1 Samuele
15 Mpoonya Samuele wakati kuli Saulo: “Jehova wakatuma ndime kuti ndikunanike kuti ube mwami wabantu bakwe bana Israyeli;+ lino koswiilila ncaamba Jehova.+ 2 Mboobu mbwaamba Jehova wamakamu: ‘Ndiyoobasubula bana Amaleki akaambo kancobakacita kubana Israyeli ciindi nibakabalwana nobakali kuzwa ku Egepita.+ 3 Lino koya ukabalwane bana Amaleki+ akubanyonyoona antoomwe azyoonse nzyobajisi.+ Toyelede kubafwida luzyalo pe; weelede kubajaya baalumi,+ bamakaintu, bana abavwanda, ŋombe, mbelele, nkamela ambongolo.’”+ 4 Aboobo Saulo wakaita bantu akubabala mu Telayimu: Kwakali basikalumamba beenda amaulu ibali 200,000 alimwi abaalumi baku Juda ibali 10,000.+
5 Mpoonya Saulo wakaunka kumunzi wa Amaleki akuyoobayubilila mumbali aakkuti.* 6 Kumane Saulo wakaambila bana Keni kuti:+ “Kamuya, amuzwe akati kabana Amaleki kutegwa nditamunyonyooni antoomwe ambabo.+ Nkaambo nywebo mwakabatondezya luyando lutamani bana Israyeli+ boonse ciindi nibakazwa mu Egepita.” Aboobo bana Keni bakazwa akati kabana Amaleki. 7 Kumane Saulo wakabalwana bana Amaleki+ kuzwa ku Havila+ kusikila ku Suri,+ munzi uubambene a Egepita. 8 Wakajata Agagi+ imwami wa Amaleki, pele bantu bamwi boonse wakabajaya apanga.+ 9 Nokuba boobo, Saulo abantu bakwe bakamufwida luzyalo Agagi, imbelele zibotu, ŋombe, banyama baneneede, bagutu azintu zibotu zyoonse.+ Tiibakayanda kuzinyonyoona pe. Pele zintu zyoonse zinyina mpindu alimwi zitayandiki bakazinyonyoona.
10 Lino jwi lya Jehova lyakaboola kuli Samuele kaliti: 11 “Ndausa kuti ndakabikka Saulo kuba mwami, nkaambo waleka kunditobela alimwi tanaacita kweelana amajwi aangu.”+ Cakamunyemya kapati eeci Samuele, aboobo wakazumanana kulila masiku oonse kuli Jehova.+ 12 Lino Samuele naakabuka mafwumofwumo kuyooswaangana a Saulo, Samuele wakaambilwa kuti: “Saulo wakaunka ku Karimeli,+ eelyo ooko wakaliyakila cibumbwa.+ Kumane wakanyona akuselemukila ku Giligala.” 13 Lino Samuele naakasika kulinguwe, Saulo wakaambila Samuele kuti: “Jehova akulongezye. Ndalitobela jwi lya Jehova.” 14 Pele Samuele wakati: “Ikuti naa mboobo, ino kulila ooku nkondimvwide kwambelele akwaŋombe kwaamba nzi?”+ 15 Eelyo Saulo wakati: “Zyakaletwa kuzwa kubana Amaleki, nkaambo bantu tiibakazijaya mbelele zibotu aŋombe, kuti bazibelesye kutuula zituuzyo kuli Jehova Leza wako; pele izyakasyaala twakazinyonyoona.” 16 Amvwe boobo Samuele wakaambila Saulo kuti: “Swiilila! Leka ndikwaambile Jehova ncaandaambila masiku aainda.”+ Aboobo Saulo wakati kulinguwe: “Kondaambila!”
17 Mpoonya Samuele wakazumanana kwaamba kuti: “Sena tonookalitenga mumeso aako+ omwini ciindi nookaba silutwe wamisyobo ya Israyeli, alimwi aleelyo Jehova naakakunanika kuba mwami wa Israyeli?+ 18 Kumane Jehova wakakutuma akukwaambila kuti, ‘Koya ukabanyonyoone basizibi bana Amaleki.+ Ukabalwane kusikila ukabamanizye.’+ 19 Aboobo ino nkaambo nzi tiiwakaswiilila jwi lya Jehova? Muciindi caboobo wakavwuumukila zisaalo+ akucita cintu cibi mumeso aa Jehova!”
