Jeremiya
50 Ndeeli jwi Jehova ndyaakaamba kujatikizya Babuloni,+ kujatikizya cisi caba Kasidi, kwiinda muli Jeremiya musinsimi:
2 “Amuluule akwaambilizya makani akati kamasi.
Amwiimike cikwankwani* alimwi amwaambilizye makani.
Mutasisi cintu cili coonse!
Amwaambe kuti, ‘Babuloni wazundwa.+
Beli wausyigwa nsoni.+
Merodaki wayoowa.
Zikozyanyo zyakwe zyausyigwa nsoni.
Mituni yakwe iisesemya* yayoowa.’
3 Nkaambo cisi caboola kuzwa kunyika kuzoomulwana.+
Ncencico cipa kuti cisi cakwe cibe cintu cigambya;
Kunyina muntu naba omwe uukkala mulinguwe.
Boonse bobilo, muntu amunyama batija;
Baunka, tabaciko pe.”
4 “Mumazuba aayo alimwi akuciindi eeco,” mbwaamba Jehova, “bana Israyeli alimwi abana Juda bayooboola antoomwe.+ Bayakweenda kumwi kabalila,+ alimwi bayoomuyandaula Jehova Leza wabo antoomwe.+ 5 Bayoobuzya nzila iitozya ku Ziyoni, kumwi masyu aabo kaalangide nkuko,+ akwaamba kuti, ‘Amuboole tulikumbatizye kuli Jehova mucizuminano citamani icitakalubwi.’+ 6 Bantu bangu baba butanga bwambelele zisweekede.+ Beembezi banzizyo mbabazipa kuleya.+ Bazitola atala aazilundu, zyaingaila kuzwa aacilundu kuya kukalundu. Zyaluba busena bwanzizyo bwakulyookezyela. 7 Aabo boonse bazijana bazilya,+ alimwi balwani banzizyo baamba kuti, ‘Tatujisi mulandu pe, akaambo kakuti zyalo zyakabisyila Jehova, cikkalilo cabululami alimwi abulangizi bwabamausyi, nkokuti Jehova.’”
9 Nkaambo amubone Babuloni ndilamubusyila akumuletela
Nkamu yamasi mapati kuzwa kucisi cakunyika.+
Bayoomuboolela kabali mumindando;
Mpoonya uyoozundwa.
Mivwi yabo ili mbuli mivwi yasikalumamba
Eeyo iipa bazyali kusweekelwa bana;+
Tabapiluki cinkwamaanza pe.
10 Cisi caba Kasidi ciyoosaalwa.+
Boonse aabo bacisaala bayoocita oobo mane bakakkutile,”+ mbwaamba Jehova.
11 “Nkaambo nywebo mwakazumanana kukondwa,+ mwakazumanana kusekelela
Ciindi nomwakali kusaala lukono lwangu.+
Nkaambo mwakaluujisi kutambala mbuli mpwizi iitanazyede iisotauka mumweemvwe,
Alimwi mwakaluujisi kubebezya mbuli mabbiza meenze.
12 Banyoko bausyigwa nsoni.+
Aabo ibakamuzyala batyompwa.
Amubone! Baba cisi ciinda kubula mulimo akati kamasi,
Ninkanda iinyina maanzi alimwi ncimpayuma.+
Muntu woonse wiinda kumbali aa Babuloni uyoolanga cakulamwa
Akusiba mulosi akaambo kamapenzi aanguwo oonse.+
14 Amuboole kuzwa kumabazu oonse muzoolwane Babuloni kamuli mumindando,
Nywebo nyoonse nomoongomeka* buta.
15 Amumoongololele loongololo lwankondo mumabazu oonse.
Watama.*
Amumusubule.
