Ezekieli
19 “Yebo weelede kwiimba lwiimbo lwabuumba* lwakulila basilutwe ba Israyeli, 2 ukaambe kuti,
‘Ino banyoko bakali bani? Bakali syuumbwa muzyazi akati kabasyuumbwa.
Bakali koona akati kabasyuumbwa bacili bana-bana ibajisi nguzu alimwi bakali kukomezya bana babo.
3 Bakakomezya mwana omwe akati kabana babo, eelyo wakaba syuumbwa uujisi nguzu.+
Wakaiya kuzazaula munyama ngwaaluma,
Alimwi wakali kulya bantu.
4 Bantu bamasi bakaimvwa mpuwo yakwe akumujata mumulindi wabo,
Kumane bakamutola andobyo kucisi ca Egepita.+
5 Banyina bakalindila, eelyo bakabona kuti kunyina bulangizi bwakuti ulajoka.
Aboobo bakabweza mwanaabo umbi akumutuma kuti aunke kali syuumbwa uucili mwana uujisi nguzu.
6 Awalo wakali kweendeenda akati kabasyuumbwa alimwi wakaba syuumbwa uucili mwana uujisi nguzu.
Wakaiya kuzazaula munyama ngwaaluma, alimwi wakali kulya bantu.+
7 Wakali kubayubilila mungazi zyabo ziyumu akunyonyoona minzi yabo,
Cakuti mucisi coonse eeco icakaba matongo mwakali kumvwugwa buyo kuvwuluma kwakwe.+
8 Bantu bamasi ibazwa muzyooko zyakazingulukide bakamuboolela kuti bamuvwumbe lunsabwe lwabo,
Eelyo wakajatwa mumulindi wabo.
9 Bakamukwelela mucisekwe andobyo, akumutola kumwami wa Babuloni.
Ookuya bakamujalila, kutegwa ijwi lyakwe litalimvwisyi limbi amalundu aa Israyeli.
10 Banyoko bakali mbuli cisamu camusaansa+ mubulowa bwako,* icisimpidwe kumbali aamaanzi.
Cakazyala micelo alimwi cakajisi mitabi minji kapati akaambo kamaanzi manji.
11 Cakaba amitabi miyumu, iyeelela kuba nkoli zyabaleli.
Cakakomena akuziindilila zisamunyina,
Aboobo cakali kulibonya akaambo kakuti cakali cilamfwu alimwi akaambo kakuti cakajisi mitabi iijisi matuvwu manji.
12 Pele cakazyulwa cabukali+ akufwusilwa ansi,
Mpoonya muwo uuzwa kujwe wakapa kuti micelo yancico iyume.
Mitabi yancico miyumu yakatyokooka akuyuma,+ eelyo mulilo wakayuumpa.+
13 Lino cisimpidwe munkanda,
Munyika iitakwe maanzi iilunda kasuko.+
14 Mulilo wakayandilila kuzwa kumitabi yancico akuumpa tusyuukila twancico alimwi amicelo yancico,
Eelyo kwakanyina mutabi wancico muyumu wakasyaala, kwakabula nkoli yakubelesya kulela.+
“‘Oolu ndolwiimbo lwabuumba, alimwi lunooli lwiimbo lwabuumba.’”