Ezekieli
27 Alimwi ijwi lya Jehova lyakandisikila kaliti: 2 “Lino yebo omwanaamuntu koimba lwiimbo lwabuumba* lwakulila Turo,+ 3 waambile Turo kuti,
‘Yebo ookkede kumanjililo aalwizi,
Omusambazi wabantu bamunsumbu zinji,
Mboobu mbwaamba Mwami Singuzuzyoonse Jehova:
“Yebo lwako O Turo waamba kuti, ‘Mebo ndileebeka kapati.’+
4 Zilawo zyako zili mukati kalwizi,
Alimwi basikukuyaka bapa kuti ubote kapati.
5 Mapulanga aako oonse bakaapanga azisamu zyamulombe waku Seniri,+
Alimwi bakabweza cisamu cakkedari ku Lebano akukupangila cisamu casaili lyako.
6 Nkasi zyako bakazipanga kuzwa kuzisamu zipati zyaku Basani,
Alimwi nkolikumbele wakapangwa acisamu camuzimbwa ciziluludwe ameja aabazovwu, kuzwa kunsumbu zyaku Kitimu.+
7 Milembo yamabala-mabala yaku Egepita njiyakabelesyegwa kupanga saili lyako,
Alimwi ciluli cako cakapangidwe amulembo wamubala wacikambwe aboya bwambelele bwamubala wacisombo zizwa kunsumbu zyaku Elisa.+
8 Bantu bakkala ku Sidoni aku Arivadi+ mbabakali kukukwasula.
Baalumi bako basyaazibwene, O Turo, mbabakali kukweenzya.+
9 Baalumi bauzyi kapati mulimo* alimwi basyaazibwene baku Gebali+ mbabakasinka maswaanganino aamapulanga aako.+
Mato oonse aamulwizi alimwi abasikwaaenzya bakali kuboola kulinduwe kuzoocita makwebo.
10 Baalumi baku Persia, Ludi, aku Puti+ bakali mumpi yako, bakali basikalumamba bako.
Bakaanzika ntobo zyabo azimpoompo zyabo kulinduwe, alimwi bakakupa kuti weebeke.
11 Baalumi baku Arivadi ibakali mumpi yako bakaliimvwi koonse-koonse kabazingulukide malambo aako,
Alimwi baalumi basicamba bakali kulinda ngazi zyako.
Bakaanzikide ntobo zyabo zili mbuli mubalo koonse-koonse kuzinguluka malambo aako
Akupa kuti yebo ubote kapati.
12 “‘“Bana Tarisi+ bakacita makwebo anduwe akaambo kakuvwula kwalubono lwako.+ Nsiliva, butale, mundalila, alimwi aloto* bakazicincanisya azintu zyako.+ 13 Bana Javani, Tubali+ alimwi abana Meseki+ bakacita makwebo anduwe, ibazike+ alimwi azintu zyakapangwa amukuba bakazicincanisya azintu nzyowakali kusambala. 14 Bamuŋanda ya Togarima+ bakabweza mabbiza, mahacci alimwi amamyuulu* akuzicincanisya azintu zyako. 15 Bantu baku Dedani+ bakacita makwebo anduwe; yebo wakabanjizya milimo basambazi bamunsumbu zinji; bakali kukupa meja aabazovwu+ azisamu zijisi moyo uusimide kazili mutelo. 16 Bana Edomu bakacita makwebo anduwe akaambo kakuvwula kwazintu zyako nzyowakali kupanga. Bakapa mabwe mayandisi aanofeki, aboya bwambelele bwamubala wacisombo, azisani zyamabala-mabala zisumidwe kabotu, amilembo mibotu, amabwe mayandisi aamulwizi alimwi amabwe aasubila-subila kucincanisya azintu zyako.
