2 Makani
33 Manase+ wakali amyaka iili 12 naakaba mwami, alimwi wakalela myaka iili 55 mu Jerusalemu.+
2 Wakacita zibi mumeso aa Jehova akutobela zilengwa zisesemya nzyobakali kucita bamasi aabo Jehova mbaakatanda kubusyu bwabana Israyeli.+ 3 Wakayakulula masena aakukombela aayo Hezekiya usyi ngaakamwayide,+ wakayaka zipaililo zyaba Baala akupanga misemu yazisamu yakukomba,* alimwi wakali kukotamina makamu oonse aakujulu akwaakomba.+ 4 Alimwi wakayaka zipaililo muŋanda ya Jehova,+ eeyo Jehova njaakaamba kuti: “Mu Jerusalemu molinoobede zina lyangu mane kukabe kutamani.”+ 5 Mpoonya wakayaka zipaililo zyamakamu oonse aakujulu mumabbuwa obilo aaŋanda ya Jehova.+ 6 Wakaumpa* bana bakwe mumulilo+ mu Kkuti lya Mwana wa Hinomu;+ wakali kucita masalamuzi,+ kusonda, bulozi, alimwi wakasala baŋanga abantu baamba zyakumbele.+ Wakacita zibi zinji mumeso aa Jehova akumunyemya.
7 Wakabikka cikozyanyo cibezedwe ncaakapanga muŋanda ya Leza mwini-mwini,+ eeyo Leza njaakaambila Davida a Solomoni mwanaakwe kuti: “Muŋanda eeyi alimwi amu Jerusalemu, imunzi ngondasala akati kamisyobo yabana Israyeli yoonse, ndiyoobikka zina lyangu kukabe kutamani.+ 8 Alimwi nsikoyoogwisya limbi zituta zyabana Israyeli munyika njindakapa bamausyi kufwumbwa buyo kuti balomye kutobela zyoonse nzindakabalailila, nkokuti Mulawo woonse, malailile ambeta nzindakabapa kwiinda muli Musa.” 9 Pele Manase wakazumanana kubasowa ba Juda abantu bamu Jerusalemu, kubapa kucita zibi zipati kwiinda misyobo eeyo Jehova njaakanyonyoona kubusyu bwabana Israyeli.+
10 Jehova wakazumanana kucenjezya Manase abantu bakwe, pele tiibakaswiilila pe.+ 11 Aboobo Jehova wakabaletela basilutwe bampi zyabasikalumamba zyamwami wa Asuri, eelyo bakamujata Manase angobyo* akumwaanga nketani zyamukuba kumane bakamutola ku Babuloni. 12 Mumapenzi aakwe, wakakombelezya Jehova Leza wakwe kuti amufwide luzyalo* alimwi wakazumanana kulibombya kapati kubusyu bwa Leza wabamausyi. 13 Wakazumanana kupaila kuli Leza, aboobo Leza wakakutambula kukombelezya kwakwe akukuswiilila kukomba kwakwe kwakuti afwidwe luse, aboobo wakamupilusya ku Jerusalemu akumupa bwami bwakwe.+ Mpoonya Manase wakazyiba kuti Jehova ngu Leza mwini-mwini.+
14 Kuzwa waawo wakayaka bwaanda buli kunze aabwaanda bwa Munzi wa Davida+ kumbo lya Gihoni+ mukkuti* mane kuyoosikila ku Mulyango wa Nswi.+ Bwaanda oobo bwakazinguluka kusikila ku Ofeli+ alimwi wakabulampya kapati kuya mujulu. Kuyungizya waawo, wakasala basilutwe bampi zyabasikalumamba muminzi yoonse iikwabilidwe mu Juda. 15 Kumane wakagwisya baleza beenzu acikozyanyo camutuni muŋanda ya Jehova+ azipaililo zyoonse nzyaakayakide mucilundu caŋanda ya Jehova+ amu Jerusalemu, eelyo wakazisowela kunze aamunzi. 16 Kunze lyaboobo, wakabambulula cipaililo ca Jehova+ akutalika kutuula zipaizyo zyalumvwano+ azipaizyo zyakulumba+ alincico alimwi wakaambila ba Juda kuti kababelekela Jehova Leza wa Israyeli. 17 Nokuba boobo, bantu bakacili kutuula mumasena aakukombela, pele bakali kutuulila Jehova Leza wabo.
18 Makani oonse aakaindi aamba zya Manase, mupailo ngwaakapaila kuli Leza wakwe alimwi amajwi aabasizilengaano ibakaambaula anguwe muzina lya Jehova Leza wa Israyeli alilembedwe mumakani aakaindi aamba zyabami babana Israyeli. 19 Mupailo wakwe+ alimwi akulomba kwakwe mbokwakaingulwa, zibi zyakwe zyoonse, kutasyomeka kwakwe,+ masena nkwaakayakide masena aakukombela akubikka misemu yazisamu yakukomba*+ azikozyanyo zibezedwe ciindi naatakalinalibombya, zililembedwe akati kamajwi aabasizilengaano bakwe. 20 Mpoonya Manase wakoona abamausyi alimwi bakamuzikka kuŋanda yakwe; eelyo Amoni mwanaakwe wakaba mwami mubusena bwakwe.+
21 Amoni+ wakali amyaka iili 22 naakaba mwami, alimwi wakalela kwamyaka yobilo mu Jerusalemu.+ 22 Wakazumanana kucita zibi mumeso aa Jehova mbubonya mbuli Manase usyi mbwaakacita;+ alimwi Amoni wakali kuzituulila zikozyanyo zyoonse zibezedwe eezyo Manase usyi nzyaakapangide,+ alimwi wakazumanana kuzikomba. 23 Pele tanaakalibombya kuli Jehova+ mbuli Manase usyi;+ muciindi caboobo Amoni wakaindilizya buya milandu yakwe. 24 Mpoonya babelesi bakwe bakapangana,+ eelyo bakamujaya muŋanda yakwe. 25 Pele bantu bamucisi eeco bakabajaya boonse aabo ibakapangana kujatikizya Mwami Amoni,+ kumane bakabikka Josiya+ mwanaakwe kuba mwami mubusena bwakwe.