Luka
17 Mpoonya wakaambila basikwiiya bakwe kuti: “Masimpe zilebyo zileelede kuboola. Nokuba boobo, maawe kumuntu ooyo uubelesyegwa kuti zicitike! 2 Inga cainda kubota kulinguwe ikuti waangililwa ziyo munsingo akusowelwa mulwizi kwiinda kuti alebye umwi wabaniini aaba.+ 3 Amucenjele. Ikuti munyoko wabisya, komunyemena,+ alimwi ikuti weempwa, komulekelela.+ 4 Nokuba kuti wakubisizya ziindi zili ciloba mubuzuba bomwe alimwi waboola kulinduwe ziindi zili ciloba kati, ‘Ndeempwa,’ weelede kumulekelela.”+
5 Lino baapostolo bakaambila Mwami kuti: “Kotuyungizyila lusyomo.”+ 6 Mpoonya Mwami wakati: “Nomwalijisi lusyomo lweelene anseke yamusitada, nomwali kukonzya kwaambila mulubbeni ooyu kuti, ‘Zyuka aawa ukasimpwe mulwizi!’ Eelyo inga wamumvwida.+
7 “Nguni wanu uujisi muzike uulima naa weembela mbelele ampongo uunga aboola kuzwa kumuunda ulamwaambila kuti, ‘Fwambaana boola kuno ukkale akulya’? 8 Muciindi caboobo, sena takamwaambili kuti, ‘Kondibambila cilalilo, alimwi sama kalembo kakukutaukila undibelekele kusikila ndimanizye kulya akunywa, eelyo ndamana ayebo inga walya akunywa’? 9 Sena uyoomulumba muzike ooyo akaambo kakuti wakacita ncaakalaililwa? Nsisyomi oobo pe. 10 Mbubonya buyo andinywe, mwamana kucita zintu zyoonse nzyomwalaililwa, amwaambe kuti: ‘Tuli bazike buyo. Twacita nzyotweelede kucita.’”+
11 Alimwi naakali kuya ku Jerusalemu, wakainda akati ka Samariya a Galilaya. 12 Eelyo naakali kunjila mumunzi umwi, basicinsenda bali kkumi bakamuyaanya, pele bakaimina alaale.+ 13 Bakoompolola akwaamba kuti: “Jesu, O Mwiiyi, tufwide luse!” 14 Naakababona, wakabaambila kuti: “Kamuya mukalitondezye kubapaizi.”+ Mpoonya nobakali kuunka, bakasalazyigwa.+ 15 Umwi akati kabo naakabona kuti waponesyegwa, wakapiluka katembaula Leza ajwi pati. 16 Eelyo wakavwuntama kumaulu aa Jesu, wamulumba. Lino muntu ooyu wakali mu Samariya.+ 17 Mpoonya Jesu wakabuzya kuti: “Sena tiibali kkumi basalazyigwa? Aboobo, ino bamwi bali fwuka bali kuli? 18 Sena kunyina umbi wapiluka kuzootembaula Leza ccita buyo muntu ooyu wamasi?” 19 Mpoonya Jesu wakati kulinguwe: “Nyamuka uunke; lusyomo lwako lwakuponya.”+
20 Ba Farisi nibakamubuzya kuti naa Bwami bwa Leza buyakuboola lili,+ wakabaingula kuti: “Bwami bwa Leza tabukabooli munzila iilibonya kubantu boonse; 21 alimwi bantu kunyina nobayakwaamba kuti, ‘Amulange okuno!’ naa ‘Okuya!’ Nkaambo amubone! Bwami bwa Leza buli akati kanu.”+
22 Mpoonya wakaambila basikwiiya bakwe kuti: “Ayoosika mazuba nomuyoolombozya kubona bumwi bwamazuba aa Mwanaamuntu, pele tamukabuboni. 23 Alimwi bantu bayoomwaambila kuti, ‘Amulange okuya!’ naa ‘Amulange okuno!’ Mutakaunki nokuba kubatandila.+ 24 Nkaambo mbubonya mbuli lulabo mbolumweka kuzwa kubbazu limwi lyajulu kusikila kubbazu limbi, oobo mbwayooba awalo Mwanaamuntu+ mubuzuba bwakwe.+ 25 Pele kusaanguna weelede kwiinda mumapenzi manji akukakwa azyalani eeli.+ 26 Kuyungizya waawo, mbubonya mbocakacitika kumazuba aa Nowa,+ mbokuyooba oobo kumazuba aa Mwanaamuntu:+ 27 bakali kulya, bakali kunywa, basankwa bakali kukwata, basimbi bakali kukwasyigwa, kusikila buzuba oobo Nowa naakanjila mubwato,+ eelyo Zambangulwe lyakasika akubanyonyoona boonse.+ 28 Ncimwi buyo, mbubonya mbocakacitika kumazuba aa Loti:+ bakali kulya, bakali kunywa, bakali kuula, bakali kusambala, bakali kusyanga, bakali kuyaka. 29 Pele ibuzuba Loti naakazwa mu Sodoma, kwakaloka mulilo asulufa kuzwa kujulu akubanyonyoona boonse.+ 30 Mbokuyooba mubuzuba oobo Mwanaamuntu aakuyubununwa.+
31 “Ibuzuba oobo muntu uuli aciluli caŋanda pele zintu zyakwe kazili muŋanda atakaseluki kuti azibweze, mbubonya buyo imuntu uuli mumuunda atakapilukili zintu zili musyule. 32 Amuyeeye muka Loti.+ 33 Kufwumbwa uusoleka kukwabilila buumi bwakwe uyoobusweekelwa, pele kufwumbwa uusweekelwa buumi bwakwe uyoobuyobola.+ 34 Ndimwaambila kuti, imasiku aayo bantu bobilo banoolede abulo bomwe; omwe uyootolwa pele umwi uyoosiigwa.+ 35 Kunooli bamakaintu bobilo ibaziya aziyo lyomwe; omwe uyootolwa pele umwi uyoosiigwa.” 36 *— 37 Aboobo mukumwiingula bakamubuzya kuti: “Ikuli O Mwami?” Wakabaambila kuti: “Ikuli mutunta, nkukonya ooko nkobayoobungana basikwaze.”+