Matayo
21 Lino nobakaswena afwaafwi a Jerusalemu akusika ku Betefage aa Cilundu ca Maolifa, Jesu wakatuma basikwiiya bobilo+ 2 akubaambila kuti: “Kamuya mumunzi uulya uulibonya, eelyo muyoojana mbongolo yaangidwe antoomwe amwana wanjiyo. Mukazyaangunune akuzileta kulindime. 3 Ikuti umwi amubuzye, mumwaambile kuti, ‘Mwami ulaziyanda.’ Ndilyonya uyoomupa.”
4 Eeci cakacitika kutegwa azuzikizyigwe majwi aakaambwa kwiinda mumusinsimi iwakaamba kuti: 5 “Amumwaambile mwana musimbi wa Ziyoni kuti: ‘Bona! Mwami wako uboola kulinduwe,+ mubombe moyo+ alimwi utantide ambongolo, inzya utantide amwana wambongolo, mwana wamunyama uunyamuna ntundu.’”+
6 Aboobo basikwiiya bakaunka akucita mbubonya Jesu mbwaakabalailila.+ 7 Bakaileta mbongolo amwana wanjiyo, eelyo bakabikka zisani zyabo zyaatala alinzizyo, mpoonya wakakkala azisani izyakali amwana wambongolo.+ 8 Bunji bwabantu bakayala zisani zyabo zyaatala munzila,+ kakuli bamwi bakatalika kutema tutabi kuzwa kuzisamu akutuyala munzila. 9 Kuyungizya waawo, makamu aabantu aakali kumbele lyakwe ayaayo aakali kumutobela akazumanana koongolola kuti: “Amumufwutule Mwana wa Davida!+ Ulilelekedwe ooyo uuboola muzina lya Jehova!*+ Amumufwutule nywebo nomuli kujulu lyamajulu!”+
10 Lino naakanjila mumunzi wa Jerusalemu, bantu boonse mumunzi bakabilingana kabaamba kuti: “Ino nguni ooyu?” 11 Makamu aabantu akali kwaamba kuti: “Ooyu ngomusinsimi Jesu,+ uuzwa ku Nazareta mu Galilaya!”
12 Mpoonya Jesu wakanjila mutempele akubatandila anze boonse aabo ibakali kusambala akuula mutempele, alimwi wakatingamuna matebulu aabasikucinca mali azyuuno zyabaabo ibakali kusambala nkwilimba.+ 13 Alimwi wakabaambila kuti: “Kulilembedwe kuti, ‘Ŋanda yangu inakwiitwa kuti niŋanda yakukombela,’+ pele nywebo mwaicita kuba ciyubilo cababbi.”+ 14 Alimwi boofwu abalema bakaboola kulinguwe mutempele, eelyo wakabaponya.
15 Basilutwe babapaizi abalembi nobakabona zintu zigambya nzyaakacita, alimwi abalombe bakali koongolola mutempele kuti, “Amumufwutule Mwana wa Davida!”+ bakanyema+ 16 akumwaambila kuti: “Sena ulimvwide ncobaamba aaba?” Jesu wakabaambila kuti: “Inzya. Sena tiimwakabala kuti, ‘Yebo wapa kuti milomo yabana baniini abavwanda ikutembaule’?”+ 17 Naakabasiya, wakazwa mumunzi akuya ku Betaniya akuyakoonena nkuko.+
18 Naakali kujokela kumunzi mafwumofwumo, wakafwa nzala.+ 19 Mpoonya wakabona mukuyu mumbali aanzila, eelyo wakaunka kulinguwo, pele kunyina mucelo ngwaakajana kunze lyamatuvwu,+ aboobo wakawaambila kuti: “Kutabi mucelo uuyoozyalwa kabili kulinduwe.”+ Aboobo mukuyu wakayuma ndilyonya. 20 Basikwiiya nobakabona boobo, bakagambwa akwaamba kuti: “Ino wayuma buti mukuyu ndilyonya?”+ 21 Mukwiingula Jesu wakati kulimbabo: “Ncobeni ndimwaambila kuti, ikuti kamujisi lusyomo alimwi kamutadooneki, tamukaciti buyo ncondacita kumukuyu ooyu, pele nokuba kuti mwaambila cilundu eeci kuti, ‘Zyuka aawa uliwaale mulwizi,’ ciyoocitika.+ 22 Alimwi zintu zyoonse nzyomulomba mumupailo kamujisi lusyomo, muyoozitambula.”+
23 Naakanjila mutempele, basilutwe babapaizi abaalu akati kabantu bakaboola kulinguwe ciindi naakali kuyiisya akumubuzya kuti: “Ino nkuli nkookajana nguzu zyakucita zintu eezyi? Alimwi nguni wakakupa nguzu eezyi?”+ 24 Mukwiingula Jesu wakabaambila kuti: “Andime ndilamubuzya mubuzyo omwe. Ikuti mundaambile, nkokuti andime ndilamwaambila wakandipa nguzu zyakucita zintu eezyi: 25 Ino lubbapatizyo lwa Johane lwakazwa kuli? Sena lwakazwa kujulu naa kubantu?” Pele bakatalika kulyaambauzya mulicabo kabati: “Ikuti twaambe kuti, ‘Lwakazwa kujulu,’ ulaamba kuti, ‘Ino nkaambo nzi ncomwatakamusyoma?’+ 26 Pele ikuti twaambe kuti, ‘Lwakazwa kubantu,’ kuli nkamu yabantu njotuyoowa, nkaambo boonse Johane bamubona kuti musinsimi.” 27 Aboobo Jesu bakamuvwiila kuti: “Tatuzyi pe.” Awalo wakabaambila kuti: “Andime tandikoomwaambila nkundakazijana nguzu zyakucita zintu eezyi.
