Isaya
39 Aciindi eeco imwami wa Babuloni, Merodaki-baladani mwana wa Baladani, wakatuma magwalo alimwi acipego kuli Hezekiya,+ nkaambo wakamvwa kuti wakalicisidwe mpoonya lino wakayumya.+ 2 Hezekiya wakabatambula amaanza obilo* batumwa aabo akubatondezya ŋanda yakwe oomo mwaakali kuyobweda zintu ziyandisi+—nsiliva, ngolida, mafwuta aamabbona, amafwuta aambi mayandisi, zilwanyo zyakwe zyoonse alimwi azintu zyoonse izyakali muziyobwedo zyakwe. Kunyina cintu nociba comwe Hezekiya ncaatakabatondezya muŋanda* yakwe amubulelo bwakwe boonse.
3 Kumane boobo Isaya musinsimi wakaboola ku Mwami Hezekiya akumubuzya kuti: “Ino baalumi aaba baamba nzi, alimwi ino bazwa kuli?” Aboobo Hezekiya wakaingula kuti: “Bazwa kucisi cakulamfwu, ku Babuloni.”+ 4 Mpoonya wakabuzya kuti: “Ino ncinzi ncobabona muŋanda* yako?” Hezekiya wakaingula kuti: “Babona zintu zyoonse zili muŋanda* yangu. Kunyina cintu nociba comwe ncondatabatondezya muziyobwedo zyangu zyazintu ziyandisi.”
5 Mpoonya Isaya wakaambila Hezekiya kuti: “Komvwa jwi lya Jehova wamakamu, 6 ‘Bona! Mazuba ayoosika, eelyo zintu zyoonse zili muŋanda* yako azyeezyo zyoonse nzyobakayobola bamauso kusikila buzuba obuno noziyootolwa ku Babuloni. Kunyina nociba comwe ciyoosyaala,’+ mbwaamba Jehova.+ 7 ‘Alimwi bana bako bamwi mboyoolizyalila bayootolwa alimwi bayooba babelesi balemekwa muŋanda yabwami yamwami wa Babuloni.’”+
8 Mpoonya Hezekiya wakaambila Isaya kuti: “Ijwi lya Jehova ndyowaamba ndibotu.” Kumane wakayungizya kuti: “Nkaambo luumuno akuliiba* zinoociliko mumazuba aabuumi bwangu.”+