1 Samuele
12 Mpoonya Samuele wakaambila bana Israyeli boonse kuti: “Ndacita* zyoonse nzyomwakandaambila kuti ndimucitile, alimwi ndamubikkila mwami wakumweendelezya.+ 2 Lino ngooyu mwami uunoomweendelezya!*+ Mebo ndacembaala, ndaba amvwi, alimwi bana bangu bali akati kanu,+ lino mebo ndali kumweendelezya kuzwa kubukubusi bwangu kusikila sunu.+ 3 Ndasika waano. Amundiingule kumbele lya Jehova akumbele lyamunanike wakwe:+ Ino nguni ngundakanyanga kale ŋombe naa mbongolo?+ Ino nguni ngundakaunina naa kudyaaminina? Ino nguni ngundakatambwida makulo* kutegwa nditabikkili maano kucintu ncaakacita?+ Ikuti kakuli boobo, ndilamupilusizya.”+ 4 Eelyo bakati: “Kunyina nowakatuunina nokuba kutudyaaminina nokuba kubweza cintu cili coonse kuzwa kumuntu uuli woonse.” 5 Aboobo wakati kulimbabo: “Jehova ngukamboni wanu, alimwi amunanike wakwe ngukamboni sunu kuti kunyina mulandu uuli woonse ngomwajana mulindime.”* Eelyo bakati: “Inzya, ngukamboni.”
6 Aboobo Samuele wakaambila bantu kuti: “Jehova, ooyo iwakabelesya Musa a Aroni kugwisya bamauso mucisi ca Egepita,+ ngukamboni. 7 Lino kamwiimvwi aawa alimwi ndilamubeteka kumbele lya Jehova akumwaambila milimo iiluleme yoonse ya Jehova njaakamucitila nywebo abamauso.
8 “Jakobo mbwaakasikila buyo mu Egepita,+ bamauso bakatalika kulilila Jehova kuti abagwasye,+ eelyo Jehova wakatuma Musa+ a Aroni kutegwa basololele bamauso kuzwa mu Egepita akubapa kuti bakkale mubusena oobu.+ 9 Pele bakamuluba Jehova Leza wabo, aboobo wakabaaba+ mumaanza aa Sisera+ silutwe wampi yabasikalumamba ya Hazori amumaanza aaba Filisiti+ amumaanza aamwami wa Moabu,+ eelyo bakabalwana. 10 Mpoonya bakatalika kulilila Jehova kuti abagwasye+ kabati, ‘Twabisya,+ nkaambo twamusiya Jehova akutalika kubelekela ba Baala+ azikozyanyo zya Asitoreti;+ lino kotuvwuna kumaanza aabasinkondoma kutegwa tukubelekele.’ 11 Mpoonya Jehova wakatuma Jerubaala,+ Bedani, Jefita,+ a Samuele+ akumuvwuna kumaanza aabasinkondonyoko ibakamuzingulukide, kutegwa mukkale muluumuno.+ 12 Nomwakabona kuti Nahasi+ mwami wabana Amoni waboola kuzoomulwana, mwakazumanana kundaambila kuti, ‘Peepe, swebo tuyanda mwami kuti atweendelezye!’+ nokuba kuti Jehova Leza ngo Mwami wanu.+ 13 Lino ngooyu mwami ngomwasala, ooyo ngomwakalomba. Amubone! Jehova wamubikkila mwami.+ 14 Ikuti kamumuyoowa Jehova+ akumubelekela+ alimwi akuswiilila jwi lyakwe,+ akuti naa kamutasotoki milawo ya Jehova, akuti naa nywebo amwami uuyoomweendelezya kamutobela Jehova Leza wanu, nkokuti kuli kabotu. 15 Pele kuti naa kamutaswiilili jwi lya Jehova akusotoka mulawo wa Jehova, ncobeni Jehova uyoomusubula nywebo abamauso.+ 16 Lino amwiime aawa mubone cintu cigambya Jehova ncayanda kucita kubusyu bwanu. 17 Sena ecino tacili ciindi cakutebula wiiti? Ndilaita kuli Jehova kuti atume muzumo amvwula; mpoonya mulazyiba akubona kuti mwacita cibi cipati kapati mumeso aa Jehova akaambo kakulomba mwami.”+
18 Mpoonya Samuele wakoompolola kuli Jehova, eelyo Jehova wakatuma mizumo amvwula buzuba oobo, cakuti bantu boonse bakamuyoowa kapati Jehova alimwi a Samuele. 19 Kumane bantu boonse bakaambila Samuele kuti: “Kotupailila tobabelesi bako kuli Jehova Leza wako,+ mbwaanga tatuyandi kufwa, nkaambo twaliyungizizya buyo zibi zyesu akaambo kakulomba mwami.”
20 Aboobo Samuele wakaambila bantu kuti: “Mutayoowi pe. Mwakacita zibi zyoonse eezyi. Lino mutaleyi mukutobela Jehova,+ alimwi amubelekele Jehova amoyo wanu woonse.+ 21 Alimwi mutaleyi akutobela zintu zyabuyo* eezyo+ zitagwasyi+ alimwi zitakonzyi kumuvwuna nkaambo nzyabuyo.* 22 Akaambo kazina lyakwe lipati,+ Jehova takabasiyi bantu bakwe+ nkaambo Jehova uliyandide kuti mube bantu bakwe.+ 23 Andime tandikonzyi kubisizya Jehova kwiinda mukuleka kumupailila, ndilazumanana kumuyiisya nzila mbotu alimwi iiluleme. 24 Lino amuyoowe Jehova+ akumubelekela cakusyomeka* amyoyo yanu yoonse, amuyeeye buyo milimo mipati njaamucitila.+ 25 Pele kuti naa mwayumya myoyo yanu mukucita zibi, muyoonyonyoonwa+ nywebo antoomwe amwami wanu.”+