Milimo
25 Aboobo nokwakainda mazuba otatwe kuzwa ciindi Fesito+ naakasika mucooko cakwe akutalika kweendelezya, wakaunka ku Jerusalemu kuzwa ku Kaisareya. 2 Mpoonya ooko basilutwe babapaizi abantu balemekwa akati kaba Juda bakamwaambila twaambo twakutamikizya Paulo.+ Aboobo bakatalika kumukombelezya Fesito 3 kabalomba kuti abagwasye kwiinda mukubatumina Paulo ku Jerusalemu. Pele bakapangene kuti bamuyubilile Paulo akumujaya munzila.+ 4 Pele Fesito wakaingula kuti Paulo wakeelede kuzumanana mu Kaisareya akuti walo lwakwe wakali afwaafwi kupiluka ooko. 5 Eelyo wakati: “Aboobo atuunke limwi abasololi akati kanu, bakamupe mulandu ikuti ncobeni kakuli cibi cili coonse ncaakacita mwaalumi ooyu.”+
6 Aboobo naakakkala akati kabo mazuba aataindi kulusele naa kkumi, wakaselemuka kuya ku Kaisareya, alimwi buzuba bwakatobela wakakkala acuuno cakubetekela akulailila kuti Paulo aletwe. 7 Lino naakasika, iba Juda ibakaboolede kuzwa ku Jerusalemu bakaima, bamuzinguluka akutalika kumupa milandu minji alimwi mipati njobatakakonzya kusinizya.+
8 Pele Paulo kalyaambilila wakati: “Kunyina cibi cili coonse ncindakacita ku Mulawo waba Juda naa kutempele nokuba kuli Kaisara.”+ 9 Fesito, kayanda kukkomaninwa aba Juda+ wakaingula Paulo kuti: “Sena uyanda kuunka ku Jerusalemu kuyoobetekelwa nkuko kumbele lyangu kujatikizya makani aaya?” 10 Pele Paulo wakati: “Ndiimvwi kumbele lyacuuno calubeta ca Kaisara, aboobo aano mpondeelede kubetekelwa. Kunyina cibi ncindakacita kuba Juda, mbubonya mbobwene ayebo. 11 Ikuti kandili sizibi ncobeni alimwi ndakacita cintu iceelede kundipa kujaigwa,+ tandikaki kufwa pe; pele ikuti milandu eeyo njobandipa baalumi aaba kaitako, kunyina muntu uujisi nguzu zyakundaaba kulimbabo kutegwa abakkomanisye. Mulandu ooyu ndilomba kuutola kuli Kaisara!”+ 12 Mpoonya Fesito naakamana kwaambaula ankamu yabasikupa lulayo, wakaingula kuti: “Mbwaanga walomba kutola mulandu wako kuli Kaisara; kuli Kaisara nkotuunke.”
13 Lino nokwakainda mazuba aali mbwaabede, mwami Agripa a Berenike bakasika ku Kaisareya kuyooswaya akwaanzya Fesito. 14 Mbokunga bakakkala ooko mazuba manji, Fesito wakaambila mwami mulandu wa Paulo, kuti:
“Kuli mwaalumi umwi ngwaakasiya muntolongo Felike, 15 alimwi nindakali ku Jerusalemu basilutwe babapaizi abaalu baba Juda bakamutamikizya twaambo+ akundilomba kuti ndimupe mulandu. 16 Pele ndakabaingula kuti tacili ciyanza cabana Roma pe ikwaaba muntu uuli woonse kuli basikumupa mulandu akaambo kakuyanda buyo kubakkomanisya, ooyo ngobapa mulandu katanalangana cantongolameso ambabo akupegwa ciindi cakulyaambilila mwini kujatikizya mulandu.+ 17 Aboobo nobakasika okuno, tiindakasowa ciindi pe, pele buzuba bwakatobela ndakakkala acuuno cakubetekela akulailila kuti mwaalumi ooyu aletwe. 18 Basikumupa mulandu nobakanyamuka, kunyina nobakamupa mulandu kujatikizya zintu zibyaabi nzyondakali kuyeeyela kuti nzyaakacita.+ 19 Bakali kukazyanya buyo anguwe kujatikizya kukomba leza+ akati kabo beni,* alimwi akujatikizya muntu umwi uutegwa Jesu iwakafwa, pele ooyo Paulo ngwaakali kwaamba kuti muumi.+ 20 Aboobo, akaambo kakuti tiindakazyi cakucita kujatikizya kukazyanya ooku, ndakamubuzya naa wakali kuyanda kuunka ku Jerusalemu kuyoobetekelwa nkuko makani aaya.+ 21 Pele Paulo naakalomba kuti abikkwe muntolongo naakacili kulindila kuyoobetekwa a Mwami Mupati,+ ndakalailila kuti akkale muntolongo kusikila ndikamutumine kuli Kaisara.”
22 Mpoonya Agripa wakaambila Fesito kuti: “Andime lwangu ndiyanda kumumvwa mwaalumi ooyo.”+ Wakati: “Uyoomumvwa juunza mabala.” 23 Aboobo, ibuzuba bwakatobela Agripa a Berenike bakaboola abulemu bupati bwabwami akunjila muŋanda imukkala baswiilila milandu antoomwe abeendelezi babasikalumamba alimwi abaalumi balemekwa kapati mumunzi; eelyo Fesito naakalailila kuti Paulo aletwe, bakamuleta. 24 Mpoonya Fesito wakati: “O Mwami Agripa anywebo nyoonse nomuli waano andiswe sunu, imwaalumi ooyu ngomubona ngonguwe ba Juda boonse ngobakandilomba ku Jerusalemu alimwi akokuno, kaboompolola kuti teelede kuti kacipona pe.+ 25 Pele ndakajana kuti kunyina mulandu ngwaakacita ngwayelede kujailwa.+ Aboobo mwaalumi ooyu lwakwe naakalomba kutola mulandu ku Mwami Mupati, ndakati cili buyo kabotu kumutumina kulinguwe. 26 Pele kujatikizya nguwe ndinyina kaambo keni-keni kakulembela Mwami wangu. Aboobo ndamuleta kumbele lyanu, ikapati kumbele lyako, O Mwami Agripa, ikutegwa lwamana lubeta oolu, ndijane cakulemba. 27 Nkaambo kulindime cilibonya kuti tacili camaano ikutumina mwaange kakunyina kupandulula milandu njapedwe.”