1 Samuele
10 Mpoonya Samuele wakabweza nsazi yamafwuta akutila amutwe wa Saulo.+ Wakamumyonta akumwaambila kuti: “Jehova wakunanika kuti ube musololi+ wabantu bakwe.+ 2 Waunka buyo, ulajana baalumi bobilo afwaafwi acuumbwe ca Rakele+ mucilawo ca Benjamini ku Zeliza, eelyo bayookwaambila kuti, ‘Imbongolo nzyookaunkide kuyooyandaula zyajanwa kale, pele lino bauso baleka kulibilika kujatikizya mbongolo+ akutalika kulibilika nduwe. Baamba kuti: “Ino ndilacita buti kujatikizya mwanaangu?”’ 3 Kuzwa waawo ukazumanane alweendo lwako mane ukasike kumusamu mupati waku Tabori, ooko uyoojana baalumi botatwe baunka kuli Leza mwini-mwini ku Beteli,+ umwi unoonyamwide tupongo totatwe, umwi unoonyamwide zinkwa zibulungene zyotatwe, eelyo umwi unoonyamwide nongo mpati yawaini. 4 Lino bayookwaanzya akukupa zinkwa zyobilo, eelyo weelede kuzitambula. 5 Kuzwa waawo uyoosika kucilundu ca Leza mwini-mwini, ikuli nkambi yabasikalumamba yaba Filisiti. Waakusika buyo mumunzi, uyooswaanganya nkamu yabasinsimi kabaselemuka mumulundu kumwi kabasinsima alimwi kumbele lyabo kunooli bantu balizya tulumbu, nsakalala, mintolilo atuntimbwa. 6 Muuya wa Jehova uyookupa nguzu,+ eelyo yebo uyoosinsima antoomwe ambabo alimwi uyoosanduka akuba muntu uumbi.+ 7 Lino zitondezyo eezyi zyaakucitika, ukacite kufwumbwa janza lyako nzyoliyookonzya kucita, nkaambo Leza mwini-mwini uli anduwe. 8 Mpoonya ukandisolwede kuya ku Giligala,+ nkaambo andime ndiyooboola ooko kulinduwe kuzootuula zipaizyo zyuumpwa azipaizyo zyalumvwano. Lino ukalindile mazuba aali ciloba kusikila ndikaboole kulinduwe. Eelyo ndiyookwaambila nzyoyelede kucita.”
9 Lino Saulo mbwaakafwutatila buyo kuzwa kuli Samuele, Leza wakatalika kumucinca moyo wakwe akumupa kuba muntu uumbi, eelyo zitondezyo eezyi zyoonse zyakacitika ncobeni mubuzuba oobo. 10 Aboobo bakazwa ooko akuunka kucilundu, eelyo nkamu yabasinsimi yakamuswaanganya. Mpoonya aawo muuya wa Leza wakamupa nguzu,+ alimwi wakatalika kusinsima akati kabo.+ 11 Lino boonse aabo ibakamuzyi nobakamubona kasinsima antoomwe abasinsimi, bakabuzyanya kuti: “Ino mwana wa Kisi wabaanzi? Sena awalo Saulo waba musinsimi?” 12 Kumane mwaalumi umwi wakooko wakavwiila kuti: “Ino usyi wabo nguni?” Aboobo kwakaba kaambyo* kakuti: “Sena awalo Saulo waba musinsimi?”+
13 Naakamana kusinsima, wakaunka kucilundu. 14 Nokwakainda ciindi mwanookwabo abausyi Saulo wakabuzya Saulo amubelesi wakwe kuti: “Ino mwakaunkide kuli?” Mpoonya bakati: “Twakaunkide kuyooyandaula mbongolo,+ pele tiitwakazijana pe, aboobo twakaunka kuli Samuele.” 15 Mpoonya mwanookwabo abausyi Saulo wakabuzya kuti: “Ndakomba undaambile, ino ncinzi ncaakakwaambila Samuele?” 16 Saulo wakati: “Wakatwaambila kuti mbongolo zyakajanika kale.” Pele Saulo tanaakamwaambila makani aajatikizya bwami ngaakaamba Samuele.
17 Kumane Samuele wakabunganya bantu kubusyu bwa Jehova ku Mizipa+ 18 akwaambila bana Israyeli kuti: “Mboobu mbwaamba Jehova Leza wa Israyeli: ‘Ndime ndakamugwisya mu Egepita akumuvwuna kumaanza aabana Egepita+ akumami oonse aakali kumupenzya. 19 Pele nywebo sunu mwamukaka Leza+ wanu iwakali Muvwuni wanu mumapenzi amakatazyo aanu oonse, alimwi mwakati: “Peepe, kotubikkila mwami kuti atweendelezye.” Lino amubungane kubusyu bwa Jehova mumisyobo yanu amunkamu zyanu zyabantu bali zyuulu.’”*
20 Aboobo Samuele wakabunganya misyobo yoonse yabana Israyeli,+ eelyo musyobo wa Benjamini wakasalwa.+ 21 Mpoonya wakaita musyobo wa Benjamini kuti uswene afwaafwi mumikwasyi yabo, eelyo mukwasyi wabana Matri wakasalwa. Mpoonya Saulo mwana wa Kisi wakasalwa.+ Pele nibakaunka kuyoomuyandaula, tiibakamujana pe. 22 Aboobo bakabuzya kuli Jehova+ kuti: “Sena muntu ooyo wasika kale kuno?” Jehova wakaingula kuti: “Inzya, nguulya uliyubide akati kantundu.” 23 Aboobo bakazuza akuyoomuleta kuzwa kooko. Naakaimikila akati kabantu, kuzwa amagwezyo wakali mulamfwu kubainda bantu boonse.+ 24 Mpoonya Samuele wakaambila bantu boonse kuti: “Sena mwamubona ooyo Jehova ngwaasala,+ kuti kunyina uuli mbuli nguwe akati kabantu boonse?” Eelyo bantu boonse bakatalika koongolola kuti: “Aaongole mwami!”
25 Mpoonya Samuele wakaambila bantu kujatikizya nzyobayooyanda bami+ kulimbabo alimwi wakazilemba mubbuku akulibikka kubusyu bwa Jehova. Kumane Samuele wakaambila bantu boonse kuti baunke, umwi aumwi kuŋanda yakwe. 26 Lino awalo Saulo wakaunka kuŋanda yakwe ku Gibea, alimwi basikalumamba aabo Jehova mbaakasika amoyo bakaunka antoomwe anguwe. 27 Pele baalumi babuyo balo bakati: “Ino ooyu inga watufwutula buti?”+ Aboobo bakamusampaula, alimwi tiibakamuletela cipego cili coonse.+ Pele walo kunyina ncaakaamba pe.*