2 Makani
26 Mpoonya bantu boonse bamu Juda bakabweza Uziya,*+ iwakajisi myaka iili 16, akumubikka kuba mwami mubusena bwa Amaziya usyi.+ 2 Wakayakulula munzi wa Elati+ akuupilusya mumaanza aabana Juda naakafwa mwami* akuzikkwa antoomwe abamausyi.+ 3 Uziya+ wakali amyaka iili 16 naakaba mwami, alimwi wakalela kwamyaka iili 52 mu Jerusalemu. Banyina bakali ba Jekoliya baku Jerusalemu.+ 4 Wakazumanana kucita ziluleme mumeso aa Jehova mbubonya mbwaakacita Amaziya usyi.+ 5 Lino wakazumanana kuyandaula Leza mumazuba aa Zekariya ooyo iwakamuyiisya kuyoowa Leza mwini-mwini. Mumazuba ngaakali kuyandaula Jehova, Leza mwini-mwini wakapa kuti azwidilile.+
6 Wakaunka kuyoolwana ba Filisiti+ akupwaya bwaanda bwa Gati,+ bwaanda bwa Jabine+ abwaanda bwa Asidodi.+ Mpoonya wakayaka minzi mucilawo ca Asidodi amucilawo caba Filisiti. 7 Leza mwini-mwini wakazumanana kumugwasya kulwana ba Filisiti abana Arabiya+ ibakali kukkala mu Guribaala aba Meunimu. 8 Bana Amoni+ bakatalika kupa Uziya mutelo. Mukuya kwaciindi mpuwo yakwe yakamwaika kusikila ku Egepita, nkaambo wakaba anguzu zinji kapati. 9 Kumane Uziya wakayaka ngazi+ mu Jerusalemu ku Mulyango Waku Kkona,+ ku Mulyango wa Kkuti+ alimwi aku Bwaanda alimwi wakaziyumya. 10 Kuyungizya waawo, wakayaka ngazi+ munkanda akusya* migoti minji (nkaambo wakajisi banyama bavwubwa banji); alimwi wakacita mbubonya oobo mu Sepela aanyika iiyalene. Wakalijisi balimi abasikulanganya myuunda yamisaansa mumalundu alimwi amu Karimeli, nkaambo Uziya wakali kubuyandisya bulimi.
11 Alimwi Uziya wakaba ampi yabasikalumamba iyakalibambilide nkondo. Bakali kuunka kuyoolwana nkondo, kababikkidwe munkamu. Bakabalwa akulembwa+ a Jeieli imulembi+ a Maaseya silutwe ibakali kusololelwa a Hananiya, umwi wabalupati-pati bamwami. 12 Lino basilutwe baziinga zyabamausyi boonse ibakali kulanganya basikalumamba basinguzu bakali 2,600. 13 Bakali kusololela nkamu zyabasikalumamba bali 307,500, baalumi ibakalibambilide nkondo, basikalumamba basinguzu kuti kabagwasya mwami kulwana basinkondonyina.+ 14 Uziya wakabambila mpi yabasikalumamba yoonse, ntobo, masumo,+ zingundu, zikwabilizyo zyakucamba,+ mata alimwi amabwe aamunkwisyo.+ 15 Kuyungizya waawo, mu Jerusalemu wakapanga zibelesyo zyankondo izyakapangwa abasyaabusongo; zyakabikkwa angazi+ amumakkona aabwaanda bwamunzi kutegwa kazifwusa mivwi amabwe mapati. Aboobo mpuwo yakwe yakasakana nkaambo wakagwasyigwa kapati alimwi wakayuma.
16 Nokuba boobo, mbwaakabeda buyo anguzu, moyo wakwe wakalisumpula akulinyonyoona, alimwi tanaakasyomeka kuli Jehova Leza wakwe kwiinda mukunjila mutempele lya Jehova kutegwa aumpe tununkilizyo acipaililo catununkilizyo.+ 17 Mpoonya aawo Azariya mupaizi antoomwe abapaizi ba Jehova bamwi basicamba ibali 80, bakamutobela. 18 Bakamusikila Mwami Uziya akumwaambila kuti: “Tauli mulimo wako yebo Uziya wakuumpa tununkilizyo kuli Jehova!+ Balikke bapaizi mbabeelede kuumpa tununkilizyo, nkaambo mbalunyungu lwa Aroni,+ aabo ibakasalazyigwa. Kozwa mutempele, nkaambo tonoosyomeka alimwi eeci tacikookuletela bulemu kuli Jehova Leza pe.”
19 Pele Uziya kajisi cakuumpila tununkilizyo mujanza lyakwe wakanyema;+ eelyo kacibanyemenede boobo bapaizi, wakaba acinsenda+ ankumo yakwe kumbele lyabapaizi muŋanda ya Jehova afwaafwi acipaililo catununkilizyo. 20 Lino Azariya mupati wabapaizi abapaizi boonse nobakamulanga, bakabona kuti waba acinsenda ankumo yakwe. Aboobo cakufwambaana bakamugwisya oomo, alimwi awalo wakafwambaana kuzwa nkaambo Jehova wakamusubula.
21 Mwami Uziya wakazumanana kali sicinsenda kusikila buzuba naakafwa, alimwi wakali kukkala muŋanda imbi alikke kali sicinsenda,+ nkaambo wakaligwisyidwe kale muŋanda ya Jehova. Aciindi eeco Jotamu mwana wamwami ngowakali kweendelezya ŋanda yamwami akubeteka bantu bamucisi.+
22 Lino makani oonse aakaindi aamba zya Uziya, kuzwa kumatalikilo kusikila kumamanino, akalembwa amusinsimi Isaya+ mwana wa Amozi. 23 Mpoonya Uziya wakoona abamausyi alimwi bakamuzikka antoomwe abamausyi pele kutali mubusena buzikkilwa bami, nkaambo bakati: “Ngusicinsenda.” Eelyo Jotamu+ mwanaakwe wakaba mwami mubusena bwakwe.