Ezekieli
31 Mumwaka wa 11, mumwezi watatu, mubuzuba bwakusaanguna bwamwezi, ijwi lya Jehova lyakandisikila alimwi kaliti: 2 “Omwanaamuntu, komwaambila Farao mwami wa Egepita amakamu aakwe kuti,+
‘Ino nguni ngomweelene limwi nguzu?
3 Kwakali muna Asuri, icisamu cakkedari mu Lebano,
Eeco cakajisi mitabi mibotu iyakajisi matewo aasisinkene aapa kuti kube cimvwiide; icilamfwu kapati kuya mujulu;
Kampeleengwe kancico kakali kusika kumakumbi.
4 Maanzi akacipa kuti cikomene kapati, tusensa twamaanzi manji twakapa kuti cilampe.
Kwakali tulonga koonse-koonse kuzinguluka waawo mpocakasimpidwe;
Tugelo twangawo twakali kutilaila zisamu zyoonse zyakali musyokwe.
5 Eeci ncicakapa kuti cilampe kwiinda zisamunyina zyamusyokwe.
Mitabi yancico yakavwula akulampa
Akaambo kamaanzi manji aakali mutulonga twancico.
6 Bayuni boonse bamujulu bakayaka ziteente zyabo mumitabi yancico,
Banyama boonse bamusyokwe bakali kuzyalila munsi aamitabi yancico,
Alimwi masi oonse aajisi bantu banji akali kukkala mucimvwiide cancico.
7 Cakabota kapati alimwi mitabi yancico yakalampa,
Nkaambo miyanda yancico yakanjilide ansi mumaanzi manji.
8 Kunyina zisamu zimbi zyakkedari zyakali kukonzya kweelanisyigwa ancico mumuunda wa Leza.+
Kunyina nociba comwe cazisamu zyamulombe cakajisi mitabi mbuli yancico,
Alimwi kunyina nociba comwe cazisamu zyamupulanga cakajisi mitabi yakali kukonzya kweelanisyigwa amitabi yancico.
Kunyina cisamu cimbi mumuunda wa Leza cakali kukonzya kweelanisyigwa ancico kubota.
9 Ndakacibotya amatewo manji,
Eelyo zisamu zimbi zyoonse zyamu Edeni, imuunda wa Leza, zyakali kucifwida munyono.’
10 “Aboobo mboobu mbwaamba Mwami Singuzuzyoonse Jehova: ‘Akaambo kakuti cakalampa* kapati, akuba akampeleengwe kasika kumakumbi, alimwi akuti moyo wancico wakatalika kulisumpula akaambo kakulampa kwancico, 11 ndiyoocaaba mumaanza aamweendelezi wamasi singuzu.+ Uyoocilwana, andime ndiyoocikaka akaambo kabubi bwancico. 12 Mpoonya bamuzwakule, ibainda kuba aalunya akati kabantu bamasi, bayoocigonka akucisiya atala aamalundu, eelyo matewo aancico ayoolokela mumakkuti oonse, alimwi mitabi yancico iyoocaala kaityokede mutulonga toonse twamucisi.+ Bantu boonse bamunyika bayoozwa mucimvwiide cancico akucisiya. 13 Bayuni boonse bamujulu bayookkala acisiko cancico ciwide, abalo banyama bamusyokwe boonse bayookkala amitabi yancico.+ 14 Eeci cinooli boobu kutegwa kutakabi cisamu nociba comwe icili afwaafwi aamaanzi iciyoolampa nokuba kuba akampeleengwe kasika kumakumbi, akuti kutakabi cisamu citilailidwe kabotu iciyoolampa kusika kulingawo. Nkaambo zyoonse buyo ziyakwaabwa kulufwu, kunyika iili kunsi, antoomwe abana babantu ibaselemukila mucilindi.’*
15 “Mboobu mbwaamba Mwami Singuzuzyoonse Jehova: ‘Mubuzuba oobo mbociyooselemukila ku Cuumbwe* ndiyoopa kuti kube kulila. Aboobo, ndiyoovwumba maanzi manji akulesya tulonga twangawo kutegwa maanzi asinkilwe. Ndiyoopa kuti Lebano asiye mbi akaambo kancico, alimwi zisamu zyamusyokwe zyoonse ziyooneta. 16 Muzumo wakuwa kwancico waakulimvwisya ndiyoopa kuti masi akankame eelyo ndaakucileta ku Cuumbwe* antoomwe abaabo baselemukila mucilindi,* alimwi zisamu zyoonse zyamu Edeni,+ izisamu zibotu kapati zya Lebano, inzya zyoonse zitilailidwe kabotu, ziyakuumbulizyigwa munyika iili kunsi. 17 Baunka anguwe ku Cuumbwe,* kuli baabo bakajaigwa apanga,+ inzya antoomwe abaabo bakali kumugwasya ibakali kukkala mucimvwiide cakwe akati kamasi.’+
18 “‘Ino ncisamu nzi akati kazisamu zili mu Edeni icijisi bulemu anguzu mbuli nduwe?+ Nokuba boobo uyoowisyilwa ansi antoomwe azisamu zyamu Edeni kunyika iili kunsi. Yebo uyakoona ansi akati kabaabo batapalwidwe, aabo bakajaigwa apanga. Eeci nceciyoomucitikila Farao antoomwe amakamu aakwe,’ mbwaamba Mwami Singuzuzyoonse Jehova.”