1 Timoteyo
5 Utasinsi munene cabukali.+ Pele muciindi caboobo, komukombelezya mbuli bauso, balombwana mbuli banabokwanu, 2 bamakaintu bapati mbuli banyoko, basimbi mbuli bacizyi bako amoyo uusalala.
3 Kobabikkila maano* bamukabafwu ibali mbaamukabafwu ncobeni.*+ 4 Pele ikuti mukamufwu kajisi bana naa bazyukulu, aaba abasaangune kwiiya kubelekela Leza cakulyaaba muŋanda mobazwa+ akubapa nzyobeelede bazyali babo abamakaapanyina,+ nkaambo eeci ncibotu mumeso aa Leza.+ 5 Lino mukaintu mukamufwu uuli ngumukamufwu ncobeni alimwi uunyina uuli woonse uumugwasya, ulasyoma muli Leza+ alimwi ulazumanana lyoonse kukombelezya akupaila syikati amasiku.+ 6 Pele ooyo uuyandisya kukkutya zisusi zyanyama ulifwide nokuba kuti ucipona. 7 Aboobo kozumanana kupa malailile aaya kutegwa batabi akampenda kali koonse. 8 Masimpe, ikuti muntu katababambi kabotu bamukwasyi wakwe, ikapati aabo bamuŋanda yakwe, nkokuti walukaka lusyomo alimwi mubi kapati kwiinda muntu uunyina lusyomo.+
9 Mukamufwu ulakonzya kulembwa ikuti naa kajisi myaka iitaleli ku 60, iwakali kusyomeka kumulumaakwe,* 10 uujisi mpuwo mbotu kujatikizya milimo yakwe mibotu,+ ikuti naa wakali kubalanganya kabotu bana,+ wakali kusamausya beenzu,+ wakali kusanzya maulu aabasalali,+ wakali kubagwasya aabo bapengede,+ wakali munkutwe kucita milimo mibotu iili yoonse.
11 Pele kulubazu lumwi, utabalembi pe bamukabafwu bacili bana-bana, nkaambo kulombozya kwabo ikwakuba amulumi kwatalika kukazyanya a Kristo, inga bayanda buyo kukwatwa. 12 Eelyo balaba amulandu nkaambo baleka kubamba lusyomo lwabo lwakusaanguna.* 13 Aciindi nciconya bazyibila kubula zyakucita, kweendeenda mumaanda aabantu; inzya ikutali buyo kubula zyakucita, pele balaba basikuvwiya abasikunjililila twaambo tutabajatikizyi,+ kabaamba zintu nzyobateelede. 14 Aboobo, ndilombozya kuti bamukabafwu bacili bana-bana kabakwatwa,+ akuzyala bana,+ alimwi akubamba maanda aabo, ikutegwa batamupi coolwe sikukazya cakutujanina kaambo. 15 Alimwi mubwini bamwi baleya kale akutobela Saatani. 16 Ikuti kakuli mukaintu uuli woonse uusyoma uujisi basazinyina bakafwidwa balumi, abagwasye ikutegwa mbungano itabi amukuli. Mpoonya mbungano ilakonzya kugwasya bamukabafwu ncobeni.*+
17 Ibaalu beendelezya kabotu+ beelede kubonwa kuti baleelela kupegwa bulemu kapati,+ ikapati aabo ibabeleka canguzu mukukanana akuyiisya.+ 18 Nkaambo lugwalo lwaamba kuti, “Mutamwaangi kumulomo musune* ciindi nomuuma maila,”+ alimwi akuti, “Similimo uleelede kupegwa nzyaabelekela.”+ 19 Utanoozuminizyi mulandu wapegwa kumunene,* ccita kuti kakuli bumboni bupegwa abakamboni bobilo naa botatwe.+ 20 Kobasinsa+ kumeso aabantu boonse aabo ibazumanana kucita cibi,+ kutegwa bamwi boonse bacenjezyegwe.* 21 Ndakulailila canguzu kumbele lya Leza a Kristo Jesu alimwi abangelo basalidwe kuti waatobele malailile aaya kakunyina kulanga ciwa camuntu naa kusalulula.+
22 Utabindi kubikka maanza aako amuntu uuli woonse;*+ alimwi utatoli lubazu muzibi zyabamwi; kolibamba utabi abutongo buli boonse.
23 Kocileka kunywa maanzi,* pele konywa tuwaini tusyoonto akaambo kamwida mwako alimwi akuciswa-ciswa kwako.
24 Izibi zyabantu bamwi zilazyibwa abuleya, alimwi zibasololela kulubeta mpoonya aawo, pele zyabantu bambi zilalibonya mukuya kwaciindi.+ 25 Mbubonya buyo ayalo milimo mibotu ilazyibwa abuleya,+ ayalo eeyo iimbi mibotu iitalibonyi antangalala tiikonzyi kuzumanana kusiswa pe.+