1 Makani
23 Lino Davida naakacembaala alimwi naakali afwaafwi kufwa,* wakabikka Solomoni mwanaakwe kuba mwami wa Israyeli.+ 2 Mpoonya wakabunganya basilutwe boonse babana Israyeli,+ bapaizi alimwi aba Levi.+ 3 Ba Levi ibakajisi myaka iili 30 kuya mujulu bakabalwa;+ mweelwe wabaalumi aaba ikubabala umwi aumwi, wakali 38,000. 4 Akati kabaaba, ibali 24,000 bakali kweendelezya mulimo wakuŋanda ya Jehova, ibali 6,000 bakali basilutwe ababetesi,+ 5 ibali 4,000 bakali balindizi bamilyango+ eelyo ibali 4,000 bakali basikutembaula+ Jehova azibelesyo zyakwiimbya eezyo Davida nzyaakaamba kuti, “Ndakazipangila kutembaula Leza.”
6 Mpoonya Davida wakababikka*+ munkamu kweelana abana ba Levi: kuli Gerisoni, Kohati a Merari.+ 7 Kubana Gerisoni kwakali Ladani a Simeyi. 8 Bana ba Ladani bakali ba Jehieli silutwe, Zetamu a Joeli,+ antoomwe bakali botatwe. 9 Bana ba Simeyi* bakali ba Selomoti, Hazieli a Harani, antoomwe bakali botatwe. Aaba mbabakali basilutwe baziinga zyabamausyi baluzubo lwa Ladani. 10 Bana ba Simeyi* bakali ba Jahati, Zina,* Jeusi a Beriya. Aaba bone bakali bana ba Simeyi. 11 Jahati wakali silutwe eelyo Ziza wakali wabili. Pele mbwaanga Jeusi a Beriya tiibakajisi bana basankwa banji, bakaba ciinga comwe cabamausyi kabajisi mulimo omwe.
12 Bana ba Kohati bakali ba Amuramu, Izara,+ Hebroni a Uzieli,+ antoomwe bakali bone. 13 Bana ba Amuramu bakali ba Aroni+ a Musa.+ Pele Aroni wakazandulwa+ kutegwa lyoonse kasalazya Busena Busalalisya walo abana bakwe, kuti kabatuula zipaizyo kubusyu bwa Jehova, kuti kabamubelekela alimwi akulongezya bantu muzina lyakwe lyoonse.+ 14 Pele walo Musa imuntu wa Leza mwini-mwini, bana bakwe bakali kubalilwa kumusyobo waba Levi. 15 Bana ba Musa bakali ba Gerisomu+ a Eliezere.+ 16 Kubana ba Gerisomu, Sebuyeli*+ ngowakali silutwe. 17 Kuzwa kulunyungu* lwa Eliezere, Rehabiya+ ngowakali silutwe; Eliezere tanaakazyala bana bambi basankwa, pele bana basankwa ba Rehabiya bakali banji kapati. 18 Kubana ba Izara,+ Selomiti+ ngowakali silutwe. 19 Bana ba Hebroni mbaaba, Jeriya silutwe, wabili Amariya, watatu Jahazieli, wane Jekameamu.+ 20 Bana ba Uzieli+ bakali ba Mika silutwe a Isiya wabili.
21 Bana ba Merari bakali ba Mali a Musi.+ Eelyo bana ba Mali bakali ba Eleazara a Kisi. 22 Eleazara wakafwa, pele tanaakajisi bana basankwa, wakajisi buyo basimbi. Aboobo bana ba Kisi, ibasazinyina* mbabakabakwata. 23 Bana ba Musi bakali ba Mali, Ederi a Jeremoti, antoomwe bakali botatwe.
24 Aaba mbabakali bana ba Levi kweelana aziinga zyabamausyi, basilutwe baziinga zyabamausyi kweelana ambobakalembedwe mazina aabo umwi aumwi kumugama alimwi ibakali kubeleka milimo muŋanda ya Jehova kutalikila amyaka iili 20 kuya mujulu. 25 Nkaambo Davida wakaambide kuti: “Jehova Leza wa Israyeli wabapa kulyookezya bantu bakwe,+ alimwi ulakkala mu Jerusalemu kukabe kutamani.+ 26 Alimwi ba Levi tabaciyandiki kunyamuna tente lyakukombela azibelesyo zyamilimo yalyo.”+ 27 Nkaambo kweelana amajwi aa Davida aamamanino, ba Levi kutalikila amyaka iili 20 kuya mujulu mbabakabalwa. 28 Mulimo wabo wakali wakugwasya bana ba Aroni+ kubeleka milimo yamuŋanda ya Jehova, kulanganya mabbuwa,+ maanda aakulida akusalazya zintu zyoonse zisalala alimwi amilimo iili yoonse iiyandika kubelekwa muŋanda ya Leza mwini-mwini. 29 Bakali kugwasya mukupanga zinkwa zyakwiilika,*+ fulaulu wazituuzyo zyamaila, tunkwa tupapalete tunyina bumena,+ zinkwa zipangilwa aciyokelo, kukanda fulaulu uuvwelene amafwuta+ alimwi akweeleka akupima zintu ziindene-indene. 30 Bakeelede kwiima lyoonse mafwumofwumo+ kulumba akutembaula Jehova alimwi bakali kucita mbubonya oobo akumangolezya.+ 31 Bakali kugwasyilizya kufwumbwa ciindi nozyakali kutuulwa zipaizyo zyuumpwa kuli Jehova muma Sabata,+ ciindi noukkala mwezi+ amuziindi zyamapobwe+ kweelana amweelwe uuyandika kujatikizya zintu eezyo. Bakali kucita oobo lyoonse kubusyu bwa Jehova. 32 Alimwi bakali kubikkila maano kumikuli yabo iijatikizya tente lyakuswaanganina, busena busalala alimwi akujatikizya banabokwabo ibana ba Aroni, mumilimo yabo yaaŋanda ya Jehova.