20 Nokuba boobo Saulo wakati kuli Samuele: “Ndakaswiilila jwi lya Jehova! Ndakaunka ooko nkwaakanditumide Jehova akumuleta Agagi mwami wa Amaleki, alimwi ndakabanyonyoona bana Amaleki.+ 21 Pele bantu bakabweza mbelele aŋombe zibotu akati kazisaalo izyakeelede kunyonyoonwa kutegwa bakatuulile Jehova Leza wako ku Giligala.”+
22 Mpoonya Samuele wakati: “Sena Jehova ulazikkomanina kapati zituuzyo zyuumpwa alimwi azipaizyo+ kwiinda kuswiilila jwi lya Jehova? Bona! Ikumvwida nkubotu kwiinda cipaizyo,+ akuswiilila nkubotu kwiinda mafwuta+ aabagutu; 23 nkaambo kuzanga+ ncimwi buyo acibi cakusonda,+ mbubonya kulisumpula mbokweelene akusyoma mizimo akukomba mituni.* Lino akaambo kakuti wazanga akutaswiilila jwi lya Jehova,+ awalo wakukaka kuba mwami.”+
24 Mpoonya Saulo wakati kuli Samuele: “Ndabisya, nkaambo ndakasotoka malailile aa Jehova akutaswiilila majwi aako akaambo kakuyoowa bantu akuswiilila mbabo. 25 Lino akaka kondilekelela cibi cangu, alimwi kopiluka andime kutegwa ndikavwuntame ansi kuli Jehova.”+ 26 Pele Samuele wakati kuli Saulo: “Nsikoopiluka anduwe pe, nkaambo wakaka kuswiilila jwi lya Jehova alimwi Jehova wakukaka kuti uzumanane kuba mwami wa Israyeli.”+ 27 Lino Samuele naakavwuuluka kuti aunke, Saulo wakajata moombe wajansi lyakwe, pele lyakazapuka. 28 Kumane Samuele wakamwaambila kuti: “Jehova sunu wazapula bwami bwa Israyeli kuzwa kulinduwe, alimwi uyoobupa kuli umwi wabeenzinyoko uuli kabotu kwiinda nduwe.+ 29 Kunze lyaboobo, Sibulemu wa Israyeli+ takonzyi kubeja+ naa kucinca mbwayeeya,* nkaambo tali mbuli muntu uukonzya kucinca mbwayeeya.”*+
30 Mpoonya Saulo wakati: “Ndabisya. Lino akaka, kondilemeka kubusyu bwabaalu babantu bangu abwabana Israyeli. Kopiluka andime, eelyo ndiyoovwuntama ansi kuli Jehova Leza wako.”+ 31 Aboobo Samuele wakapiluka kayaabutobela Saulo, eelyo Saulo wakavwuntama ansi kuli Jehova. 32 Kumane Samuele wakati: “Amumulete afwaafwi Agagi mwami wa Amaleki.” Mpoonya Agagi wakaunka kulinguwe cakuwayawaya,* nkaambo Agagi wakali kulyaambauzya kuti: ‘Masimpe lufwu lubi lwandiinda.’ 33 Nokuba boobo, Samuele wakati: “Mbubonya mbuli banakazi mbobakafwidwa bana akaambo kapanga lyako, abalo banyoko bayoosyaala kabanyina bana.” Kumane Samuele wakagonkaula Agagi muzibeela-beela kubusyu bwa Jehova ku Giligala.+
34 Mpoonya Samuele wakaunka ku Rama, eelyo awalo Saulo wakaunka kuŋanda yakwe ku Gibea wa Saulo. 35 Lino Samuele tanaakamubona limbi Saulo mane kusikila naakafwa, nkaambo Samuele wakali kulila Saulo.+ Alimwi Jehova wakausa kuti wakabikkide Saulo kuba mwami wa Israyeli.+