2 Samuele
11 Lino kumatalikilo aamwaka,* ciindi bami nobaunka kuyoolwana, Davida wakatuma Joabu ababelesi bakwe alimwi ampi yabasikalumamba yabana Israyeli yoonse kuti ikanyonyoone bana Amoni akusinkilila munzi wa Raba,+ pele Davida wakasyaala mu Jerusalemu.+
2 Lino buzuba bumwi kumangolezya, Davida wakabuka abulo bwakwe akutalika kweendeenda atala aaciluli caŋanda yamwami. Kali atala aaciluli wakabona mukaintu umwi kasamba, alimwi mukaintu ooyo wakali mubotu kapati. 3 Davida wakatuma muntu kuyoobuzya kujatikizya mukaintu ooyo, eelyo wakati: “Ngu Bati-seba+ mwana wa Eliamu*+ mukaintu wa Uriya+ muna Heti.”+ 4 Mpoonya Davida wakatuma batumwa kuti bakamulete.+ Aboobo bakamuleta, eelyo wakoonana anguwe.+ (Eeci cakacitika aciindi Bati-seba naakali kulisalazya kubusofwaazi bwakwe.*)+ Kumane wakapiluka kuŋanda yakwe.
5 Lino mukaintu ooyo wakamita, eelyo wakatumya mulomo kuli Davida wakuti: “Ndilaada.” 6 Amvwe boobo Davida wakatumya mulomo kuli Joabu wakuti: “Komwaambila Uriya muna Heti kuti aboole okuno.” Aboobo Joabu wakaambila Uriya kuti aunke kuli Davida. 7 Lino naakasika Uriya, Davida wakamubuzya mbwaakali kupona Joabu abasikalumamba alimwi ankondo mboyakali kweenda. 8 Kumane Davida wakaambila Uriya kuti: “Koya kuŋanda yako ukalyookezye.”* Lino Uriya naakazwa muŋanda yamwami, wakatuminwa cipego* kuzwa kumwami. 9 Nokuba boobo Uriya wakoona kumulyango waŋanda yamwami antoomwe ababelesi basimalelaakwe boonse, tanaakaunka kuŋanda yakwe pe. 10 Aboobo Davida bakamwaambila kuti: “Uriya tanaakaunka kuŋanda yakwe.” Eelyo Davida wakaambila Uriya kuti: “Wakeenda musinzo mulamfwu, tee kayi? Ino nkaambo nzi ncootakaunkila kuŋanda yako?” 11 Uriya wakati kuli Davida: “Bbokesi lyacizuminano,+ bana Israyeli aba Juda bakkede muzivwuka, alimwi simalelaangu Joabu ababelesi bakwe bali munkambi musyokwe. Aboobo ino mebo inga ndaunka buti kuŋanda yangu kuyoolya akunywa akoona amukaintu wangu?+ Masimpe mbubonya mboli muumi, nsikonzyi kucita cintu cili boobu!”
12 Mpoonya Davida wakaambila Uriya kuti: “Kkala okuno asunu eelyo juunza ndiyookuzumizya kuunka.” Aboobo Uriya wakakkala mu Jerusalemu buzuba oobo alimwi abuzuba bwakatobela. 13 Kumane Davida wakamwiita kuti aboole kuzoolya akunywa anguwe, eelyo wakamupa kuti akolwe. Pele kumangolezya, wakaakoona abulo bwakwe ababelesi basimalelaakwe. Tanaakaunka kuŋanda yakwe pe. 14 Lino mafwumofwumo Davida wakalembela Joabu lugwalo akulupa Uriya kuti alutolelezye. 15 Aboobo mulugwalo oolo wakalemba kuti: “Amumubikke kumbele Uriya ooko nkwiilwa kapati nkondo. Mpoonya nywebo mupiluke musyule kutegwa bamujaye.”+
16 Lino Joabu naakali kulindilila munzi, wakabikka Uriya kubusena ooko nkwaakazyi kuti nkokwakali basikalumamba basinguzu. 17 Baalumi bamumunzi ooyo nobakazwa akuboola kuzoolwana Joabu, babelesi ba Davida bamwi bakafwa alimwi awalo Uriya muna Heti wakali akati kabaabo bakafwa.+ 18 Lino Joabu wakaambila Davida makani oonse aankondo. 19 Mpoonya wakalailila sikutumwa kuti: “Waakumana kwaambila mwami makani oonse aankondo, 20 ambweni mwami uyoonyema akukwaambila kuti, ‘Ino nkaambo nzi ncomwaunkila afwaafwi kapati amunzi kuyoolwana? Sena tiimwalizyi kuti balakonzya kufwusa mivwi kuzwa atala aabwaanda? 21 Ino nguni wakajaya Abimeleki+ mwana wa Jerubeseti?+ Sena tali mukaintu wakalosya mwanaankando alinguwe kuzwa atala aabwaanda cakuti wakafwa ku Tebezi? Ino nkaambo nzi nywebo ncomwakaunkila afwaafwi abwaanda?’ Mpoonya yebo ukaambe kuti, ‘Awalo mubelesi wako Uriya muna Heti wakafwa.’”
22 Aboobo mutumwa wakaunka kuyakwaambila Davida zyoonse Joabu nzyaakamutuma kuyakwaamba. 23 Mpoonya mutumwa wakaambila Davida kuti: “Baalumi babo bakatwiinda nguzu alimwi bakatusikila akutulwana musyokwe; pele twakabatandaanya kusikila kumulyango wamunzi. 24 Basimata bakali kufwusa mivwi kubabelesi bako kuzwa atala aabwaanda, aboobo babelesi bamwami bamwi bakajaigwa; alimwi mubelesi wako Uriya muna Heti awalo wakafwa.”+ 25 Mpoonya Davida wakaambila mutumwa kuti: “Mboobu mboyelede kuyoomwaambila Joabu: ‘Makani aaya atakukatazyi pe nkaambo panga lilakonzya kujaya kufwumbwa muntu. Amuulwane canguzu munzi akuunyonyoona.’+ Eelyo ukamuyumye-yumye.”
26 Lino mukaintu wa Uriya naakamvwa kuti mulumaakwe Uriya wafwa, wakatalika kumulila. 27 Mbwaakamanina buyo malila, Davida wakatuma bantu kuyoomubweza Bati-seba akumuleta kuŋanda yakwe, eelyo wakaba mukaintu wakwe+ alimwi wakamuzyalila mwana musankwa. Pele ncaakacita Davida cakabija kapati kuli* Jehova.+