Jeremiya
41 Mumwezi waciloba, Isimayeli+ mwana wa Netaniya imwana wa Elisama, umwi walunyungu lwabami* alimwi iwabalupati-pati bamwami, wakaboola abaalumi bambi bali kkumi kuli Gedaliya mwana wa Ahikamu ku Mizipa.+ Lino ciindi nobakali kulya cakulya antoomwe ku Mizipa, 2 Isimayeli mwana wa Netaniya abaalumi bali kkumi mbocakali limwi bakanyamuka akumujaya apanga Gedaliya mwana wa Ahikamu imwana wa Safani. Aboobo wakamujaya ooyo mwami wa Babuloni ngwaakabikkide kuti kalanganya cisi. 3 Kuyungizya waawo, Isimayeli wakajaya ba Juda boonse ibakali a Gedaliya ku Mizipa, kubikkilizya abasikalumamba bana Kasidi ibakali kooko.
4 Lino mubuzuba bwabili kuzwa naakajaigwa Gedaliya, kakutanaba muntu naba omwe wakazyi cakacitika, 5 kwakaboola baalumi bali 80 kuzwa ku Sekemu,+ ku Silo+ alimwi aku Samariya.+ Zilezu zyabo zyakaligeledwe, zisani zyabo zyakalizapaukide, bakalilinengawide amibili yabo+ alimwi bakajisi zituuzyo zyamaila atununkilizyo twalibano+ mumaanza aabo kuti balete kuŋanda ya Jehova. 6 Eelyo Isimayeli mwana wa Netaniya wakazwa ku Mizipa kuti akabacinge, wakali kweenda kayaabulila. Lino naakabaswaanganya, wakabaambila kuti: “Kamuboola kuli Gedaliya mwana wa Ahikamu.” 7 Pele nobakanjila mumunzi, Isimayeli mwana wa Netaniya antoomwe abaalumi bakwe wakabajaya akubasowela mumugoti.
8 Pele kuli baalumi bali kkumi akati kabo ibakaambila Isimayeli kuti: “Utatujayi pe, nkaambo tusiside maunda-maunda aawiiti, bbaale, mafwuta alimwi abuci musyokwe.” Aboobo wakabaleka, tanaakabajaya pe antoomwe abanabokwabo. 9 Lino Isimayeli wakasowa mitunta yoonse yabaalumi mbaakajaya mumugoti mupati kapati, ooyo Mwami Asa ngwaakasyide akaambo ka Mwami Basa wa Israyeli.+ Ooyu ngomugoti Isimayeli mwana wa Netaniya ngwaakazuzya mitunta yabaalumi aabo ibakajaigwa.
10 Mpoonya Isimayeli wakababweza kabali baange bantu boonse bakasyeede ibakali ku Mizipa,+ kubikkilizya abana basimbi bamwami alimwi abantu boonse bakasyaala ku Mizipa, aabo Nebuzaradana mupati wabasikugatela mwami mbaakabikka mumaanza aa Gedaliya+ mwana wa Ahikamu. Isimayeli mwana wa Netaniya wakababweza kabali baange akuunka kuti akazabukile kubana Amoni.+
11 Johanani+ mwana wa Kareya alimwi abapati boonse bampi yabasikalumamba ibakali anguwe nobakamvwa zibi zyoonse Isimayeli mwana wa Netaniya nzyaakacita, 12 bakabweza baalumi boonse akuunka kuyoolwana Isimayeli mwana wa Netaniya, eelyo bakamujana kumaanzi manji* aaku Gibeoni.
13 Lino bantu boonse ibakali aa Isimayeli bakakondwa nobakamubona Johanani mwana wa Kareya alimwi abapati boonse bampi yabasikalumamba ibakali anguwe. 14 Mpoonya bantu boonse Isimayeli mbaakatolede kabali baange kuzwa ku Mizipa+ bakajokela akuunka antoomwe a Johanani mwana wa Kareya. 15 Pele Isimayeli mwana wa Netaniya antoomwe abaalumi bakwe bali lusele bakamutija Johanani akuunka kubana Amoni.
16 Mpoonya Johanani mwana wa Kareya alimwi abapati boonse bampi yabasikalumamba mbaakali limwi bakabweza bantu bakasyeede ku Mizipa, aabo mbobakavwuna kuli Isimayeli mwana wa Netaniya, naakamana kujaya Gedaliya+ mwana wa Ahikamu. Bakapilusya baalumi, basikalumamba, bamakaintu, bana, alimwi ankumekume zyamuŋanda yamwami kuzwa ku Gibeoni. 17 Aboobo bakaunka akuyookkala mubusena bwakulyookezyela bwa Kimuhamu ibwakabambene a Betelehemu,+ kabajisi makanze aakuunka akuyoonjila mucisi ca Egepita+ 18 akaambo kaba Kasidi. Nkaambo bakali kubayoowa, mbokunga Isimayeli mwana wa Netaniya wakajaide Gedaliya mwana wa Ahikamu, ooyo mwami wa Babuloni ngwaakabikkide kuti kalanganya cisi.+