Isaya
13 Ngaaya makani mapati aajatikizya Babuloni+ ngaakabona Isaya+ mwana wa Amozi mucilengaano:
2 “Amwiimike cikwankwani*+ atala aacilundu cijisi mabwe aalo-alo.
Amoompolole kulimbabo, amuboobole ajanza,
Kutegwa baboole akunjila mumilyango yankumekume.
3 Ndabapa malailile bantu mbondasala.*+
Ndaita basikalumamba bangu kuti batondezye bukali bwangu,
Ibantu bangu bakondedwe kapati.
Amuswiilile! Kupyopyongana kwamami,
Kwamasi aabungene antoomwe!
Jehova wamakamu ubunganya mpi yabasikalumamba kuti balwane nkondo.+
5 Mbaabo balaboola kuzwa kucisi cakule kapati,+
Kumagolelo aamajulu,
Nkokuti Jehova azilwanyo zyabukali bwakwe,
Baboola kuzoonyonyoona nyika yoonse.+
6 Amulile, nkaambo buzuba bwa Jehova bulaafwaafwi!
Bulaboola mbuli lunyonyooko luzwa kuli Singuzuzyoonse.+
Basuntuka alimwi bamyongwa kapati,
Mbuli mukaintu uuyanda kutumbuka.
Bapwatwidana meso kabayoowede,
Masyu aabo aile kusalala pyu mbuli mulilo akaambo kakupengana mumizeezo.
9 Amubone! Buzuba bwa Jehova bulaboola,
Mbuzuba bukatazya, bwakunyema alimwi abukali bupati,
Kutegwa busandule cisi kuba cintu ciyoosya,+
Akuti bunyonyoone basizibi bali mulincico.
10 Nkaambo nyenyeezi zyakumajulu azibunga-bunga zyangawo*+
Ziyooleka kumunika;
Izuba liyoosiya mbi ciindi nolipasula,
Awalo mwezi taukamwesyi mumuni wanguwo.
Ndiyoopa kuti kulisumpula kwabantu baliinganya kumane,
Alimwi ndiyoobombya basilunya balitukumuna.+
12 Ndiyoopa kuti muntu kakatazya kujana kwiinda ngolida iisalazyidwe,+
Akuti bantu kabakatazya kujana kwiinda ngolida yaku Ofiri.+
13 Nkakaambo kaako ndiyoopa kuti julu lizungaane,
Ayalo nyika iyootenkaana akuzwa mubusena bwanjiyo+
Aakunyema Jehova wamakamu mubuzuba bwabukali bwakwe bupati.
14 Mbubonya mbuli nanja ngobavwima ambuli butanga butajisi muntu wakubuleta antoomwe,
Umwi aumwi wabo uyoojokela kubantu bakwe mwini;
Umwi aumwi wabo uyootijila kucisi cokwabo.+
15 Kufwumbwa muntu uuyoojanwa uyooyaswa,
Alimwi kufwumbwa muntu uuyoojatwa uyoojaigwa apanga.+
16 Bana babo bayoopwayaulwa kabalangilila,+
Maanda aabo ayoosaalwa,
Abalo bamakaintu babo bayoojatwa abasankwa bambi.
17 Mpaawa lino ndilababusyila ba Medi kuti babalwane,+
Balo tabakombeleli nsiliva
Alimwi ngolida tiibazwisyi moyo.
19 Lino Babuloni, ibwami bwiinda kulemekwa,*+
Ibweebesi mbobalidundila ba Kasidi,+
Uyooba mbuli minzi ya Sodoma a Gomora eliya Leza naakainyonyoona.+
Mu Arabu takasimpi tente lyakwe mulinguwe,
Alimwi taakwe mweembezi uuyakweembelela matanga aakwe mulinguwe.
21 Banyama ibakkala muzimpayuma bayoolala mulinguwe;
Maanda aabo ayoozula batumba.
22 Banyama bawuula bayoolila mungazi zyakwe,
Abamwaaba bayoolila mumaanda aakwe aabami aataliboteli.
Ciindi cakwe cilaafwaafwi, alimwi mazuba aakwe taakasumpizyigwi pe.”+