28 “Ino muyeeya buti? Muntu umwi wakajisi bana bobilo. Mpoonya wakaunka kuli wakusaanguna akumwaambila kuti, ‘Mwanaangu, koya ukabeleke sunu mumuunda wamisaansa.’ 29 Mukwiingula ooyu wakati, ‘Ndakaka,’ pele musyule, wakaliyeeya eelyo wakaunka. 30 Mpoonya wakaunka kuli wabili akumwaambila mbubonya. Ooyu wakavwiila kuti, ‘Inzya taata, ndilaunka,’ pele tanaakaunka. 31 Ino nguli akati kabaaba bobilo iwakacita ncibayanda bausyi?” Bakati: “Wakusaanguna.” Aboobo Jesu wakabaambila kuti: “Ncobeni ndimwaambila kuti, basimutelo abavwuule bamwiindila kunjila mu Bwami bwa Leza. 32 Nkaambo Johane wakaboola kulindinywe munzila yabululami, pele tiimwakamusyoma. Nokuba boobo, basimutelo abavwuule bakamusyoma,+ alimwi nywebo nokuba kuti mwakacibona eeci, tiimwakaliyeeya musyule kutegwa mumusyome.
33 “Amuswiilile cikozyanyo acimbi: Kwakali muntu umwi, mukamwini nyika, iwakalima muunda wamisaansa+ akuuyakila lubaya alimwi akusya mwakukandila misaansa mumuunda alimwi wakayaka ngazi;+ mpoonya muunda wakausiya mumaanza aabalimi akuunka kucisi cimbi.+ 34 Nocakasika ciindi micelo niibizwa, wakatuma bazike bakwe kubalimi kuti bakabweze micelo yakwe. 35 Pele balimi bakajata bazike bakwe, eelyo omwe bakamuuma, umwi bakamujaya mpoonya umwi bakamupwaya mabwe.+ 36 Alimwi wakatuma bazike bamwi banji kwiinda bakusaanguna, pele bakacita mbubonya akuli baaba.+ 37 Mpoonya kumamanino wakabatumina mwanaakwe, kayeeya kuti, ‘Bayoomulemeka mwanaangu.’ 38 Nobakamubona mwana, balimi bakalyaambauzya kuti, ‘Ooyu ngosikukona.+ Amuboole tumujaye akubweza lukono lwakwe!’ 39 Aboobo bakamujata akumusowela kunze aamuunda wamisaansa akumujaya.+ 40 Lino mukamwini muunda wamisaansa aakuboola, ncinzi ncayoobacita balimi aabo?” 41 Bakati kulinguwe: “Akaambo kakuti mbabi, uyooleta lunyonyooko lutaambiki* kulimbabo amane muunda wamisaansa uyakuusiya mumaanza aabalimi bambi balo ibayoomupa micelo ciindi yaakubizwa.”
42 Jesu wakati kulimbabo: “Sena tiimwakabala mu Magwalo kuti, ‘Ibbwe ndibakakaka bayaki lyaba bbwe liyandika kapati lyakukkona.*+ Ngu Jehova* wapa kuti cibe boobu alimwi ncibotu kapati mumeso eesu’?+ 43 Nkakaambo kaako ndimwaambila kuti, nywebo muyoonyangwa Bwami bwa Leza eelyo buyoopegwa cisi cizyala micelo yambubo. 44 Alimwi muntu uuwida abbwe eeli uyootyolooka.+ Alimwi kufwumbwa ngoliwida, liyoomufwanyauna.”+
45 Basilutwe babapaizi alimwi aba Farisi nobakamvwa zikozyanyo zyakwe, bakazyiba kuti wakali kwaamba mbabo.+ 46 Nokuba kuti bakali kuyanda kumujata,* bakayoowa makamu aabantu, nkaambo aaba bakali kumubona kuti musinsimi.+