Ciyubunuzyo
5 Mpoonya ndakabona bbuku lyakuvwunga mujanza lyalulyo lyayooyo uukkede acuuno cabwami+ ilyakalembedwe mukati alimwi akunze, ilyakanamatikidwe canguzu azinamatizyo zili ciloba. 2 Alimwi ndakabona mungelo singuzu kaambilizya ajwi pati kuti: “Nguni weelela kunamatula zinamatizyo zyabbuku eelyo akulivwungulula?” 3 Pele kunyina naba omwe kujulu naa anyika nokuba kunsi aanyika wakali kukonzya kulivwungulula ibbuku eelyo akubona zyakali mukati. 4 Ndakalila kapati nkaambo kwakajanika kuti kunyina wakali kweelela kulivwungulula ibbuku eelyo akubona zyakali mukati. 5 Pele umwi wabaalu wakandaambila kuti: “Koleka kulila. Bona! Syuumbwa wamusyobo wa Juda,+ imuyanda+ wa Davida,+ wazunda+ eelyo ulakonzya kunamatula zinamatizyo zili ciloba zyabbuku eelyo akulivwungulula.”
6 Mpoonya akati kacuuno cabwami azilenge zyuumi zyone alimwi aakati kabaalu+ ndakabona mwanaambelele+ wiimvwi iwakali kulibonya mbuli kuti wakalijaidwe,+ kajisi meja aali ciloba alimwi ameso aali ciloba, aayo meso aiminina myuuya ya Leza+ iili ciloba eeyo iitumidwe munyika yoonse. 7 Eelyo wakaunka akulibweza mpoonya aawo mujanza lyalulyo lyayooyo uukkede acuuno cabwami.+ 8 Lino naakalibweza bbuku eelyo, izilenge zyuumi zyone alimwi abaalu bali 24 + bakaliwaala ansi kumbele lya Mwanaambelele, alimwi umwi aumwi wakajisi kantimbwa amitiba yangolida iyakazwide tununkilizyo. (Itununkilizyo ootu twiiminina mipailo yabasalali.)+ 9 Alimwi baimba lwiimbo lupya,+ kabati: “Uleelela yebo kubweza bbuku eelyo akunamatula zinamatizyo zyandilyo, nkaambo wakalijaidwe alimwi abulowa bwako wakaulila Leza+ bantu kuzwa kumisyobo yoonse amilaka* yoonse amikowa yoonse azisi zyoonse,+ 10 alimwi wakabapa kuti babe bwami+ abapaizi kuli Leza wesu,+ eelyo bayooba bami+ ibayoolela nyika.”
11 Lino ndakabona alimwi ndakamvwa jwi lyabangelo banji bakazingulukide cuuno cabwami azilenge zyuumi zyone alimwi abaalu, alimwi mweelwe wabo wakali makumi-makumi aazyuulu alimwi azyuulu-zyuulu zyazyuulu,+ 12 alimwi bakali kwaamba ajwi pati kuti: “Mwanaambelele ooyo iwakajaidwe+ uleelela kutambula bweendelezi, lubono, busongo, nguzu, lulemeko, bulemu alimwi azilongezyo.”+
13 Alimwi ndakamvwa zilenge zyoonse zili kujulu aanyika akunsi aanyika+ alimwi amulwizi, azintu zyoonse zili mulinzizyo kazyaamba kuti: “Kuli yooyo uukkede acuuno cabwami+ aku Mwanaambelele+ akube zilongezyo alulemeko+ abulemu alimwi anguzu lyoonse mane kukabe kutamani.”+ 14 Mpoonya zilenge zyuumi zyone zyakali kwaamba kuti: “Ameni!” eelyo baalu bakaliwaala ansi akukomba.