Marko
2 Pele nokwakainda mazuba aali mbwaabede wakanjila alimwi mu Kapernauma, eelyo makani akeenda aakuti uli kuŋanda.+ 2 Aboobo bantu banji bakabungana cakunga kwakacinyina busena muŋanda naaba amulyango, mpoonya wakatalika kubaambila makani aa Bwami.+ 3 Eelyo bakamuletela muntu uulebukide mubili wakatembedwe abaalumi bone.+ 4 Pele tiibakali kukonzya kumusisya kuli Jesu akaambo kankamu yabantu, aboobo bakabbwalula ciluli aawo mpaakabede Jesu. Nobakamana kupanga cipulo muciluli, bakalengelezya macila aawo mpaakalede muntu uulebukide mubili. 5 Jesu naakabona lusyomo lwabo,+ wakaambila muntu ooyo uulebukide mubili kuti: “Mwanaangu, walekelelwa zibi zyako.”+ 6 Lino aawo kwakali balembi bamwi ibakakkede kabalyaambauzya mumoyo+ kuti: 7 “Ino nkaambo nzi muntu ooyu ncaambila boobu? Usampaula Leza. Nguni kunze lya Leza uukonzya kulekelela zibi?”+ 8 Pele mpoonya aawo Jesu wakazyiba mumoyo wakwe kuti mbobakali kuyeeya oobo, aboobo wakababuzya kuti: “Ino nkaambo nzi ncomuyeeya zintu zili boobo mumyoyo yanu?+ 9 Ncili cuuba-uba, kwaambila muntu uulebukide mubili kuti, ‘Walekelelwa zibi zyako,’ naa kwaamba kuti, ‘Nyamuka, bweza macila aako weende’? 10 Pele kutegwa muzyibe kuti Mwanaamuntu+ ulijisi nguzu zyakulekelela bantu zibi anyika—”+ wakaambila muntu ooyo uulebukide mubili kuti: 11 “Ndati kulinduwe, Nyamuka, bweza macila aako, uunke kuŋanda yako.” 12 Aboobo wakanyamuka alimwi cakufwambaana wakabweza macila aakwe akuunka kabalangilila boonse. Eelyo boonse bakagambwa akulemeka Leza, kabati: “Tatunacibwene cintu cili boobu.”+
13 Lino wakaunka alimwi kumbali aalwizi, eelyo makamu aabantu akazumanana kuboola kulinguwe, aboobo wakatalika kubayiisya. 14 Alimwi naakali kuyaabweenda, wakabona Levi mwana wa Alifayo kakkede aŋanda iitelelwa mitelo, eelyo wakamwaambila kuti: “Koba sikunditobela.” Eelyo wakanyamuka akumutobela.+ 15 Aciindi cimwi, Jesu wakali kulya* muŋanda ya Levi alimwi basimutelo abasizibi banji bakali kulya* a Jesu alimwi abasikwiiya bakwe, nkaambo kwakali banji akati kabo ibakali kumutobela.+ 16 Pele balembi baba Farisi nobakabona kuti wakali kulya abasizibi abasimutelo, bakatalika kubuzya basikwiiya bakwe kuti: “Nkaambo nzi ncalida antoomwe abasimutelo alimwi abasizibi?” 17 Naakamvwa boobo, Jesu wakati kulimbabo: “Bataciswi tabayandiki musilisi, pele aabo baciswa mbabayandika musilisi. Ndakaboolela kwiita basizibi ikutali bantu baluleme.”+
18 Lino basikwiiya ba Johane alimwi aba Farisi bakali kuliimya kulya. Aboobo bakaboola akumwaambila kuti: “Ino nkaambo nzi basikwiiya ba Johane abasikwiiya baba Farisi ncobaliimya kulya, pele basikwiiya bako tabaliimyi?”+ 19 Eelyo Jesu wakabaambila kuti: “Sena balongwe basibwiinga+ balakonzya kuliimya kulya ciindi sibwiinga nacili ambabo? Kufwumbwa kuti sibwiinga kacili ambabo tabakonzyi kuliimya pe. 20 Pele ciyoosika ciindi ncobayoonyangwa+ sibwiinga, eelyo bayooliimya kulya mubuzuba oobo. 21 Kunyina muntu uusuma cigamba camulembo mupya acisani caatala cakaindi. Ikuti wacita boobo, mulembo mupya ulakonzya kukwela cisani cakaindi, aboobo cimonko cilakomena kapati.+ 22 Alimwi kunyina muntu uubikka waini mupya munkomo zyazipaya zyakaindi. Ikuti wacita boobo, waini ulazibbosyola zipaya, eelyo waini ulatika ankomo zilanyonyooka. Pele waini mupya ubikkwa munkomo zyazipaya zipya.”
23 Lino naakali kwiinda mumyuunda yamaila mu Sabata, basikwiiya bakwe bakatalika kupulula myaangala yamaila kabayaabweenda.+ 24 Aboobo ba Farisi bakamwaambila kuti: “Bona! Ino nkaambo nzi ncobacita cintu citazumizyidwe mu Sabata?” 25 Pele wakababuzya kuti: “Sena taakwe buzuba nomwakabala ncaakacita Davida naakabula cakulya, alimwi walo abaalumi mbaakali limwi nobakafwa nzala?+ 26 Sena tiimwakabala cibalo ca Abiyatara+ silutwe wabapaizi, icaamba Davida mbwaakanjila muŋanda ya Leza akulya zinkwa zyacituuzyo* akwaabila baabo mbaakali limwi, calo citazumizyidwe kumuntu uuli woonse kulya kunze buyo lyabapaizi?”+ 27 Mpoonya wakabaambila kuti: “Sabata yakaba akaambo kamuntu+ ikutali kuti muntu wakaba akaambo ka Sabata. 28 Aboobo Mwanaamuntu ngo Mwami wa Sabata ayalo.”+