Amumucitile mbubonya mbwaakacita awalo.+
Akaambo kapanga lyasikupenzya, umwi aumwi wabo uyoopiluka kubantu bakwe mwini,
Umwi aumwi wabo uyootijila kucisi cokwabo.+
17 “Bana Israyeli nimbelele zimwaikide.+ Basyuumbwa bazimwaya.+ Ciindi cakusaanguna, mwami wa Asuri wakazilya;+ kumane Mwami Nebukadinezara* wa Babuloni wakapulukuta mafwuwa aanzizyo.+ 18 Aboobo mboobu mbwaamba Jehova wamakamu, Leza wa Israyeli: ‘Amubone ndilasubula mwami wa Babuloni acisi cakwe mbubonya mbondakasubula mwami wa Asuri.+ 19 Ndiyoojola Israyeli kumacelelo aakwe,+ eelyo uyoocelela mu Karimeli amu Basani,+ alimwi uyookkuta mumalundu aa Efraimu+ alimwi aa Gileadi.’”+
20 “Mumazuba aayo alimwi akuciindi eeco,” mbwaamba Jehova,
“Milandu ya Israyeli iyooyandaulwa,
Pele taikabiko pe,
Azyalo zibi zya Juda tazikajaniki pe,
Nkaambo ndiyoobalekelela aabo mbondiyoosiya.”+
21 “Kamuya mukalwane cisi ca Merataimu alimwi abantu bakkala mu Pekodi.+
Abajaigwe akunyonyoonwa cakumaninina,”* mbwaamba Jehova.
“Amucite zintu zyoonse nzyendamulailila.
22 Kwamvwugwa kuyobeka kwankondo mucisi,
Lunyonyooko lupati.
23 Eelo kaka nsando yanyika yoonse yagonkwa alimwi yatyoka!+
Eelo kaka Babuloni waba buyo cintu cigambya akati kamasi!+
24 Ndakuteya kakole eelyo wacegwa, O Babuloni,
Alimwi kunyina ncookazyi pe.
Wakajanwa akujatwa,+
Nkaambo ngu Jehova ngookali kukazya.
25 Jehova wajalula ciyobwedo cakwe,
Eelyo wagwisya zilwanyo zyabukali bwakwe.+
Nkaambo Mwami Singuzuzyoonse, Jehova wamakamu, ujisi mulimo
Mucisi caba Kasidi.
26 Amuboole muzoomulwane kuzwa kumasena aakulamfwu.+
Amujalule matala aakwe.+
Amumulundike mbuli zilwi zyamaila.
Amumunyonyoone cakumaninina.*+
Atabi limbi amuntu naba omwe uusyaala mulinguwe.
27 Amujaye bapoho bakwe boonse bacili bana-bana;+
Abatolwe kukujaigwa.
Maawe kulimbabo, nkaambo buzuba bwabo bwasika,
Iciindi cabo cakuti basubulwe!
28 Kuli kuyobeka kwabaabo batija,
Aabo baloboka mucisi ca Babuloni,
Kutegwa mu Ziyoni bakaambilizye cisubulo ncatiipe Jehova Leza wesu,
Icisubulo ncatiipe akaambo katempele lyakwe.+
Amuyake zilawo kumuzinguluka koonse-koonse; kutabi muntu naba omwe uutija.
Amumusubule kweelana amilimo yakwe.+
Amumucitile kweelana azintu nzyaakacita walo.+
Nkaambo walisumpula kuli Jehova,
Walisumpula kuli Uusalala wa Israyeli.+
30 Aboobo balombwana bakwe bayakuwa mumabuwa aakwe aabuleya,+
Abalo basikalumamba bakwe boonse bayoonyonyoonwa* mubuzuba oobo,” mbwaamba Jehova.
31 “Bona! Ndilwana nduwe,+ yebo sikunyansya,”+ mbwaamba Mwami Singuzuzyoonse, Jehova wamakamu,
“Nkaambo buzuba bwako buyoosika, inzya ciindi nendiyookusubula.
32 Yebo sikunyansya uyoolebwa akuwa,
Takukabi muntu naba omwe uuyookubusya.+
Alimwi minzi yako ndiyakwiidoneka mulilo,
Eelyo uyakuumpa zintu zyoonse zikuzingulukide.”
