Jobu
13 “Masimpe, eezyi zyoonse ndazibona ameso aangu,
Ndazimvwa amatwi aangu akuzimvwisya.
2 Nzyomuzyi nywebo, andime ndilizizyi;
Tamundiindi pe.
3 Mebo inga ndayanda kwaambaula a Singuzuzyoonse lwakwe kumugama;
Ndiyanda kusalazyanya twaambo a Leza.+
4 Pele nywebo mwaamba zyakubeja kujatikizya ndime;
Nyoonse buyo muli basilisi babuyo.+
5 Eelo kaka nicabota ikuti nimwaumuna buyo,
Aboobo nimwalibonya kuti muli basongo.+
6 Lino amumvwe twaambo twangu andime,
Alimwi amuswiililisye majwi aakukombelezya aazwa kumulomo wangu.
7 Sena nywebo mulaambilila Leza zintu zitaluleme,
Alimwi sena mulamwaambilila zintu zyakubeja?
8 Sena mulamuvwuninina,*
Alimwi sena mulaiminina Leza mwini-mwini mulubeta?
9 Sena inga cabota kuti walo wamulingula?+
Sena mulamucenga mbuli mbomucenga muntu uulya maila?
10 Ncobeni nywebo ulamusinsa
Ikuti cakusisikizya kamusoleka kusalulula.+
11 Sena bulemu bwakwe tabukoomuyoosya
Alimwi sena tamukooba abukandu akaambo kanguwe?
12 Majwi aanu aabusongo* ali mbuli tusimpi twabuyo mbubonya mbuli mulota;
Zilikwabilizyo zyanu zipwayika buyo mbubonya mbuli zilikwabilizyo zyabulongo.
13 Amuumune wi kumbele lyangu, kutegwa ndaambaule.
Mpoonya acindicitikile kufwumbwa naa ncinzi eeco!
14 Ino nkaambo nzi ncendilibikka muntenda
Akunyamuna buumi bwangu mumaanza?*
16 Mpoonya inga waba mufwutuli wangu,+
Nkaambo kunyina muntu uutayoowi Leza* uukonzya kuboola akwiima kumbele lyakwe.+
17 Amuswiililisye majwi aangu;
Amubikkile maano kuzintu nzyendaamba.
18 Amubone ndaleta kaambo kangu aalubeta;
Ndilizyi kuti mebo ndililuzi.
19 Ino nguni utiikazyanye andime?
Inga ndafwa ikuti naa ndaumuna buyo!*
20 O Leza, kondipa buyo zintu zyobilo,*
Kutegwa nditakuyubi:
21 Bikka janza lyako lilemu ikule andime,
Alimwi kuyoosya kwako kutandikongi pe.+
22 Koita mpoonya mebo ndikuvwiile;
Naa koleka mebo ndaambe mpoonya yebo undiingule.
23 Ino ndijisi milandu azibi nzi?
Kondaambila nsotoko yangu acibi cangu.
25 Sena unakuujisi kukonga tuvwu lipepululwa amuwo
Naa kutandaanya bwizu buyo bwakayuma?
26 Nkaambo uluujisi kundilembela twaambo tubyaabi twakundipa milandu,
Alimwi undipa mulandu wazibi nzindakacita kubwana.
27 Wabikka maulu aangu muziliba,
Ulalingula nzila zyangu zyoonse,
Alimwi ulatobelezya mikondo yamaulu aangu yoonse.
28 Aboobo muntu* ulafwunzauka mbuli cintu cibolede,
Mbuli cisani caligwa ankoonkolekwa zyamasiku.