2 Bakorinto

4 Aboobo, mbwaanga tujisi mulimo ooyu ngotwakapegwa kwiinda muluse ndotwakatondezyegwa, tatulengaani pe. 2 Pele twakazileka zintu zyakusisikizya, izijazya nsoni, tatuceendi cabucenjezu nokuba kubisya jwi lya Leza pe;+ pele kwiinda mukuyiisya kasimpe twaba cikozyanyo cibotu kumanjezyeezya aabantu boonse kumbele lya Leza.+ 3 Mubwini, ikuti naa makani mabotu ngotwaambilizya alivwumbidwe, avwumbidwe kuli baabo ibanyonyoonwa, 4 ibantu batasyomi aabo leza wabweende bwazintu obuno*+ mbaaofwaazya mizeezo,+ ikutegwa utabamunikili+ mumuni wabulemu bwamakani mabotu aajatikizya Kristo, uuli ncinkozya ca Leza.+ 5 Nkaambo tatulikambauki lwesu tobeni pe, pele tukambauka Jesu Kristo kuti ngo Mwami, akuti swebo tuli bazike banu akaambo ka Jesu. 6 Nkaambo Leza nguwakaamba kuti: “Imumuni aumunike mumudima,”+ alimwi wamunika mumyoyo yesu kutegwa aimunikile+ luzyibo lwabulemu bwa Leza kuzwa kubusyu bwa Kristo.

7 Nokuba boobo, tujisi lubono+ oolu muziyobwedo zyabulongo,*+ ikutegwa kulibonye kuti nguzu zigambya iziinda zyabantu nzyotujisi nzizya Leza ikutali zyesu tobeni pe.+ 8 Tulasyanikizyigwa munzila iili yoonse, pele tatumanikidwe cakutakonzya kuputauka pe; tulizyingidwe, pele kutali cakubulila limwi aakupolela pe;*+ 9 tulapenzyegwa, pele tatulekelezyegwi pe;+ tulaumputwa ansi, pele tatunyonyooki pe.+ 10 Mumibili yesu lyoonse tulaliyumya mapenzi aalufwu ngaakapenga Jesu,+ ikutegwa buumi bwa Jesu butondezyegwe amwalo mumibili yesu. 11 Nkaambo swebo notupona, lyoonse tuli muntenda yalufwu+ akaambo ka Jesu, ikutegwa buumi bwa Jesu butondezyegwe amwalo mumibili yesu iifwa. 12 Aboobo swebo citupa kuba muntenda yalufwu lyoonse, pele nywebo eeci cimupa buumi.

13 Lino akaambo kakuti tujisi muuya walusyomo luli mbuli loolo lulembedwe mumajwi aakuti: “Ndakasyoma, aboobo ndakaambaula”;+ aswebo tulasyoma, aboobo tulaambaula, 14 mbwaanga tulizyi kuti ooyo wakabusya Jesu uyootubusya aswebo antoomwe a Jesu alimwi uyootutola antoomwe andinywe kulinguwe.+ 15 Nkaambo zintu eezyi zyoonse zilacitwa akaambo kandinywe, ikutegwa luzyalo lwa Leza lutalivwulili lwiindile kuvwula nkaambo bantu bambi banji bapa kulumba, eelyo bapa kuti Leza alemekwe.+

16 Aboobo tatulengaani pe, pele nokuba kuti buntu bwesu bwaanze buyaabunyonyooka, buntu bwesu bwamukati buyaabubukulusyigwa buzuba abuzuba. 17 Nkaambo nokuba kuti mapenzi eesu ngakaindi buyo kaniini alimwi mauba-uba, atuletela bulemu bupati kapati butakonzyi kweezyanisyigwa alimwi ibutamani;+ 18 kumwi meso eesu alanga zintu zitalibonyi ikutali zintu zilibonya.+ Nkaambo zintu zilibonya nzyakaindi kaniini buyo, pele izintu zitalibonyi tazimani pe.