwa amutole ku Babuloni.+ 7 Alimwi Nebukadinezara wakabweza zibelesyo zimwi zyamuŋanda ya Jehova akuzitola ku Babuloni akuyoozibikka muŋanda yakwe yabwami mu Babuloni.+ 8 Makani oonse aakaindi aamba zya Jehoyakimu, zintu zisesemya nzyaakacita alimwi amilandu iyakajanwa mulinguwe alilembedwe mu Bbuku lya Bami ba Israyeli alimwi aba Juda; eelyo Jehoyakini mwanaakwe wakaba mwami mubusena bwakwe.+
9 Jehoyakini+ wakali amyaka iili 18 naakaba mwami, alimwi wakalela myezi yotatwe amazuba aali 10 mu Jerusalemu; alimwi wakazumanana kucita zintu zibi mumeso aa Jehova.+ 10 Kumatalikilo aamwaka,* Mwami Nebukadinezara wakatuma babelesi bakwe kuti bakamulete ku Babuloni+ antoomwe azintu ziyandisi zyamuŋanda ya Jehova.+ Kumane wakabikka Zedekiya mwanookwabo abausyi kuba mwami wa Juda a Jerusalemu.+
11 Zedekiya+ wakali amyaka iili 21 naakaba mwami, alimwi wakalela kwamyaka iili 11 mu Jerusalemu.+ 12 Wakazumanana kucita zintu zibi mumeso aa Jehova Leza wakwe. Tanaakalibombya kumbele lyamusinsimi Jeremiya+ iwakaamba nzyaakalaililwa a Jehova. 13 Alimwi wakamuzangila Mwami Nebukadinezara+ ooyo wakamupa kukonka kuli Leza, alimwi wakazumanana kuba sicinguni* akuyumya moyo wakwe cakuti wakakaka kupiluka kuli Jehova Leza wa Israyeli. 14 Abalo basilutwe babapaizi boonse kubikkilizya abantu, bakaindila kutasyomeka, bakali kucita zintu zyoonse zisesemya zyabamasi alimwi bakasofwaazya ŋanda ya Jehova+ eeyo njaakasalazya mu Jerusalemu.
15 Jehova Leza wabamausyi wakazumanana kubacenjezya kwiinda mubatumwa bakwe, wakabacenjezya cakwiinduluka-induluka nkaambo wakabafwida lubomba bantu bakwe alimwi acikkalilo cakwe. 16 Pele bakali kubaseka batumwa ba Leza mwini-mwini+ akusampaula majwi aakwe+ alimwi akufwubaazya basinsimi bakwe+ cakuti tiibakacili kunyoneka kusikila bukali bwa Jehova bwakababukila bantu bakwe.+
17 Aboobo wakabaletela mwami waba Kasidi,+ iwakajaya balombwana babo apanga+ mutempele lyabo;+ tanaakafwida muntu luzyalo, abe mulombwana naba nakalindu, uucembeede naa uutabukili bulo.+ Leza wakazyaaba zintu zyoonse mumaanza aakwe.+ 18 Zibelesyo zyoonse zyamuŋanda ya Leza mwini-mwini, zipati azisyoonto, kubikkilizya azintu ziyandisi zyamuŋanda ya Jehova alimwi azintu ziyandisi zyamwami azyabasilutwe bakwe, zyoonse wakazitola ku Babuloni.+ 19 Wakaumpa ŋanda ya Leza mwini-mwini,+ wakamwaya bulambo bwa Jerusalemu,+ wakaumpa ngazi zyanguwo zikwabilidwe zyoonse akunyonyoona zintu zyoonse ziyandisi.+ 20 Wakabatola mubuzike ku Babuloni aabo batakajaigwa apanga,+ eelyo bakaba babelesi bakwe+ ababana bakwe kusikila bwami* bwa Persia nibwakatalika kulela,+ 21 kuzuzikizya jwi lya Jehova ndyaakaamba kwiinda muli Jeremiya,+ kusikila nyika yabamba masabata aanjiyo.+ Mumazuba oonse noyakali tongo yakali kubamba Sabata, kuzuzikizya myaka iili 70.+
22 Mumwaka wakusaanguna wabulelo bwa Mwami Koresi+ wa Persia, ikutegwa jwi lya Jehova ndyaakaamba kwiinda muli Jeremiya+ lizuzikizyigwe, Jehova wakapa kuti Mwami Koresi wa Persia aambilizye mubwami bwakwe boonse akulemba+ kuti: 23 “Mboobu mbwaamba Mwami Koresi wa Persia, ‘Jehova, Leza wamajulu, wandipa mami oonse aamunyika+ alimwi wandituma kuti ndimuyakile ŋanda mu Jerusalemu, mucisi ca Juda.+ Kufwumbwa uuliko akati kabantu bakwe boonse, Jehova Leza wakwe aabe anguwe alimwi kaya ku Jerusalemu.’”+