Jona
1 Ijwi lya Jehova lyakamusikila Jona*+ mwana wa Amitai kaliti: 2 “Nyamuka, koya ku Nineve,+ imunzi mupati, ukaambilizye makani aalubeta kulinguwo, nkaambo bubi bwabo ndabubona.”
3 Pele Jona wakanyamuka kuti atijile ku Tarisi kuzwa kumbele lya Jehova; eelyo wakaselemukila ku Jopa nkwaakajana bwato ibwakali kuya ku Tarisi. Aboobo wakabbadela mali aalweendo akutanta mubwato kutegwa aunke abantu bakali mubwato kuya ku Tarisi, kuzwa kumbele lya Jehova.
4 Mpoonya Jehova wakatuma guwo pati mulwizi, eelyo kwakaba mayuwe mapati kapati mulwizi cakuti bwato bwakali kuyanda kunyonyooka. 5 Basikweenzya bwato bakayoowa kapati cakuti umwi aumwi wabo wakatalika kukwiilila lugwasyo kuli leza wakwe. Alimwi bakatalika kugwisya zintu izyakali mubwato akuzisowela mulwizi kutegwa bwato buube-ube.+ Pele walo Jona wakaunkide ansi mukati mwini mwabwato, ooko nkwaakaakulandabala akutolwa aŋonzi. 6 Mupati wabasikweenzya bwato wakaunka kulinguwe akumwaambila kuti: “Nkaambo nzi ncoona? Nyamuka, ukwiilile leza wako! Ambweni Leza mwini-mwini ulatubikkila maano, eelyo tatukooloba pe.”+
7 Mpoonya bakaambauzyanya kabati: “Amuboole, tuume cisolo,+ kutegwa tuzyibe naa nguni wapa kuti tusikilwe mapenzi aaya.” Aboobo bakauma cisolo, eelyo cisolo cakamuwida Jona.+ 8 Eelyo bakamubuzya kuti: “Kotwaambila, nkaambo nzi ncitwasikilwa mapenzi aaya? Ubeleka mulimo nzi, alimwi uzwa kuli? Uzwa kucisi nzi, alimwi uli musyobo nzi?”
9 Wakabavwiila kuti: “Ndili mu Hebrayo, alimwi ndili muntu uuyoowa* Jehova Leza wakujulu, ooyo wakalenga lwizi anyika njumu.”
10 Nobakamvwa boobo, bantu aabo bakaindila kuyoowa, eelyo bakamubuzya kuti: “Ino nkaambo nzi ncoocitila boobu?” (Bantu aabo bakazyiba kuti wakali kutija kuzwa kumbele lya Jehova, mbwaanga wakalibaambilide.) 11 Aboobo bakamubuzya kuti: “Ino tukucite buti kutegwa lwizi lubatame?” Nkaambo mayuwe akali kuyaabwiindila mulwizi. 12 Wakabavwiila kuti: “Amundibweze mundiwaalile mulwizi, eelyo lwizi lulabatama; nkaambo ndilizyi kuti ndime ndapa kuti guwo eeli pati limusikile.” 13 Nokuba boobo baalumi aabo bakasoleka canguzu kukwasula bwato kutegwa babunyonene kunyika njumu, pele bakaalilwa, nkaambo mayuwe aamulwizi akaindila buya kunyamauka akulipwaya kulimbabo.
14 Aboobo bakakwiilila Jehova kabati: “Akaka twakomba, O Jehova, tutalobi akaambo kamuntu ooyu omwe! Utatupi mulandu wabulowa bwamuntu uutakwe mulandu, mbwaanga yebo, O Jehova, wacita kweelana amboyanda.” 15 Mpoonya bakabweza Jona akumuwaalila mulwizi; aboobo lwizi lwakabatama. 16 Kumane baalumi aabo bakamuyoowa kapati Jehova,+ aboobo bakatuula cipaizyo kuli Jehova akukonka zikonke.
17 Lino Jehova wakatuma muswi mupati kuti umumene Jona, aboobo Jona wakali mwida lyamuswi ooyo imazuba otatwe isyikati amasiku.+