17 “‘“Juda alimwi acisi ca Israyeli bakacita makwebo anduwe, bakakupa wiiti waku Miniti,+ zyakulya zibotu, buci,+ mafwuta alimwi amabbona+ kucincanisya azintu zyako.+
18 “‘“Bana Damasiko+ bakacita makwebo anduwe akaambo kakuvwula kwazintu zyako nzyowakali kupanga alimwi alubono lwako loonse lunji, kabasambala waini waku Heliboni alimwi aboya bwambelele bwa Zahari.* 19 Bana Vedani abana Javani ibazwa ku Uzali bakapa butale bufwulidwe, azisamu zyakkasiya,* alimwi aminsale* kucincanisya azintu zyako. 20 Bana Dedani+ bakasambalana anduwe zisani zyakukkalila amabbiza. 21 Wakabanjizya milimo bana Arabiya abasilutwe boonse baku Kedara,+ aabo ibakali basambazi babana bambelele, babagutu abampongo.+ 22 Basambazi baku Sheba abaku Raama+ bakacita makwebo anduwe; bakapa misyobo yoonse yatununkilizyo tubotu kapati, mabwe mayandisi alimwi angolida kucincanisya azintu zyako.+ 23 Bana Harani,+ bana Kane, bana Edeni,+ abasambazi baku Sheba,+ baku Asuri+ abaku Kilimadi bakacita makwebo anduwe. 24 Mumisika yako bakali kusambala zisani zibotu, zibaki zilileka-leka zyakapangwa amulembo wamubala wacikambwe akutungwa tulembo tubotu twamabala-mabala, antoomwe amakkapeti aamabala-mabala, zyoonse buyo kazipombedwe akwaangwa antambo.
25 Mato aaku Tarisi+ ngaakali kususa zintu zyako zyakusambala,
Cakuti yebo wakazuzyigwa akulemenwa mukati mwini mwalwizi.
26 Aabo bakukwasula bakutola mulwizi lujisi maanzi manji;
Muwo wakujwe wakunyonyoona mukati mwini mwalwizi.
27 Lubono lwako, zintu zyako, makwebo aako, bantu bako beenzya bwato, basibwato bako,
Bantu basinka-sinka maswaanganino aamapulanga aako, bantu basambala makwebo aako,+ alimwi abasikalumamba bako boonse,+
Inzya inkamu yoonse iili mulinduwe,
Boonse buyo bayoobbila mukati kalwizi mwini mubuzuba mboyakuwa.+
28 Basikukweenzya baakoomoka, zilawo zyakunkomwe yalwizi ziyookankama.
29 Boonse basikukwasula bwato ankasi, basikweenzya bwato alimwi abasibwato
Bayooseluka mumato aabo akwiimina anyika.
30 Bayakoomoka akukulila kapati yebo+
Kumwi kabawaala bulongo amitwe yabo alimwi akwaalabana mumulota.
31 Bayooligela minkulu akusama zisani zyamasaka;
Bayookulila ceetezya, akoongolola kapati.
32 Baakukulila bayakwiimba lwiimbo lwabuumba akweema kabati:
‘Ino nguni uuli mbuli Turo, ooyo lino waumunina mukati kalwizi?+
33 Zintu zyako nizyakali kusika kuzwa mulwizi, yebo wakali kukkutya bantu.+
Lubono lwako lunji amakwebo aako manji zyakavwubya bami bamunyika.+
34 Pele lino wanyonyoonwa mukati mwini mwalwizi, mumaanzi manji malamfwu,+
Azyalo zintu zyako zyoonse nzyosambala abantu bako boonse zyabbila anduwe.+
35 Bantu boonse bakkala munsumbu bayookulanga kabagambidwe,+
Abalo bami babo bayoozuzuma kabayoowede kapati+—imasyu aabo anakuuside.
36 Basambazi bazwa akati kamasi bayoosiba milosi akaambo kaceeco cakucitikila.
Mamanino aako ayoosika cakutayeeyelwa alimwi munzila iiyoosya,
Mpoonya uyooloba mane kukabe kutamani.’”’”+