Jeremiya
37 Lino Mwami Zedekiya+ mwana wa Josiya wakatalika kulela mubusena bwa Koniya*+ mwana wa Jehoyakimu, nkaambo Mwami Nebukadinezara* wa Babuloni wakamubikka kuti abe mwami mucisi ca Juda.+ 2 Pele walo ababelesi bakwe alimwi abantu bamucisi tiibakaswiilila majwi aa Jehova ngaakaamba kwiinda mumusinsimi Jeremiya.
3 Lino Mwami Zedekiya wakatuma Jehukali+ mwana wa Selemiya a Zefaniya+ mwana wa mupaizi Maaseya kumusinsimi Jeremiya kuti bakamwaambile kuti: “Akaka kotupailila kuli Jehova Leza wesu.” 4 Lino Jeremiya wakalaangulukide kweendeenda akati kabantu, nkaambo tiibakaningamubikka muntolongo.+ 5 Aciindi eeco, impi yabasikalumamba ba Farao yakali munzila kuzwa ku Egepita,+ eelyo ba Kasidi ibakali kusinkilila Jerusalemu bakamvwa makani aajatikizya mbabo. Aboobo bakaleka kusinkilila Jerusalemu.+ 6 Mpoonya ijwi lya Jehova lyakamusikila musinsimi Jeremiya kaliti: 7 “Mboobu mbwaamba Jehova Leza wa Israyeli, ‘Mboobu mbomweelede kumwaambila mwami wa Juda, ooyo wakamutuma kulindime kuti muzoondibuzye makani: “Bona! Impi yabasikalumamba ba Farao eeyo iiboola kuzoomugwasya iyoojokela kucisi canjiyo, ku Egepita noiyanda noitayandi.+ 8 Aboobo ba Kasidi bayoojokela akulwana munzi ooyu, bayakuuzunda akuwuumpa amulilo.”+ 9 Mboobu mbwaamba Jehova, “Mutalicengi pe, kamwaamba kuti, ‘Masimpe, ba Kasidi bayooleka kutulwana akuunka,’ nkaambo tabakaunki pe. 10 Nokuba kuti nywebo mwaizunda mpi yoonse yabasikalumamba yaba Kasidi aabo bamulwana, mpoonya akati kabo kwasyaala buyo baalumi baliciside, mbubonya buyo balakonzya kunyamuka kuzwa mumatente aabo akuumpa munzi ooyu amulilo.”’”+
11 Lino impi yabasikalumamba yaba Kasidi noyakaleka kusinkilila Jerusalemu akaambo kampi yabasikalumamba ya Farao,+ 12 Jeremiya wakanyamuka kuzwa ku Jerusalemu akuya kucisi ca Benjamini+ kuti akatambule caabilo cakwe akati kabantu bakwe. 13 Pele naakasika ku Mulyango wa Benjamini, imupati wabalindizi, wazina lyakuti Irija mwana wa Selemiya mwana wa Hananiya wakamujata musinsimi Jeremiya, akwaamba kuti: “Yebo uyanda kutijila kuli ba Kasidi!” 14 Pele Jeremiya wakati: “Ulabeja! Mebo tandiyandi kutijila kuli ba Kasidi pe.” Pele walo tanaakamuswiilila pe. Aboobo Irija wakaanga Jeremiya akumutola kuli basilutwe. 15 Basilutwe bakanyema akaambo ka Jeremiya,+ eelyo bakamuuma akumubikka mucitolokesi,+ muŋanda ya Jehonatani imulembi, eeyo njobakapangide kuba ntolongo. 16 Aboobo Jeremiya wakabikkwa muŋanda yamumulindi, mutwaanda twacitolokesi twakunsi, eelyo wakakkala oomo mazuba manji.
17 Mpoonya Mwami Zedekiya wakalailila kuti Jeremiya aletwe, eelyo mwami wakamubuzya cakusisikizya muŋanda yakwe.*+ Wakabuzya kuti, “Sena kuli jwi lili lyoonse kuzwa kuli Jehova?” Mpoonya Jeremiya wakati, “Inzya nkolili!” eelyo wakayungizya kuti, “Yebo uyakwaabwa mujanza lyamwami wa Babuloni!”+
18 Alimwi Jeremiya wakabuzya Mwami Zedekiya kuti: “Ino ncibi nzi ncindakucitila yebo ababelesi bako alimwi abantu aaba, cakuti mwandibikka muntolongo? 19 Ino lino bali kuli basinsimi banu aabo ibakamusinsimina kuti, ‘Mwami wa Babuloni takabooli kuzoomulwana nywebo alimwi acisi eeci’?+ 20 Lino koswiilila akaka, osimalelaangu, mwami. Akaka ndakomba, kondifwida luzyalo. Utandijoli kuŋanda ya Jehonatani+ imulembi, nkaambo inga ndaakwiile kufwida nkuko.”+ 21 Aboobo Mwami Zedekiya wakalailila kuti Jeremiya aangilwe mu Lubuwa lwa Mulindizi,+ eelyo wakali kupegwa cinkwa cibulungene buzuba abuzuba kuzwa kumugwagwa wabasikupanga zinkwa,+ kusikila mane zinkwa zyoonse zyakamana mumunzi.+ Aboobo Jeremiya wakazumanana kukkala mu Lubuwa lwa Mulindizi.