33 Mboobu mbwaamba Jehova wamakamu:
“Bana Israyeli alimwi abana Juda baladyaamininwa,
Alimwi boonse aabo babaangide balibajisi.+
Bakaka kubalekezya.+
34 Pele Munununi wabo ngusinguzu,+
Jehova wamakamu ndezina lyakwe.+
Ziyume zitete uyoobabetekela kaambo kabo,+
Ikutegwa akaipe kulyookezya nyika+
Akuti akanyonganye bantu bakkala mu Babuloni.”+
35 “Kuli panga lyasikila ba Kasidi,” mbwaamba Jehova,
“Lyasikila bantu bakkala mu Babuloni, abasilutwe bakwe alimwi abantu bakwe basongo.+
36 Kuli panga lyasikila basikulabalika,* eelyo bayoocita zintu cabufwubafwuba.
Kuli panga lyasikila basikalumamba bakwe, eelyo bayakuyoowa.+
37 Kuli panga lyasikila mabbiza aabo, ankalaki zyabo zyankondo,
Alimwi abantu bamisyobo-misyobo ibali akati kakwe,
Eelyo bayooba buyo mbuli bamakaintu.+
Kuli panga lyasikila lubono lwakwe, eelyo luyoosaalwa.+
38 Kuli lunyonyooko ilwasikila maanzi aakwe, aboobo ayakuyuminina.+
Nkaambo ncisi cazikozyanyo zibezedwe,+
Alimwi akaambo kazilengaano zyabo ziyoosya, bazumanana kucita mbuli bantu basondokede.
39 Aboobo zilenge zyamunkanda zinookkala abanyama bawuula,
Azyalo mpowani zinookkala mulinguwe.+
Kunyina bantu nobayookkala kabili mulinguwe,
Alimwi takabi limbi busena bwakukkala mumazyalani oonse.”+
40 “Mbubonya mbocakabede Leza naakanyonyoona Sodoma a Gomora+ antoomwe aminzi yakeengelede,”+ mbwaamba Jehova, “kunyina muntu uuyookkala ooko, alimwi kunyina muntu uuyooyaka munzi ooko.+
41 Amubone! Kuli bantu baboola kuzwa kunyika;
Cisi cipati alimwi abami bapati+ bayoobusyigwa
Kuzwa kumagolelo aanyika.+
42 Babelesya mata amasumo.+
Mbaasilunya alimwi tabakabi alubomba.+
Muzumo wabo uli mbuli lwizi luvwuuma,+
Nibatantide mabbiza aabo.
Kabakamantene,* baleenda mumindando kuti bakulwane yebo, omwana musimbi wa Babuloni.+
Mapenzi alimujisi,
Macise alimujisi mbuli aamukaintu uutumbuka.
44 “Amubone! Muntu uyooboola kuzoonyonyoona macelelo aakwabilidwe mbubonya mbuli syuumbwa uuzwa muzyoonde zisisinkene izili kumbali aa Jordano, pele mukulaba buyo kwaliso ndiyoobapa kutija kuzwa kulinguwe. Eelyo ndiyoomubikkila muntu uusalidwe kuti amweendelezye.+ Nkaambo ino nguni uuli mbuli ndime, nguni uunga wandikazya? Ino mweembezi nzi uunga waima kumbele lyangu? + 45 Aboobo nywebo nobantu, amumvwe makanze* ngajisi Jehova aakulwana Babuloni,+ amizeezo njajisi yakulwana cisi caba Kasidi.
Ncobeni bana babutanga bwambelele bayookwelwa.
Uyoopa kuti busena bwabo bwakukkala bunyonyoonwe akaambo kambabo.+
46 Nyika iyoozungaana akaambo kakuyobeka ciindi Babuloni aakujatwa,
Alimwi kulila kuyoomvwika akati kamasi.”+