Jobu
40 Eelyo Jehova wakati:
2 “Sena muntu uuyandawida bamwi tumpenda weelede kukazyanya a Singuzuzyoonse?+
Ooyo uuyanda kusinsa Leza aavwiile.”+
3 Mpoonya Jobu wakaingula Jehova kuti:
4 “Bona! Mebo tandeeleli pe.+
Ino inga ndakuvwiila buti?
Ndasinka mulomo+ wangu ajanza lyangu.
5 Ndaamba kale ciindi comwe, eelyo tandikoovwiila limbi pe;
Alimwi ndaamba lwabili, pele taakwe cimbi ncendikonzya kwaamba.”
6 Eelyo Jehova wakavwiila Jobu kuzwa muguwo+ kati:
7 “Kolibambila mbuli mwaalumi;
Ndilakubuzya, mpoonya yebo undivwiile.+
8 Sena uyanda kupa kuti bululami bwangu budoonekwe?*
Sena mebo ulandipa mulandu kutegwa yebo ululame?+
9 Sena yebo ujisi janza lyanguzu mbuli lya Leza mwini-mwini,+
Alimwi sena jwi lyako lilakonzya kuzuma mbuli lyakwe?+
10 Kolisakatizya bulemu abupati;
Kolisamika bwami abweebesi.
11 Kotondezya bukali bwakunyema kwako;
Komulanga muntu woonse uulisumpula, umufwiinsye.
12 Komulanga muntu woonse uulisumpula, umucesye,
Alimwi kobalyatauka babi aawo mpoonya mpobabede.
13 Kobasisa boonse mubulongo;
Kobaanga* mubusena bwamudima,
14 Eelyo mebo ndilasinizya kulinduwe*
Kuti janza lyako lyalulyo lilakonzya kukufwutula.
15 Lino ngooyu civwubwe* ooyo ngondakapanga mbubonya mbondakakupanga yebo.
Walo ulalya bwizu mbubonya mbuli ŋombe.
16 Langa nguzu izili mutusolo twakwe
Alimwi anguzu izili mumilambi yada lyakwe!
17 Ulayumya mucila wakwe mbuli cisamu cakkedari;
Milambi yazibelo zyakwe ilinjilene.
18 Zifwuwa zyakwe zili mbuli mipaipi yamukuba;
Maulu aakwe ali mbuli mingwala yabutale.
19 Ngomatalikilo akati kamilimo ya Leza;
Alikke Mulengi wakwe nguukonzya kumuunkila apanga lyakwe.
20 Nkaambo malundu alamupa cakulya cakwe,
Aawo mpobasobanina banyama boonse bamusyokwe.
21 Uloona kunsi aampana,
Mubusena bwakuyusila mumatete aamumatoolo.
22 Mpana zilamuvwumba acimvwiide canzizyo,
Azyalo zisamu zyamizimbwa zyamukkuti* zilamuzinguluka.
23 Ikuti mulonga wapaya, tayoowi pe.
Ngusicamba nokuba kuti maanzi aamumulonga wa Jordano+ amupwaya kubusyu bwakwe.
24 Sena kuli muntu uukonzya kumuca kalangilila,
Naa kudonkola mpemo yakwe akalobyo?*