2 Makani

11 Lino Rehoboamu mbwaakasikila buyo mu Jerusalemu, wakabunganya musyobo wa Juda alimwi amusyobo wa Benjamini,+ basikalumamba bayiisyidwe* kulwana nkondo ibali 180,000 kuti baunke kuyoolwana bana Israyeli kutegwa bapilusye bwami kuli Rehoboamu.+ 2 Mpoonya Jehova wakaambila Semaya+ muntu wa Leza mwini-mwini kuti: 3 “Komwaambila Rehoboamu mwana wa Solomoni mwami wa Juda abana Israyeli boonse ibali mu Juda a Benjamini kuti, 4 ‘Mboobu mbwaamba Jehova: “Mutaunki kuyoolwana banabokwanu. Umwi aumwi wanu aapiluke kuŋanda yakwe, nkaambo ndime ndapa kuti cicitike boobu.”’”+ Aboobo bakaswiilila jwi lya Jehova akupiluka, eelyo tiibakamulwana Jeroboamu.

5 Rehoboamu wakakkala mu Jerusalemu alimwi wakayaka minzi iikwabilidwe mu Juda. 6 Aboobo wakayaka* Betelehemu,+ Itamu, Tekowa,+ 7 Beti-zuri, Soko,+ Adulamu,+ 8 Gati,+ Maresha, Zifi,+ 9 Adoraimu, Lakisi,+ Azeka,+ 10 Zora, Aijaloni+ a Hebroni,+ minzi iikwabilidwe iyakali mu Juda a Benjamini. 11 Kuyungizya waawo, wakaayumya masena aakwabilidwe akubikka basololi mulingawo alimwi wakali kubapa zyakulya, mafwuta alimwi awaini, 12 alimwi wakapa minzi yoonse iindene-indene ntobo zipati amasumo; eelyo wakiiyumya kapati. Lino walo wakazumanana kweendelezya Juda a Benjamini.

13 Bapaizi aba Levi ibakali mu Israyeli yoonse bakaunka kuyooba kulubazu lwakwe kuzwa muzilawo zyabo zyoonse. 14 Ba Levi bakasiya macelelo azintu zyabo+ akuboola ku Juda aku Jerusalemu, nkaambo Jeroboamu abana bakwe bakabatanda kubeleka kabali bapaizi ba Jehova.+ 15 Mpoonya Jeroboamu wakalisalila bapaizi bakwe bamumasena aakukombela,+ abapaizi bamadaimona aalibonya mbuli mpongo*+ alimwi abapaizi bazikozyanyo zyaboombe mbaakapangide.+ 16 Alimwi aabo ibakazwa kumisyobo yoonse ya Israyeli ibakabikkide myoyo yabo kukuyandaula Jehova Leza wa Israyeli, bakabatobela ku Jerusalemu kuyootuula zipaizyo kuli Jehova Leza wabamausyi.+ 17 Kwamyaka yotatwe bakayumya bwami bwa Juda akuba kulubazu lwa Rehoboamu mwana wa Solomoni, nkaambo bakeenda munzila zya Davida a Solomoni myaka yotatwe.

18 Mpoonya Rehoboamu wakakwata Mahalati mwana wa Jerimoti imwana wa Davida. Mahalati wakali mwana wa Abihaili mwana wa Eliabu imwana wa Jese.+ 19 Mukuya kwaciindi wakamuzyalila bana basankwa: Jeusi, Semariya a Zahamu. 20 Kuzwa waawo, wakakwata Maaka muzyukulu wa Abisalomu.+ Mukuya kwaciindi wakamuzyalila Abija,+ Atai, Ziza a Selomiti. 21 Rehoboamu wakali kuyandisya Maaka muzyukulu wa Abisalomu kwiinda bamakaintu bakwe bambi abamwanakasuwa bakwe,+ nkaambo wakakwete bamakaintu bali 18 abamwanakasuwa bali 60, alimwi wakazyala bana basankwa bali 28 abana basimbi bali 60. 22 Aboobo Rehoboamu wakasala Abija mwana wa Maaka kuti abe silutwe akati kabanabokwabo, nkaambo wakali kuyanda kumubikka kuba mwami. 23 Nokuba boobo wakacita camaano akutuma* bana bakwe basankwa bamwi munyika yoonse ya Juda a Benjamini akuminzi yoonse iikwabilidwe,+ eelyo wakabapa zyakulya zinji akubayandawida bamakaintu banji.