Jeremiya
26 Kumatalikilo aabulelo bwa Jehoyakimu+ mwana wa Josiya, mwami wa Juda, kwakasika jwi eeli kuzwa kuli Jehova: 2 “Mboobu mbwaamba Jehova, ‘Koimikila mulubuwa lwaŋanda ya Jehova mpoonya waambe kujatikizya minzi* yoonse ya Juda eeyo iiboola kuzookomba* kuŋanda ya Jehova. Ubaambile majwi oonse ngonditiikulailile; utasiyi jwi noliba lyomwe. 3 Ndiza bayooswiilila akujokoloka, umwi aumwi kuzwa kunzila yakwe mbyaabi, eelyo ndiyoocinca mizeezo kujatikizya mapenzi ngondikanzide kubaletela akaambo kamicito yabo mibyaabi.+ 4 Ukabaambile kuti: “Mboobu mbwaamba Jehova, ‘Ikuti naa tamukoondiswiilila kwiinda mukutatobela mulawo* wangu ngondamupa, 5 akwiinda mukutaswiilila majwi aababelesi bangu basinsimi, aabo mbondituma kulindinywe cakwiinduluka-induluka,* aabo mbomwataswiilila,+ 6 nkokuti ŋanda eeyi ndiyakwiipa kuba mbuli Silo,+ alimwi munzi ooyu ndiyakuupa kuba cintu cisinganizyidwe kumasi oonse aamunyika.’”’”+
7 Aboobo bapaizi, basinsimi abantu boonse bakamumvwa Jeremiya kaambaula majwi aaya muŋanda ya Jehova.+ 8 Mpoonya Jeremiya naakamanizya kwaamba zintu zyoonse Jehova nzyaakamulailide kuti aambile bantu boonse, ibapaizi, basinsimi alimwi abantu boonse bakamujata akwaamba kuti: “Yebo ncobeni ulafwa. 9 Nkaambo nzi ncoosinsima muzina lya Jehova, kuti, ‘Ŋanda eeyi iyooba mbuli Silo, eelyo munzi ooyu uyoonyonyoonwa alimwi takukacaali muntu uukkala mumo’?” Lino bantu boonse bakamuzinguluka Jeremiya muŋanda ya Jehova.
10 Basilutwe ba Juda nobakamvwa majwi aaya, bakazwa kuŋanda yamwami akuboola kuŋanda ya Jehova akuzookkala ansi kumanjililo aamulyango mupya waŋanda ya Jehova.+ 11 Mpoonya bapaizi abasinsimi bakaambila basilutwe abantu boonse kuti: “Muntu ooyu weelede kujaigwa,+ nkaambo wasinsima makani mabi kujatikizya munzi ooyu mbubonya nywebo mbomwalimvwida amatwi aanu.”+
12 Mpoonya Jeremiya wakaambila basilutwe boonse alimwi abantu boonse kuti: “Ngu Jehova wakandituma kuzoosinsima kujatikizya ŋanda eeyi akujatikizya munzi ooyu majwi oonse ngomwamvwa.+ 13 Aboobo lino amubotye nzila zyanu amicito yanu, alimwi amuswiilile jwi lya Jehova Leza wanu, eelyo Jehova ulacinca mizeezo kujatikizya mapenzi aayo ngaamba kuti ulamuletela.+ 14 Pele mebo, ndili mumaanza aanu. Amundicite kufwumbwa ncomubona kuti ncibotu alimwi akuti nceciluzi mumeso aanu. 15 Pele ncomweelede kuzyiba ncakuti, ikuti naa mundijaye, mbulowa bwamuntu uutakwe mulandu mbomutiibikke aamitwe yanu nobeni, aamunzi ooyu alimwi aabantu bakkala mumo, nkaambo Jehova mubwini ngowakandituma kulindinywe kuzikwaamba majwi aaya oonse ngomwalimvwida amatwi aanu.”
16 Aboobo basilutwe alimwi abantu boonse bakaambila bapaizi abasinsimi kuti: “Muntu ooyu teelede kujaigwa pe, nkaambo watwaambila muzina lya Jehova Leza wesu.”
17 Kuyungizya waawo, bapati bamwi bamucisi bakanyamuka akwaambila mbungano yoonse yabantu kuti: 18 “Mika+ waku Moresati wakali kusinsima mumazuba aa Mwami Hezekiya+ wa Juda alimwi wakaambila bantu boonse bamu Juda kuti, ‘Mboobu mbwaamba Jehova wamakamu:
“Ziyoni uyoolimwa mbuli muunda,
Jerusalemu uyooba zitantaala buyo,+
Acalo cilundu ca Ŋanda* ciyooba mbuli malundu aamusyokwe.”’*+
19 “Sena Mwami Hezekiya wa Juda antoomwe abana Juda boonse bakamujaya? Sena tanaakayoowa Jehova cakuti wakakombelezya Jehova,* eelyo Jehova wakacinca mizeezo yakwe kujatikizya mapenzi ngaakaambide kuti uyoobaletela?+ Aboobo, ncotuyanda kucita lino cilatuletela buyo mapenzi mapati swebo tobeni.
20 “Alimwi kwakali mwaalumi umwi iwakali kusinsima muzina lya Jehova, Urija mwana wa Semaya uuzwa ku Kiriyati-jearimu,+ ooyo iwakasinsima kujatikizya munzi ooyu alimwi acisi eeci amajwi aakozyenye aa Jeremiya. 21 Mwami Jehoyakimu+ abaalumi bakwe boonse basinguzu alimwi abasilutwe boonse bakaamvwa majwi aakwe, mpoonya mwami wakatalika kuyandaula nzila yakuti amujaye.+ Lino Urija mbwaakamvwida buyo boobo wakayoowa akutijila ku Egepita. 22 Mpoonya Mwami Jehoyakimu wakatuma Elinatani+ mwana wa Akiboro antoomwe abaalumi bambi kuti baunke ku Egepita. 23 Aboobo bakamugusya Urija kuzwa ku Egepita akumuleta ku Mwami Jehoyakimu, ooyo wakamujaya apanga+ akusowa mubili wakwe kunamaumbwe ikuzikkwa bantu-bantu buyo.”
24 Nokuba boobo, Ahikamu+ mwana wa Safani+ wakagwasya Jeremiya, aboobo tanaakaabwa mumaanza aabantu kuti bamujaye.+